વદાણી ગામની નયનાબેન શ્રીમાળી બન્યાં સ્વાવલંબનની મિસાલ, સખી મંડળથી ગૃહઉદ્યોગ સુધીની પ્રેરણાદાયી સફર

નાની બચતથી મોટી સફળતા સુધી, પાટણ જિલ્લામાં મહિલા સશક્તિકરણનું જીવંત ઉદાહરણ

પાટણ જિલ્લાના સરસ્વતી તાલુકાના વદાણી ગામના નયનાબેન અશ્વિનભાઈ શ્રીમાળી આજે “સખી મંડળ” અને સરકારની મહિલા સશક્તિકરણ યોજનાઓના પ્રતાપે સ્વાવલંબનનું ઉત્તમ ઉદાહરણ પૂરું પાડી રહ્યા છે. છેલ્લા સાત વર્ષથી “જય શ્રી સધી માં સખી મંડળ” સાથે જોડાયેલા નયનાબેને નાની બચતથી શરૂ કરેલી સફર આજે એક સફળ ગૃહઉદ્યોગમાં પરિવર્તિત થઈ છે. મંડળની ૧૫ થી ૨૦ બહેનો સાથે મળીને તેઓ સાબુ, ગુલાબજળ, પર્સ અને વિવિધ કોસ્મેટિક ઉત્પાદનો બનાવી રહ્યા છે.

તાલીમ અને ગુણવત્તાના સંગમથી બજારમાં જમાવી ધાક

જિલ્લા સ્તરે આયોજિત વિવિધ તાલીમ કાર્યક્રમોના કારણે નયનાબેનના ઉત્પાદનોની ગુણવત્તામાં નોંધપાત્ર સુધારો થયો છે. તાજેતરમાં નગરપાલિકા દ્વારા આયોજિત સાત દિવસીય મેળામાં તેમના સ્ટોલને અદભૂત પ્રતિસાદ મળ્યો હતો. મેળાના પ્રથમ દિવસે અંદાજે રૂ. ૫,૦૦૦ અને બીજા દિવસે રાત્રે ૧૦:૩૦ વાગ્યા સુધીમાં રૂ. ૯,૦૦૦ જેટલું માતબર વેચાણ નોંધાયું હતું. ગ્રાહકોના આ સકારાત્મક પ્રતિસાદથી મંડળની બહેનોમાં નવો આત્મવિશ્વાસ જાગ્યો છે.

ગૃહઉદ્યોગથી આર્થિક સમૃદ્ધિ તરફ પ્રયાણ

નયનાબેન પોતાની સફળતાનો શ્રેય સરકારની પ્રોત્સાહક નીતિઓ અને તાલીમ કાર્યક્રમોને આપે છે. તેમણે જણાવ્યું કે શરૂઆતમાં તેઓ મર્યાદિત સંસાધનો સાથે કામ કરતા હતા, પરંતુ યોગ્ય માર્ગદર્શન મળતા આજે તેઓ પાટણ શહેરમાં પોતાના ઉત્પાદનોનું સફળ વેચાણ કરી રહ્યા છે. આ આર્થિક પ્રવૃત્તિથી તેઓ પોતાના પરિવારના વિકાસમાં પણ મહત્વનું યોગદાન આપી રહ્યા છે. નયનાબેનની આ ગાથા સાબિત કરે છે કે જો યોગ્ય તક મળે તો ગ્રામ્ય મહિલાઓ પણ આત્મનિર્ભર બની સમાજમાં નવો માઇલસ્ટોન સ્થાપી શકે છે.