મીઠાઈ ખાધા પછી પણ બ્લડ સુગર રહેશે કંટ્રોલમાં! જાણો ડૉક્ટરની આ ખાસ ‘સીક્રેટ’ ટ્રિક્સ

મીઠાઈ ખાવાના શોખીન છો પણ બ્લડ શુગર વધવાનો ડર છે? અપનાવો એક્સપર્ટ્સની આ અસરકારક રીતો

અવારનવાર તહેવારો કે પાર્ટીઓ દરમિયાન મીઠાઈ જોઈને પોતાને રોકવા મુશ્કેલ બની જાય છે, પરંતુ ડાયાબિટીસ અને પ્રી-ડાયાબિટીસના દર્દીઓ માટે આ ‘બ્લડ શુગર સ્પાઈક’ (લોહીમાં શર્કરાનું અચાનક વધવું) નું મોટું કારણ બની શકે છે. જોકે, નિષ્ણાતોનું કહેવું છે કે ભોજન કરવાની રીત અને ત્યારપછીની આદતોમાં નાના ફેરફારો કરીને તમે તમારા શુગર લેવલને નોંધપાત્ર રીતે નિયંત્રિત રાખી શકો છો.

1. ભોજનનો સાચો ક્રમ (Food Sequencing) અપનાવો

સંશોધન મુજબ, ભોજનમાં ખાદ્ય પદાર્થોનો ક્રમ ખૂબ જ મહત્વપૂર્ણ છે. નિષ્ણાતો સલાહ આપે છે કે તમારી પ્લેટમાં સૌથી પહેલા ફાઈબરયુક્ત શાકભાજી (જેમ કે સલાડ કે બ્રોકોલી) ખાઓ, ત્યારબાદ પ્રોટીન અને ફેટ (જેમ કે ચિકન, માછલી કે પનીર) લો, અને અંતે કાર્બોહાઇડ્રેટ (જેમ કે ભાત, રોટલી કે મીઠાઈ) નું સેવન કરો. આ ક્રમ કાર્બોહાઇડ્રેટના શોષણને ધીમું કરી દે છે, જેનાથી ભોજન પછી શુગર લેવલ અચાનક વધતું નથી.

2. મીઠાઈ ખાવાના પણ છે નિયમો

ડૉ. ગગનદીપ સિંહના જણાવ્યા અનુસાર, મીઠાઈ ક્યારેય ખાલી પેટે કે ભોજન પહેલાં ન ખાવી જોઈએ, પરંતુ તેને ભોજનના અંતે રાખવી જોઈએ. આ પાછળનું કારણ એ છે કે પહેલાં ખાધેલા શાકભાજી અને પ્રોટીન ‘મેટાબોલિક બફર’ તરીકે કામ કરે છે. આ ઉપરાંત:

• સાધારણ ચોકલેટના બદલે ડાર્ક ચોકલેટ (ખાસ કરીને 90%) પસંદ કરો.
• મીઠાઈમાં ખાંડને બદલે ગોળ, મધ અથવા સ્ટીવિયા (Stevia) જેવા કુદરતી વિકલ્પોનો ઉપયોગ કરો.
• ઘરે ઓછી ગ્લાયસેમિક ઇન્ડેક્સ (Low GI) વાળી મીઠાઈઓ જેવી કે મખાનાના લાડુ અથવા ડ્રાય ફ્રૂટ્સના લાડુ બનાવીને ખાઓ.

3. જમ્યા પછી ’15 મિનિટ’નો જાદુ

ભોજન કે મીઠાઈ ખાધા પછી તરત જ સૂઈ જવાની કે બેસી રહેવાની ભૂલ ન કરો. અભ્યાસો દર્શાવે છે કે જમ્યા પછી 15 થી 30 મિનિટ સુધી હળવું ચાલવાથી સ્નાયુઓ વધારાના ગ્લુકોઝનો ઉપયોગ કરી લે છે, જેનાથી શુગર સ્પાઈક અટકી જાય છે. અત્યંત હળવી શારીરિક પ્રવૃત્તિ પણ ઇન્સ્યુલિનની સંવેદનશીલતામાં સુધારો કરી શકે છે.

ભાજપને મોટો ઝટકો! કે. અન્નામલઈએ પાર્ટીની પ્રાથમિક સદસ્યતા છોડી, જાણો શું છે મામલો?

બેંકમાં નોકરીની મોટી તક! SBIએ 7,150 પદોની ભરતી માટે વધારી છેલ્લી તારીખ

4. હાઇડ્રેશન અને રસોડાના નુસખાઓ

વધારે મીઠાઈ ખાધા પછી શરીરને હાઇડ્રેટેડ રાખવું ખૂબ જ જરૂરી છે. આ માટે પાણીની સાથે કાકડી, તરબૂચ અને દહીં જેવી વસ્તુઓનું સેવન કરો. કેટલાક સંશોધનો એવું પણ સૂચવે છે કે રોજિંદા 3 થી 6 ગ્રામ તજનું સેવન શુગર લેવલ સંતુલિત રાખવામાં મદદ કરે છે. આ ઉપરાંત, ભોજન પહેલાં પાણીમાં મિક્સ કરેલું એપલ સાઇડર વિનેગર લેવું પણ ગ્લુકોઝના સ્તરને ઘટાડવામાં અસરકારક સાબિત થયું છે.

નિષ્ણાતની સલાહ: જો તમને કોઈ ગંભીર સ્વાસ્થ્ય સમસ્યા હોય, તો આહારમાં કોઈ મોટો ફેરફાર કરતા પહેલા તમારા ડોક્ટરની સલાહ ચોક્કસ લો.