સ્પોર્ટ્સ જર્નાલિસ્ટ્સ એસોસિએશન ઓફ ગુજરાત દ્વારા મહિલા ખેલાડીઓના ઉત્કૃષ્ટ પ્રદાનને મળ્યું સન્માન
વિશ્વ મહિલા દિવસ ૨૦૨૬ની ઉજવણીના ભાગરૂપે સ્પોર્ટ્સ જર્નાલિસ્ટ્સ એસોસિએશન ઓફ ગુજરાત (SJAG) દ્વારા રમતગમત ક્ષેત્રે વિશિષ્ટ સિદ્ધિ મેળવનાર મહિલા ખેલાડીઓ માટે એવોર્ડ સમારોહનું આયોજન કરવામાં આવ્યું હતું. સ્પોર્ટ્સ ઓથોરિટી ઓફ ગુજરાતના સહયોગથી યોજાયેલા આ કાર્યક્રમમાં રાજ્યની પ્રતિભાશાળી મહિલા શક્તિને વિવિધ શ્રેણીમાં એવોર્ડ આપી નવાજવામાં આવી હતી. આ પ્રસંગે ઉપસ્થિત મહાનુભાવોએ ખેલાડીઓને પ્રોત્સાહિત કરતા જણાવ્યું હતું કે ગુજરાતની દીકરીઓ હવે મેદાનમાં પોતાનું કૌવત બતાવી વિશ્વ સ્તરે ડંકો વગાડી રહી છે.
ખેલ મહાકુંભથી ઓલિમ્પિક સુધીની મજલ
સ્પોર્ટ્સ ઓથોરિટી ઓફ ગુજરાતના ડિરેક્ટર જનરલ આઈ. આર. વાળાએ જણાવ્યું હતું કે વર્ષ ૨૦૧૦માં નરેન્દ્રભાઈ મોદીએ શરૂ કરેલો ‘ખેલ મહાકુંભ’ આજે રમતગમતનું વટવૃક્ષ બન્યો છે. છેલ્લા ખેલ મહાકુંભમાં નોંધાયેલા ૭૨ લાખ રમતવીરોમાંથી ૨૯ લાખ મહિલાઓ હતી, જે રાજ્યમાં રમત પ્રત્યે વધતી જાગૃતિ દર્શાવે છે. સરકાર દ્વારા ‘ઇન-સ્કૂલ’ જેવી યોજનાઓ હેઠળ ખેલાડીઓના રહેવા-જમવા અને તાલીમનો ખર્ચ ઉઠાવવામાં આવે છે. ૨૦૩૬ના ઓલિમ્પિકને ધ્યાનમાં રાખીને ગુજરાતના ખેલાડીઓ ટોપ-૧૦માં સ્થાન મેળવે તે માટે સરકાર અને વાલીઓના સહિયારા પ્રયાસો પર ભાર મૂકવામાં આવ્યો હતો.
મહિલા સશક્તિકરણ અને માનસિક સ્વાસ્થ્યનું મહત્વ
જાણીતા ઈન્ફ્લુએન્સર સપના વ્યાસે મહિલાઓને પ્રોત્સાહિત કરતા એક મહત્વનો સંદેશ આપ્યો હતો કે સ્ત્રીઓએ એકબીજાનો હાથ પકડીને આગળ વધવું જોઈએ. આજના સ્પર્ધાત્મક યુગમાં માનસિક સ્વાસ્થ્ય જાળવવા માટે મજબૂત મિત્રતા કેળવવી અનિવાર્ય છે. એસોસિએશનના પ્રમુખ તુષાર ત્રિવેદીએ ઉમેર્યું કે છેલ્લા ૧૫ વર્ષથી SJAG ખેલાડીઓની સિદ્ધિઓને લોકો સુધી પહોંચાડે છે. આ એવોર્ડ સમારોહનો મુખ્ય ઉદ્દેશ્ય એ છે કે કોઈ પણ પ્રતિભાશાળી મહિલા ખેલાડી યોગ્ય સન્માનથી વંચિત ન રહી જાય.
અત્યાધુનિક સુવિધાઓ અને પ્રતિષ્ઠિત એવોર્ડ્સ
મુખ્યમંત્રી ભૂપેન્દ્ર પટેલના માર્ગદર્શન હેઠળ નારણપુરામાં વીર સાવરકર સ્પોર્ટ્સ સ્ટેડિયમ જેવી આંતરરાષ્ટ્રીય સ્તરની સુવિધાઓ તૈયાર કરવામાં આવી છે, જે ગ્રામીણ અને શહેરી ખેલાડીઓ માટે ખૂબ જ ઉપયોગી સાબિત થશે. સમારોહ દરમિયાન ‘ઇમરજિંગ પ્લેયર ઓફ ગુજરાત’, ‘પ્રાઈડ ઓફ ગુજરાત’ અને ‘લાઇફટાઇમ અચીવમેન્ટ’ જેવા પ્રતિષ્ઠિત એવોર્ડ્સ એનાયત કરવામાં આવ્યા હતા. આ કાર્યક્રમમાં વરિષ્ઠ પત્રકારો અને વિવિધ રમતગમત એસોસિએશનના પ્રતિનિધિઓ મોટી સંખ્યામાં ઉપસ્થિત રહી મહિલા ખેલાડીઓના ઉત્સાહમાં વધારો કર્યો હતો.
