લક્ષ્ય સેન ઓલ ઈંગ્લેન્ડ ઓપનમાં લક્ષ્ય સેનની નજર બીજા ફાઈનલ પર, સેમીફાઈનલમાં કેનેડિયન ખેલાડી સાથે ટક્કર
ભારતના ૨૪ વર્ષીય શટલર લક્ષ્ય સેને બર્મિંગહામમાં રમાઈ રહેલી ઓલ ઈંગ્લેન્ડ ઓપન ૨૦૨૬માં શાનદાર વાપસી કરી છે. છેલ્લા કેટલાક મહિનાઓથી ખરાબ ફોર્મ અને રેન્કિંગમાં ટોપ ૧૦માંથી બહાર ફેંકાઈ ગયા બાદ, લક્ષ્ય સેન માટે આ ટુર્નામેન્ટ તેની સિઝનમાં નવો જીવ ફૂંકનારી સાબિત થઈ શકે તેમ છે. સેમીફાઈનલમાં તેનો મુકાબલો ૨૧ વર્ષીય કેનેડિયન ખેલાડી વિક્ટર લાઈ સાથે થવાનો છે, જેની સામે લક્ષ્ય સેન કારકિર્દીની પ્રથમ મેચ રમશે.
વિશ્વના નંબર ૧ ખેલાડીને હરાવી મેળવ્યો આત્મવિશ્વાસ
લક્ષ્ય સેને આ ટુર્નામેન્ટમાં ‘જાયન્ટ-કિલર’ની ભૂમિકા ભજવી છે. તેણે શરૂઆતના રાઉન્ડમાં જ વિશ્વના નંબર ૧ ખેલાડી શિ યુકીને ૨૩-૨૧, ૧૯-૨૧, ૨૧-૧૭ થી હરાવીને મોટો ઉલટફેર કર્યો હતો. આ જીત બાદ તેણે ક્વાર્ટર ફાઈનલમાં પણ પોતાનું ફોર્મ જાળવી રાખ્યું અને વિશ્વના ૬ઠ્ઠા નંબરના ખેલાડી લી શિફેંગને સીધા સેટમાં હરાવીને સેમીફાઈનલમાં જગ્યા બનાવી લીધી છે. આ શાનદાર જીતને કારણે સેમીફાઈનલ પહેલા લક્ષ્ય સેનનો આત્મવિશ્વાસ સાતમા આસમાને છે.
ઐતિહાસિક લિસ્ટમાં નામ નોંધાવવાની તક
ઓલ ઈંગ્લેન્ડ ઓપન એ વિશ્વની સૌથી જૂની બેડમિન્ટન ટુર્નામેન્ટ છે. અત્યાર સુધી માત્ર બે ભારતીય ખેલાડીઓ જ પુરૂષ સિંગલ્સમાં આ ખિતાબ જીતી શક્યા છે – ૧૯૮૦માં પ્રકાશ પાદુકોણ અને ૨૦૦૧માં પુલેલા ગોપીચંદ. લક્ષ્ય સેન અગાઉ પણ આ ટુર્નામેન્ટની ફાઈનલમાં પહોંચી ચૂક્યો છે અને હવે તે આ ખાસ યાદીમાં પોતાનું નામ જોડવા ઈચ્છે છે. આ સિદ્ધિ હાંસલ કરવા માટે તેણે હવે માત્ર બે મેચ જીતવી પડશે.
વિક્ટર લાઈનો પડકાર
કેનેડાના વિક્ટર લાઈ હાલમાં વિશ્વ રેન્કિંગમાં ૧૬મા ક્રમે છે, જે લક્ષ્ય સેન કરતા માત્ર ચાર સ્થાન પાછળ છે. જોકે લક્ષ્ય સેન અનુભવ અને હાલના ફોર્મમાં આગળ દેખાઈ રહ્યો છે.
