પોરબંદર બ્લુ ઈકોનોમીની ક્રાંતિમાં ગુજરાતનું આગવું કેન્દ્ર બની રહ્યું છે

મત્સ્ય નિકાસ અને હાઈ-ટેક પ્રોસેસિંગથી પોરબંદરનું અર્થતંત્ર મજબૂત બન્યું

ગુજરાત સરકારના ‘બ્લુ ઈકોનોમી’ વિઝન હેઠળ પોરબંદર હવે માત્ર યાત્રાધામ નહીં, પરંતુ આંતરરાષ્ટ્રીય મત્સ્ય નિકાસનું કેન્દ્રબિંદુ બની ગયું છે. અરબી સમુદ્રના કિનારે વસેલા આ જિલ્લામાં મત્સ્ય ઉત્પાદન અને પ્રોસેસિંગ ક્ષેત્રે થયેલો વિકાસ પોરબંદરના અર્થતંત્રને નવી ઊંચાઈએ લઈ જઈ રહ્યો છે. MPEDA ના માર્ગદર્શન હેઠળ અહીંની અગ્રણી પેઢીઓ યુરોપ, એશિયા અને અમેરિકા જેવા દેશોમાં ઉચ્ચ ગુણવત્તાયુક્ત સી-ફૂડની નિકાસ કરી રહી છે.

વનાણા GIDC: મત્સ્ય ઉદ્યોગનું નવું સરનામું

જિલ્લાનો વનાણા GIDC વિસ્તાર હવે મત્સ્ય ઉદ્યોગ માટેના ‘હબ’ તરીકે વિકસી રહ્યો છે. અહીં માત્ર માછલી પકડવામાં જ નથી આવતી, પરંતુ આધુનિક ટેકનોલોજી દ્વારા તેનું મૂલ્યવર્ધન (Value Addition) પણ કરવામાં આવે છે:

• હાઈ-ટેક પ્રોસેસિંગ: અત્યાધુનિક કોલ્ડ સ્ટોરેજ અને પ્રોસેસિંગ યુનિટ્સ દ્વારા દરિયાઈ ઉત્પાદનોની ગુણવત્તા જળવાય છે.

• વેસ્ટમાંથી બેસ્ટ: ફિશ મીલ અને ઓઈલ એકમો દ્વારા નકામા ગણાતા ભાગોમાંથી પણ નિકાસલક્ષી ઉત્પાદનો તૈયાર થાય છે.

• નવો ટ્રેન્ડ: આંતરરાષ્ટ્રીય બજારની માંગ મુજબ ‘રેડી-ટુ-ઈટ’ અને ‘રેડી-ટુ-કૂક’ પ્રોડક્ટ્સ પર વિશેષ ભાર મૂકવામાં આવી રહ્યો છે.

પોરબંદરની મત્સ્ય વિવિધતા અને ઉત્પાદન

મદદનીશ મત્સ્યોદ્યોગ નિયામક શ્રી કે. એમ. સીકોતરીયાના જણાવ્યા અનુસાર, પોરબંદરમાં વાર્ષિક ૮૮,૦૦૦ મેટ્રિક ટન મત્સ્ય ઉત્પાદન થાય છે. અહીંની મુખ્ય પેદાશોમાં નીચે મુજબની વિવિધતા જોવા મળે છે:

• માછલીઓ: રીબન ફિશ, ટ્યુના, મેકરલ, રાની ફિશ, પાપલેટ, હિલ્સા, શાર્ક અને સિલ્વર ફિશ.

• ઝીંગા: ટાઈગર ઝીંગા, લોબસ્ટર, સ્મોલ અને મિડિયમ ઝીંગા.

વાઈબ્રન્ટ ગુજરાત અને ભાવિ રોકાણ

રાજકોટ ખાતે યોજાનાર ‘વાઈબ્રન્ટ ગુજરાત રીજનલ કોન્ફરન્સ’માં બ્લુ ઈકોનોમી પર વિશેષ ધ્યાન આપવામાં આવ્યો છે. આ કોન્ફરન્સમાં મત્સ્યોદ્યોગ ક્ષેત્રે નવા MOU (સમજૂતી કરારો) કરવામાં આવશે, જેનાથી નવી ટેકનોલોજી અને રોકાણ પોરબંદર સુધી પહોંચશે. આ વિકાસથી હજારો માછીમાર પરિવારોની આર્થિક સ્થિતિ સુધરશે અને પ્રત્યક્ષ-પરોક્ષ રોજગારીની નવી તકો સર્જાશે.