ફોર્મ અપલોડની રાત-રાત ચાલતી કામગીરી વચ્ચે સુદાસણા ગામના શિક્ષકનું નિધન
ગુજરાતમાં ચૂંટણી પંચની મતદાર યાદી સુધારણા પ્રક્રિયા SIR તેજ ગતિએ ચાલી રહી છે. આવી કામગીરી દરમિયાન BLO તરીકે ફરજ બજાવતા કર્મચારીઓ પર કામનો ભારે બોજ હોવાના દાવા વારંવાર સામે આવી રહ્યા છે. તાજેતરમાં મહેસાણા જિલ્લાના સતલાસણા તાલુકાના સુદાસણ ગામમાં શિક્ષક દિનેશ રાવળનું અચાનક અવસાન થતા ખળભળાટ મચ્યો છે. તેઓ કન્યા શાળામાં આચાર્ય અને સાથે BLO તરીકે સેવા આપી રહ્યા હતા.
રાત્રે મોડે સુધી ફોર્મ અપલોડ, ત્યારબાદ હાર્ટ એટેક
પરિવાર અને સહકર્મચારીઓના જણાવ્યા મુજબ દિનેશભાઈ છેલ્લા કેટલાક દિવસોથી રાત્રે ઊંઘમાંથી જાગીને સતત ફોર્મ અપલોડ કરી રહ્યા હતા. SIR એપ વારંવાર હેંગ થતી હોવાથી કામ ધીમું ચાલતું અને સમય વધારે લાગતો હતો. મંગળવારની રાતે પણ તેઓ મોબાઇલ દ્વારા એપમાં માહિતી ભરતા હતા ત્યારે તેમને છાતીમાં તીવ્ર દુખાવો થયો. તાત્કાલિક ગામના દવાખાનામાં લઈ ગયા પરંતુ જરૂરી સારવાર ન મળતાં તેમને વડનગર સિવિલમાં ખસેડાયા જ્યાં ડોક્ટરોએ તેમને મૃત જાહેર કર્યા.
70% કામ પૂર્ણ છતાં પ્રેશર અનુભવાતું
સહશિક્ષકોનું કહેવું છે કે દિનેશભાઈએ અંદાજે 70 ટકા કાર્ય પૂર્ણ કરી દીધું હતું, છતાં સમય મર્યાદા અને સોફ્ટવેરની સમસ્યાઓથી મનોદબાણ વધતું દેખાતું હતું. સર્વર વારંવાર પ્રતિસાદ ન આપતાં એક એક ફોર્મ અપલોડ કરવા વધુ સમય જતો. પરિવારનો દાવો છે કે સતત રાતે જાગીને કામ કરવાથી તણાવ વધ્યો હશે અને તેની પાછળ હાર્ટ એટેક આવ્યો હોઈ શકે છે. ઘટનાથી સમગ્ર શિક્ષક વર્ગમાં દુઃખનું વાતાવરણ છે.
રાષ્ટ્રીય સ્તરે પ્રક્રિયા અને વિવાદો
હાલ આ મતદાર યાદી સુધારણા 12 રાજ્યોમાં ચાલી રહી છે જેમાં ગુજરાત પણ સામેલ છે. પશ્ચિમ બંગાળમાં આ મુદ્દે સૌથી વધુ વિરોધ જોવા મળે છે અને કહેવામાં આવે છે કે કામના ભારે દબાણને કારણે BLOના મૃત્યુના કિસ્સાઓ વધી રહ્યા છે. તૃણમૂલ કોંગ્રેસ દ્વારા 30થી વધુ મૃત્યુના દાવા સાથે આ પ્રક્રિયા પર પ્રશ્નો ઉઠાવવામાં આવ્યા છે. કેટલાક કિસ્સામાં આત્મહત્યાના આક્ષેપો પણ રાજ્યમાં ચર્ચાનો વિષય બન્યા છે.
