મધ્ય પૂર્વ સંકટ પર પીએમ મોદીનું ‘મિશન સુરક્ષા’; ૨૭ માર્ચે મુખ્યમંત્રીઓ સાથે બેઠક, ઉર્જા અને સપ્લાય ચેઈન પર ખાસ ભાર
પશ્ચિમ એશિયામાં ઈરાન, ઈઝરાયેલ અને અમેરિકા વચ્ચે વધતા જતા સૈન્ય સંઘર્ષની જ્વાળાઓ હવે વૈશ્વિક સ્તરે પ્રસરી રહી છે. આ ગંભીર પરિસ્થિતિને ધ્યાનમાં રાખીને પ્રધાનમંત્રી નરેન્દ્ર મોદીએ આવતીકાલે એટલે કે ૨૭ માર્ચના રોજ તમામ રાજ્યોના મુખ્યમંત્રીઓ સાથે એક હાઈ-લેવલ બેઠક બોલાવી છે. મહાઅષ્ટમીના પવિત્ર દિવસે લેવાયેલો આ નિર્ણય સૂચવે છે કે કેન્દ્ર સરકાર આગામી કોઈપણ કટોકટી સામે ‘ફુલ પ્રૂફ’ પ્લાનિંગ કરી રહી છે.
ઈરાન અને અમેરિકા વચ્ચેના વધતા તણાવ અને હોર્મુઝ સ્ટ્રેટમાં સર્જાયેલી યુદ્ધ જેવી સ્થિતિને પગલે ભારત સરકારે પોતાની આંતરિક સજ્જતા તેજ કરી દીધી છે. પ્રધાનમંત્રી નરેન્દ્ર મોદી ૨૭ માર્ચ, ૨૦૨૬ના રોજ સાંજે ૬:૩૦ વાગ્યે વીડિયો કોન્ફરન્સના માધ્યમથી દેશના વિવિધ રાજ્યોના મુખ્યમંત્રીઓ સાથે એક નિર્ણાયક બેઠક યોજશે. આ બેઠકમાં મધ્ય પૂર્વમાં ચાલી રહેલા સંઘર્ષની ભારતની અર્થવ્યવસ્થા અને સુરક્ષા પર થનારી સંભવિત અસરોની સમીક્ષા કરવામાં આવશે.
બેઠકના મુખ્ય ચાર મુદ્દાઓ: સુરક્ષાથી લઈને સપ્લાય ચેઈન સુધી
સૂત્રોના જણાવ્યા અનુસાર, પીએમ મોદી આ બેઠકમાં મુખ્યત્વે ચાર પાસાઓ પર ધ્યાન કેન્દ્રિત કરશે: ૧. નાગરિકોની સુરક્ષા: પશ્ચિમ એશિયાના વિવિધ દેશોમાં વસતા લાખો ભારતીયોની સલામતી અને જરૂર પડે તો તેમને પરત લાવવા (Evacuation) માટેની તૈયારીઓ. ૨. ઉર્જા જરૂરિયાતો: ઈંધણ અને LPG ના પુરવઠામાં કોઈ વિક્ષેપ ન પડે તે માટે રાજ્યો સાથે સંકલન. ૩. સપ્લાય ચેઈન: યુદ્ધને કારણે આયાત-નિકાસ ખોરવાય તો આવશ્યક ચીજવસ્તુઓના ભાવ ન વધે તે માટેનું આયોજન. ૪. આંતરિક સુરક્ષા: સરહદી રાજ્યો અને દરિયાકાંઠાના વિસ્તારોમાં હાઈ એલર્ટ અને સુરક્ષા વ્યવસ્થાની સમીક્ષા.
ચૂંટણીવાળા રાજ્યો માટે અલગ વ્યવસ્થા
જે રાજ્યોમાં હાલમાં વિધાનસભાની ચૂંટણીઓ યોજાવાની છે, ત્યાં આચારસંહિતા લાગુ હોવાથી તે રાજ્યોના મુખ્યમંત્રીઓ આ બેઠકમાં ભાગ લઈ શકશે નહીં. જોકે, વહીવટી કામગીરી ન અટકે તે માટે કેબિનેટ સચિવાલય દ્વારા તે રાજ્યોના મુખ્ય સચિવો (Chief Secretaries) સાથે એક અલગ ટેકનિકલ બેઠક યોજવામાં આવશે.
સર્વપક્ષીય બેઠકમાં વિપક્ષનો સાથ
આ અગાઉ ૨૫ માર્ચે યોજાયેલી સર્વપક્ષીય બેઠકમાં સરકારે વિપક્ષને વિશ્વાસમાં લીધો હતો. સંસદીય બાબતોના મંત્રી કિરેન રિજિજુએ જણાવ્યું હતું કે, ભારત હોર્મુઝ સ્ટ્રેટ જેવી સંવેદનશીલ જગ્યાએથી પણ પોતાના ચાર તેલના જહાજો સુરક્ષિત રીતે લાવવામાં સફળ રહ્યું છે. વિદેશ સચિવે આ બેઠકમાં એક વિગતવાર પ્રેઝન્ટેશન આપ્યું હતું, જેનાથી વિપક્ષી નેતાઓ પણ સરકારની વ્યૂહરચનાથી સંતુષ્ટ જણાયા હતા.
પેટ્રોલિયમ અને LPG પુરવઠો સંપૂર્ણ સુરક્ષિત
કેન્દ્ર સરકારે ફરી એકવાર દેશવાસીઓને આશ્વાસન આપ્યું છે કે ભારત પાસે પૂરતો તેલ અને ગેસનો સ્ટોક છે. હોર્મુઝનો રસ્તો ભારત જેવા મિત્ર દેશો માટે ખુલ્લો હોવાના ઈરાનના નિવેદન બાદ ભારતની સ્થિતિ વધુ મજબૂત બની છે. આવતીકાલની બેઠકમાં પીએમ મોદી રાજ્યોને સૂચના આપી શકે છે કે તેઓ મોંઘવારી અટકાવવા અને સંગ્રહખોરી રોકવા માટે અત્યારથી જ કડક પગલાં ભરે.
ભારત માટે આ સમય ‘વોકલ ફોર લોકલ’ અને ‘આત્મનિર્ભરતા’ની સાચી કસોટીનો છે. ૨૭ માર્ચની બેઠક એ વાતનું પ્રતીક છે કે ભારત માત્ર સરહદો પર જ નહીં, પણ આર્થિક મોરચે પણ કોઈપણ વૈશ્વિક સંકટનો સામનો કરવા સક્ષમ છે.
