દેશના કરોડો ખેડૂતો માટે ખુશખબર: પીએમ કિસાન યોજના વધુ ૫ વર્ષ માટે લંબાવાઈ, ₹૩.૧૫ લાખ કરોડ મંજૂર
દેશના કરોડો ખેડૂતોને મોટી રાહત આપતા કેન્દ્ર સરકારે એક અત્યંત મહત્વપૂર્ણ નિર્ણય લીધો છે. પ્રધાનમંત્રી કિસાન સન્માન નિધિ (પીએમ કિસાન યોજના) ને આગામી પાંચ વર્ષ માટે એટલે કે નાણાકીય વર્ષ ૨૦૩૦-૩૧ સુધી સતત ચાલુ રાખવાના પ્રસ્તાવને કેન્દ્રીય મંત્રીમંડળે લીલી ઝંડી આપી દીધી છે.
કેન્દ્રીય માહિતી અને પ્રસારણ મંત્રી અશ્વિની વૈષ્ણવે કેબિનેટના નિર્ણયો અંગે માહિતગાર કરતા જણાવ્યું હતું કે પ્રધાનમંત્રી નરેન્દ્ર મોદીના નેતૃત્વમાં મંત્રીમંડળે આ કલ્યાણકારી યોજના માટે આગામી પાંચ વર્ષમાં કુલ ₹૩.૧૫ લાખ કરોડના વિરાટ બજેટને મંજૂરી આપી છે. સરકારના આ નિર્ણયથી દેશના કરોડો નાના અને સીમાંત ખેડૂતોને આવનારા વર્ષોમાં પણ વાર્ષિક ₹૬,૦૦૦ ની સીધી નાણાકીય સહાય મળતી રહેશે.
પીએમ કિસાન યોજના શું છે અને કેવી રીતે મળે છે સહાય?
પ્રધાનમંત્રી કિસાન સન્માન નિધિ એ સંપૂર્ણપણે કેન્દ્ર સરકાર દ્વારા વિતપોષિત એક અગ્રણી કૃષિ કલ્યાણ યોજના છે. આ યોજનાનો મુખ્ય ઉદ્દેશ્ય દેશભરના આર્થિક રીતે નબળા અને જરૂરિયાતમંદ ખેડૂતોને બિયારણ, ખાતર તથા ખેતીની અન્ય જરૂરિયાતો પૂરી કરવા માટે સમયસર આર્થિક મદદ કરવાનો છે.
આ યોજના હેઠળ પાત્રતા ધરાવતા ખેડૂત પરિવારને દર વર્ષે ₹૬,૦૦૦ ની સહાય પૂરી પાડવામાં આવે છે. આ રકમ વર્ષ દરમિયાન દર ચાર મહિનાના અંતરાલ પર ₹૨,૦૦૦ ના ત્રણ સમાન હપ્તામાં સીધી જ ખેડૂતોના બેંક ખાતામાં (DBT દ્વારા) જમા કરાવવામાં આવે છે.
અત્યાર સુધી ૨૩ હપ્તા જારી, ૯.૪૯ કરોડથી વધુ ખેડૂતોને થયો લાભ
પીએમ કિસાન યોજના અંતર્ગત અત્યાર સુધીમાં સફળતાપૂર્વક ૨૩ હપ્તા દેશના પાત્ર ખેડૂતોના ખાતામાં સફળતાપૂર્વક ટ્રાન્સફર કરી દેવામાં આવ્યા છે. તાજેતરમાં જારી કરાયેલા ૨૩મા હપ્તા હેઠળ દેશભરના ૯.૪૯ કરોડથી વધુ ખેડૂતોને સીધો નાણાકીય લાભ મળ્યો હતો, જેમાં ₹૧૮,૯૮૪ કરોડથી વધુની રકમ એકસાથે ખેડૂતોના ખાતામાં જમા કરવામાં આવી હતી. આ યોજનાના કારણે ગ્રામીણ અર્થતંત્રને મજબૂત બળ મળ્યું છે.
ઓનલાઇન અરજી કેવી રીતે કરવી અને કયા દસ્તાવેજો જરૂરી?
નવા ખેડૂતો કે જેઓ આ યોજનાનો લાભ લેવા માંગે છે, તેઓ ખુબ જ સરળતાથી ઓનલાઇન નોંધણી કરાવી શકે છે:
૧. ઓનલાઇન અરજી: સત્તાવાર પોર્ટલ pmkisan.gov.in પર જઈને ‘New Farmer Registration’ વિકલ્પ પસંદ કરીને ફોર્મ ભરી શકાય છે.
૨. ઓફલાઇન અરજી: જો ઓનલાઇન શક્ય ન હોય તો સંબંધિત રાજ્યના કૃષિ વિભાગની ઓફિસ અથવા ગ્રામ પંચાયતમાં વિઝિટ કરીને પણ નોંધણી કરાવી શકાય છે.
જરૂરી દસ્તાવેજો: પીએમ કિસાન યોજનામાં અરજી કરવા માટે પ્રમુખ દસ્તાવેજોની જરૂર પડે છે:
-
ઓળખ માટે આધાર કાર્ડ (Aadhaar Card)
-
રકમ જમા કરાવવા માટે સક્રિય બેંક ખાતાની વિગતો
-
જમીનની માલિકી દર્શાવતા સત્તાવાર જમીન રેકોર્ડ્સ (૭/૧૨ અને ૮-અ ના ઉતારા)
લાભાર્થીનું સ્ટેટસ (Beneficiary Status) ચેક કરવાની પદ્ધતિ
જે ખેડૂતો પહેલાથી જ યોજનામાં જોડાયેલા છે તેઓ પોતાના હપ્તાની માહિતી અને સ્ટેટસ નીચે મુજબ ઘેરબેઠા ચેક કરી શકે છે:
-
સૌપ્રથમ સત્તાવાર વેબસાઇટ pmkisan.gov.in ની મુલાકાત લો.
-
હોમપેજ પર આપેલા ‘Farmers Corner’ વિભાગમાં જઈને ‘Beneficiary Status’ પર ક્લિક કરો.
-
ત્યાં તમારો નોંધાયેલ આધાર નંબર અથવા બેંક એકાઉન્ટ નંબર દાખલ કરો.
-
સબમિટ કરતાની સાથે જ તમને અત્યાર સુધી મેળવેલા હપ્તાઓનો હિસાબ અને આગામી હપ્તા માટેની પાત્રતાનું સ્ટેટસ સ્ક્રીન પર જોવા મળશે.
કેન્દ્ર સરકારના આ નિર્ણયથી દેશના કૃષિ ક્ષેત્રમાં સ્થિરતા આવશે અને મોસમી ખેતીના સમયે ખેડૂતોને સાહુકારો પાસે ઊંચા વ્યાજે લોન લેવામાંથી મુક્તિ મળશે.
