પંજાબમાં વીજ ક્રાંતિ: મફત વીજળી આપવા છતાં વીજ વિભાગ નફામાં, CM ભગવંત માને ગણાવી સરકારની મોટી ઉપલબ્ધિઓ
પંજાબના મુખ્યમંત્રી ભગવંત માને ગર્વ સાથે જણાવ્યું કે પંજાબ વીજળી વિભાગે રાષ્ટ્રીય સ્તરે ‘A+’ રેટિંગ મેળવીને બીજું સ્થાન હાંસલ કર્યું છે. તેમણે કહ્યું કે તેમની સરકાર રાજ્યને વીજળી ક્ષેત્રે આત્મનિર્ભર બનાવવા અને લોકોને 24 કલાક મફત વીજળી આપવા માટે પ્રતિબદ્ધ છે. મુખ્યમંત્રીના મતે, પંજાબમાં અત્યારે 90 ટકા ઘરોમાં વીજળીનું બિલ ‘શૂન્ય’ આવી રહ્યું છે, જે એક ઐતિહાસિક ઘટના છે.
દેવામાં ડૂબેલો વિભાગ હવે નફામાં
મુખ્યમંત્રી માને અગાઉની સરકારો પર પ્રહાર કરતા કહ્યું કે, પહેલા સરકારી સંપત્તિઓ વેચવાની પરંપરા હતી, પરંતુ તેમની સરકારે 540 મેગાવોટનો ગોઇંદવાલ થર્મલ પાવર પ્લાન્ટ ખરીદીને નવી મિસાલ કાયમ કરી છે. તેમણે ઉમેર્યું કે 600 યુનિટ (બાય-મંથલી) મફત વીજળી આપવા છતાં વિભાગ હવે નફો કરી રહ્યો છે. ઔદ્યોગિક અને વ્યાપારી ગ્રાહકો માટે પણ ટેરિફમાં ઘટાડો કરવામાં આવ્યો છે, જેનાથી રાજ્યના આર્થિક વિકાસને વેગ મળ્યો છે.
વીજળીના માળખાને મજબૂત કરવા માટે નવા સબ-સ્ટેશનો અને ટ્રાન્સફોર્મર્સ નાખવામાં આવ્યા છે. આ ઉપરાંત, વીજ વિભાગમાં અત્યાર સુધીમાં 9,593 યુવાનોને સરકારી નોકરી આપવામાં આવી છે અને અન્ય 1,750 પદો પર ભરતી પ્રક્રિયા ચાલુ છે.
સિંચાઈ અને નહેરના પાણીમાં મોટો સુધારો
ખેતી ક્ષેત્રે થયેલા સુધારાઓ અંગે વાત કરતા ભગવંત માને જણાવ્યું કે, જ્યારે તેમણે સત્તા સંભાળી ત્યારે રાજ્યમાં સિંચાઈ માટે માત્ર 22 ટકા નહેરના પાણીનો ઉપયોગ થતો હતો, જે હવે વધીને 78 ટકા થઈ ગયો છે. આગામી ડાંગરની સીઝન સુધીમાં આ આંકડો 90 ટકા સુધી લઈ જવાનો લક્ષ્યાંક છે.
તેમણે એક રસપ્રદ માહિતી આપતા કહ્યું કે, ભાખડા નહેરની ક્ષમતા 9,500 ક્યુસેક હતી, જેને વધારીને 11,000 ક્યુસેક કરવામાં આવી છે. આ માટે એક ઇંચ જમીન પણ સંપાદિત કરવામાં આવી નથી, છતાં એક નવી નહેર જેવી ક્ષમતા ઊભી કરી દેવામાં આવી છે. આનાથી ખેડૂતોને પૂરતા પ્રમાણમાં પાણી મળી રહેશે અને ટ્યુબવેલ પરની નિર્ભરતા ઘટશે.
વીજ પુરવઠાનો નવો રેકોર્ડ
મુખ્યમંત્રીએ આંકડાકીય માહિતી આપતા જણાવ્યું કે પંજાબમાં વીજળીની માંગ સતત વધી રહી છે. 5 જૂન, 2025 ના રોજ પંજાબે 16,670 મેગાવોટની અત્યાર સુધીની સૌથી વધુ વીજળીની માંગને સફળતાપૂર્વક પૂરી કરી હતી. ખેડૂતોને ડાંગરની સીઝન દરમિયાન 8 કલાકથી વધુ અવિરત વીજ પુરવઠો આપવામાં આવ્યો છે અને 95 ટકા સપ્લાય દિવસના સમયે જ સુનિશ્ચિત કરવામાં આવ્યો છે, જેથી ખેડૂતોને રાત્રે ખેતરમાં જવું ન પડે.
યુવાનો માટે રોજગારીની તકો
રોજગારના મુદ્દે માને સ્પષ્ટ કર્યું કે એપ્રિલ 2022 થી અત્યાર સુધીમાં PSPCL અને PSTCL માં કુલ 9,593 કર્મચારીઓની ભરતી કરવામાં આવી છે. જેમાં 8,014 સીધી ભરતી અને 1,579 રહેમરાહે મળેલી નોકરીઓનો સમાવેશ થાય છે. વધુમાં, 1,750 જેટલા પદો પર ભરતીની પ્રક્રિયા જૂન 2026 સુધીમાં પૂર્ણ કરી લેવામાં આવશે.
