Raghav Chadha ‘ક્રોસિનથી કેન્સરનો ઈલાજ શક્ય નથી’, સંસદમાં પેપર લીક વિરોધી કાયદા પર રાઘવ ચઢ્ઢાનું જોરદાર ભાષણ
Raghav Chadha દેશમાં સ્પર્ધાત્મક પરીક્ષાઓના પ્રશ્નપત્રો લીક થવાની વધતી જતી ઘટનાઓ વચ્ચે સંસદમાં “જાહેર પરીક્ષા (સુધારા) બિલ, ૨૦૨૬” પર એક મહત્વપૂર્ણ અને ગંભીર ચર્ચા યોજાઈ હતી. ચર્ચા દરમિયાન રાઘવ ચઢ્ઢાએ દેશના કરોડો વિદ્યાર્થીઓ અને વાલીઓનો અવાજ સંસદમાં બુલંદીથી ઉઠાવ્યો હતો.
તેમણે સ્પષ્ટ કર્યું હતું કે પેપર લીકની આ ગંભીર બીમારીનો ઉકેલ માત્ર વાણી-વર્તન કે રાજકીય નિવેદનોથી લાવી શકાય નહીં, પરંતુ તેના માટે અત્યંત મજબૂત કાયદાકીય અને સંસ્થાકીય માળખાની જરૂર હતી, જે આ નવા કાયદા દ્વારા અમલમાં આવી રહ્યું છે.
‘ક્રોસિનથી કેન્સર મટે નહીં, મીડિયા નિવેદનોથી પેપર લીક અટકે નહીં’
પોતાના સંબોધન દરમિયાન રાઘવ ચઢ્ઢાએ એક આકરો કટાક્ષ કરતા જણાવ્યું હતું કે, “જેમ કેન્સર જેવી ગંભીર બીમારીનો ઈલાજ માત્ર ક્રોસિનની ગોળીથી શક્ય નથી, તેવી જ રીતે પેપર લીક જેવા ઊંડા દૂષણનો ઈલાજ ફક્ત પ્રેસ કોન્ફરન્સ કે મીડિયા નિવેદનોથી થઈ શકે નહીં.”
તેમણે ઉમેર્યું કે વિદ્યાર્થીઓ દિવસ-રાત ૧૮-૧૮ કલાક અભ્યાસ કરે છે, પરંતુ જ્યારે કેમેરા ફોન, વોટ્સએપ કે ટેલિગ્રામ પર પીડીએફ દ્વારા રાતોરાત પેપર લીક થઈ જાય છે, ત્યારે લાખો વિદ્યાર્થીઓની વર્ષોની મહેનત, સપના અને ભવિષ્ય એક ક્ષણમાં રોળાઈ જાય છે.
આખો પરિવાર સંઘર્ષ કરે છે: વિદ્યાર્થીઓની પીડા વાજબી
Raghav Chadha NEET જેવી રાષ્ટ્રીય કક્ષાની પરીક્ષાઓનો ઉલ્લેખ કરતા તેમણે કહ્યું કે જ્યારે કોઈ વિદ્યાર્થી પરીક્ષાની તૈયારી કરે છે ત્યારે માત્ર તે એકલો નહીં પરંતુ તેનો આખો પરિવાર સંઘર્ષ કરતો હોય છે.
માતા પોતાની દૈનિક જરૂરિયાતો કાપે છે, પિતા પોતાની જીવનભરની બચત કોચિંગ, ટેસ્ટ સિરીઝ અને ભાડામાં ખર્ચી નાખે છે. વિદ્યાર્થીઓ કોટા, દિલ્હી, જયપુર, ચંદીગઢ કે પટના જેવા શહેરોમાં પોતાના પરિવારથી દૂર રહીને, તહેવારો અને ઊંઘનો ત્યાગ કરીને મહેનત કરે છે. પરંતુ પેપર લીક થવાથી માત્ર કાગળ નહીં, પરંતુ આખા પરિવારના સપનાઓ ચકનાચૂર થઈ જાય છે. વિદ્યાર્થીઓનો ગુસ્સો અને આક્રોશ સંપૂર્ણપણે વાજબી છે.
સરકારે લીધેલા આકરા પગલાં અને સુધારા
Raghav Chadha રાઘવ ચઢ્ઢાએ જણાવ્યું કે વિદ્યાર્થીઓની માંગણીઓ પર સરકારે તાત્કાલિક કાર્યવાહી કરી હતી. સમગ્ર મામલાની તપાસ CBI ને સોંપાઈ હતી અને સ્પેશિયલ ઇન્વેસ્ટિગેશન ટીમ (SIT) ની રચના કરીને માસ્ટરમાઇન્ડ સહિત ૧૩ લોકોની ધરપકડ કરવામાં આવી હતી.
I spoke for every young Indian who believes that honest effort deserves an honest opportunity.
With the passage of the Public Examinations Amendment Bill, 2026, India’s first ever Anti Paper Leak framework comes into effect.
Students spoke.
The Government listened.
Action… pic.twitter.com/2ri8BF3pVg— Raghav Chadha (@raghav_chadha) July 30, 2026
માત્ર ૭૫ દિવસની અંદર ફાસ્ટ ટ્રેક કોર્ટમાં ચાર્જશીટ દાખલ કરાઈ હતી. NTA ના ૪૭ અધિકારીઓને દૂર કરવામાં આવ્યા હતા, શિક્ષણ સચિવની બદલી કરાઈ હતી અને તત્કાલીન શિક્ષણ મંત્રીએ પણ નૈતિક જવાબદારી સ્વીકારી રાજીનામું આપ્યું હતું. ભવિષ્યમાં લીકની શક્યતા નાબૂદ કરવા માટે હવે NEET પરીક્ષાઓ OMR શીટ્સને બદલે સંપૂર્ણપણે કમ્પ્યુટર બેઝ્ડ (CBT) લેવાની જોગવાઈ કરાઈ છે. આ સાથે જ નંદન નીલેકણી જેવા તજજ્ઞોની હાઇ-પાવર ટાસ્ક ફોર્સ પણ બનાવવામાં આવી છે.
નવા કાયદામાં ૧૦ વર્ષની જેલ અને ₹૧ કરોડનો દંડ
નવા કાયદાની વિશેષતાઓ દર્શાવતા તેમણે કહ્યું કે આ કાયદો કોઈ નાના ગુનેગારોને નહીં પરંતુ સમગ્ર સંગઠિત માફિયા નેટવર્કને નિશાન બનાવશે.
જો કોચિંગ સેન્ટર, પ્રિન્ટિંગ પ્રેસ, લોજિસ્ટિક્સ એજન્સીઓ, સોલ્વર ગેંગ કે પરીક્ષા પ્રક્રિયા સાથે જોડાયેલો કોઈ પણ અધિકારી આમાં સામેલ જણાશે, તો તેને ૧૦ વર્ષ સુધીની કડક જેલની સજા અને ₹૧ કરોડ સુધીના દંડની જોગવાઈ કરવામાં આવી છે. આ કાયદા હેઠળના તમામ ગુનાઓને બિન-જામીનપાત્ર બનાવવામાં આવ્યા છે, જેમાં ફાસ્ટ-ટ્રેક કોર્ટ દૈનિક સુનાવણી કરીને ૩ મહિનાની અંદર સજા સંભળાવશે.
‘રાજકારણ માટે નહીં, મેરિટ માટેની આ લડાઈ છે’
વિદ્યાર્થીઓને સલાહ આપતા રાઘવ ચઢ્ઢાએ કહ્યું કે વિદ્યાર્થીઓને વિરોધ કરવાનો અને પ્રશ્નો પૂછવાનો બંધારણીય અધિકાર છે, પરંતુ પોતાના આંદોલનને કોઈ રાજકીય પક્ષનો અખાડો બનવા દેવો જોઈએ નહીં.
તેમણે ભારપૂર્વક કહ્યું કે આ લડાઈ ભાજપ કે કોંગ્રેસ વિશે નથી, પરંતુ મેરિટ વિરુદ્ધ માફિયા અને સખત મહેનત વિરુદ્ધ સેટિંગ વિશે છે. પોતાના ભાષણના અંતે તેમણે ઉમેર્યું કે, “હું માત્ર હેડલાઇન્સ બનાવવા નહોતો માગતો, પરંતુ પરિણામ ઈચ્છતો હતો. તેથી જ્યારે સરકાર ખરેખર મજબૂત કાયદો લઈને આવી, ત્યારે જ મેં સંસદમાં બોલવાનું પસંદ કર્યું.”
