વિકસિત ગુજરાત@2047ના રોડમેપ અંતર્ગત દક્ષિણ ગુજરાતમાં ૩૮૩ કિમી માર્ગ વિકાસ માટે મોટો નિર્ણય
વડાપ્રધાન શ્રી નરેન્દ્રભાઈ મોદીના ‘વિકસિત ભારત @2047’ના સ્વપ્નને સાકાર કરવા માટે મુખ્યમંત્રી શ્રી ભૂપેન્દ્ર પટેલે ‘વિકસિત ગુજરાત @2047’નો રોડમેપ તૈયાર કર્યો છે. આ લક્ષ્યને પ્રાપ્ત કરવા માટે રાજ્ય સરકાર દ્વારા ‘ગુજરાત રાજ્ય ઈન્સ્ટિટ્યુશન ફોર ટ્રાન્સફોર્મેશન’ એટલે કે ગ્રીટ (GRIT) ની રચના કરવામાં આવી છે. આ સંસ્થા દ્વારા ઇન્ફ્રાસ્ટ્રક્ચર અને ઇનોવેશન જેવા પાસાઓ પર ધ્યાન આપીને લાંબાગાળાના વિકાસનું આયોજન કરવામાં આવ્યું છે. ગ્રીટનો મુખ્ય હેતુ રાજ્યના વિવિધ વિસ્તારોમાં આર્થિક વિકાસના કેન્દ્રો (ગ્રોથ હબ) વિકસાવીને ગુજરાતની અર્થવ્યવસ્થાને વધુ મજબૂત બનાવવાનો છે.
સુરત ઇકોનોમિક રિજિયન (SER): દક્ષિણ ગુજરાતના વિકાસ માટે રૂ. 1185 કરોડની ફાળવણી
ગ્રીટ દ્વારા રાજ્યમાં 6 મુખ્ય ગ્રોથ હબ નક્કી કરવામાં આવ્યા છે, જેમાં દક્ષિણ ગુજરાતના સુરત ઇકોનોમિક રિજિયન (SER) નો સમાવેશ થાય છે. આ રિજિયનમાં સુરત, ભરૂચ, નવસારી, વલસાડ, તાપી અને ડાંગ જિલ્લાઓનો સમાવેશ થાય છે, જે ગુજરાતના કુલ આર્થિક વિકાસમાં 35% થી વધુ યોગદાન આપે છે. આ વિસ્તારના રોડ ઇન્ફ્રાસ્ટ્રક્ચરને આધુનિક બનાવવા માટે મુખ્યમંત્રીશ્રીએ રૂ. 1185 કરોડના કામોને મંજૂરી આપી છે. આ રકમથી પાંચ જિલ્લાઓમાં કુલ 383 કિલોમીટર લંબાઈના 24 જેટલા રસ્તાઓનું નવીનીકરણ અને અપગ્રેડેશન કરવામાં આવશે, જે આખા પ્રદેશની આર્થિક ગતિવિધિઓને વેગ આપશે.
ઉદ્યોગો અને કૃષિ ક્ષેત્રે પરિવહન સુવિધામાં ક્રાંતિકારી ફેરફાર
આ માર્ગોના સુધારાથી દક્ષિણ ગુજરાતના મુખ્ય ઔદ્યોગિક હબ અને જી.આઈ.ડી.સી. વિસ્તારોની કનેક્ટિવિટી વધશે. ટેક્સટાઇલ, ડાયમંડ, કેમિકલ્સ અને પેટ્રોકેમિકલ્સ જેવા મોટા ઉદ્યોગોમાં માલસામાનની હેરફેર (લોજિસ્ટિક્સ) ઝડપી અને સસ્તી બનશે. આ ઉપરાંત, ખેડૂતો માટે પોતાની ખેત પેદાશો અને ડેરી ઉત્પાદનોને બજાર સુધી પહોંચાડવાનું સરળ બનશે. હજીરા પોર્ટ, સુગર ફેક્ટરી અને સુમુલ ડેરી જેવા એકમોને સીધો લાભ મળવાથી ગ્રામીણ અને શહેરી બંને અર્થતંત્રમાં સુધારો થશે, જે ‘અર્નિંગ વેલ – લિવિંગ વેલ’ ના સૂત્રને સાર્થક કરશે.
પ્રવાસન અને રોજગારીના નવા અવસરોનું સર્જન
દક્ષિણ ગુજરાતના પર્યટન સ્થળો જેવા કે સાપુતારા, શબરીધામ, સ્ટેચ્યુ ઓફ યુનિટી તરફ જતા રસ્તાઓ અને સંજાણની અગિયારી જેવા ઐતિહાસિક સ્થળોએ પહોંચવું હવે પ્રવાસીઓ માટે વધુ સુગમ બનશે. ઇન્ફ્રાસ્ટ્રક્ચરના આ વિકાસને કારણે માત્ર પરંપરાગત ઉદ્યોગો જ નહીં, પણ સેમિકન્ડક્ટર અને ગ્રીન હાઇડ્રોજન જેવા નવા ક્ષેત્રોમાં પણ રોકાણ વધશે. આનાથી સ્થાનિક યુવાનો માટે હજારોની સંખ્યામાં રોજગારીની નવી તકો ઊભી થશે. આમ, સુરત ઇકોનોમિક રિજિયન આગામી સમયમાં ગુજરાતની 3.5 ટ્રીલીયન ડોલરની અર્થવ્યવસ્થા બનાવવામાં મુખ્ય એન્જિન તરીકે કામ કરશે.
