‘તમામ વિવાદોનો અંત લાવો’: શુક્રવારે પાકિસ્તાન કરશે અમેરિકા-ઈરાન શાંતિ મંત્રણાની યજમાની
મધ્ય પૂર્વમાં ચાલી રહેલા ભયાનક સંઘર્ષ વચ્ચે એક આશાસ્પદ સમાચાર સામે આવ્યા છે. પાકિસ્તાનના વડાપ્રધાન શહબાઝ શરીફે બુધવારે જાહેરાત કરી હતી કે, અમેરિકા અને ઈરાન વચ્ચે થયેલા યુદ્ધવિરામ બાદ હવે બંને દેશોના પ્રતિનિધિ મંડળો આગામી શુક્રવારે ઈસ્લામાબાદમાં ભેગા થશે. આ બેઠકનો મુખ્ય હેતુ વર્ષોથી ચાલી આવતા વિવાદોનો કાયમી અને નિર્ણાયક ઉકેલ લાવવાનો છે.
ડોનાલ્ડ ટ્રમ્પની ડેડલાઈન અને સીઝફાયરની મિનિટો
અમેરિકી રાષ્ટ્રપતિ ડોનાલ્ડ ટ્રમ્પે ઈરાનને સંપૂર્ણપણે નેસ્તનાબૂદ કરવાની જે ડેડલાઈન આપી હતી, તેના પૂરી થવાના માત્ર એક કલાક પહેલા જ આ બે અઠવાડિયાના યુદ્ધવિરામ પર સહમતી સધાઈ હતી. આ યુદ્ધની શરૂઆત 28 ફેબ્રુઆરીએ થઈ હતી જ્યારે ઈઝરાયેલ અને અમેરિકાના હુમલામાં ઈરાનના સર્વોચ્ચ નેતાનું મોત થયું હતું. ત્યારબાદ ઈરાને અખાતી દેશો અને ઈઝરાયેલ પર વળતા હુમલા કર્યા હતા, જેના કારણે સમગ્ર વિશ્વ યુદ્ધના ઉંબરે આવી ગયું હતું.
પાકિસ્તાન કેવી રીતે બન્યું શાંતિદૂત?
પાકિસ્તાને આ સંઘર્ષમાં મધ્યસ્થી તરીકે ખૂબ જ મહત્વની ભૂમિકા ભજવી છે. એક તરફ પાકિસ્તાનના ડોનાલ્ડ ટ્રમ્પ સાથે ગાઢ સંબંધો છે, તો બીજી તરફ પડોશી દેશ ઈરાન સાથે પણ તે સંવેદનશીલ રીતે જોડાયેલું છે. પાકિસ્તાન અને ઈરાન વચ્ચે 900 કિલોમીટરની લાંબી સરહદ છે અને ઈરાન પછી વિશ્વની બીજી સૌથી મોટી શિયા મુસ્લિમ વસ્તી પાકિસ્તાનમાં છે. આ ઉપરાંત, વોશિંગ્ટનમાં ઈરાનનું કોઈ દૂતાવાસ ન હોવાથી પાકિસ્તાન જ ત્યાં ઈરાનના રાજદ્વારી હિતોનું પ્રતિનિધિત્વ કરે છે. આ જ કારણોસર પાકિસ્તાન બંને દેશો વચ્ચે સંદેશા વ્યવહારનું મુખ્ય માધ્યમ બન્યું છે.
લેબનોન મુદ્દે હજુ પણ પેચ ફસાયેલો છે
વડાપ્રધાન શહબાઝ શરીફે જણાવ્યું હતું કે આ યુદ્ધવિરામ લેબનોન સહિત તમામ વિસ્તારોમાં લાગુ થશે. જોકે, ઈઝરાયેલે પાછળથી સ્પષ્ટ કર્યું હતું કે લેબનોનમાં હિઝબુલ્લાહ વિરુદ્ધ તેમની કાર્યવાહી ચાલુ રહેશે. આ વિરોધાભાસી નિવેદનોને કારણે ઈસ્લામાબાદમાં થનારી ચર્ચામાં લેબનોનનો મુદ્દો સૌથી જટિલ બની શકે છે.
વૈશ્વિક દેશોનો સાથ અને શાંતિની આશા
આ શાંતિ મંત્રણામાં માત્ર પાકિસ્તાન જ નહીં, પણ તુર્કી અને ઇજિપ્ત પણ મધ્યસ્થી તરીકે મદદ કરી રહ્યા છે. ડોનાલ્ડ ટ્રમ્પે પણ સ્વીકાર્યું છે કે ચીને ઈરાનને વાટાઘાટોના ટેબલ પર લાવવામાં મોટી ભૂમિકા ભજવી છે. આ ઉપરાંત સાઉદી અરેબિયાનો સાથ પણ પાકિસ્તાનને મળી રહ્યો છે, જેનાથી તેની ‘મોડરેટર’ તરીકેની છબી વધુ મજબૂત બની છે.
શહબાઝ શરીફનો સંદેશ: વડાપ્રધાન શરીફે સોશિયલ મીડિયા પ્લેટફોર્મ ‘X’ પર લખ્યું કે, “અમે હૃદયપૂર્વક આશા રાખીએ છીએ કે ‘ઈસ્લામાબાદ મંત્રણા’ કાયમી શાંતિ સ્થાપવામાં સફળ રહેશે. અમે બંને દેશોના નેતૃત્વનો આભાર માનીએ છીએ અને શુક્રવારે તેમના પ્રતિનિધિઓનું સ્વાગત કરવા આતુર છીએ.”
