પેન્શન, રોડ સેફટી અને સેવા સેતુ 2.0 મુદ્દે તાપી કલેક્ટરશ્રીની અધ્યક્ષતામાં વ્યાપક સમીક્ષા બેઠક
તાપી જિલ્લા કલેક્ટર ડો. વિપીન ગર્ગના નેતૃત્વમાં કલેક્ટર કચેરી ખાતે સંકલન સહ ફરિયાદ નિવારણ સમિતિની મહત્વની બેઠક યોજાઈ હતી. આ બેઠકમાં બારડોલીના સાંસદ પ્રભુભાઈ વસાવા પણ ખાસ હાજર રહ્યા હતા. કલેક્ટરશ્રીએ સરકારી વિભાગોમાં આવતી અરજીઓનો ઝડપથી નિકાલ કરવા અને નિવૃત્ત કર્મચારીઓના પેન્શનના કેસોમાં જરા પણ વિલંબ ન કરવા અધિકારીઓને કડક સૂચના આપી હતી. બેઠકનો મુખ્ય ઉદ્દેશ્ય સરકારી કામગીરીને વધુ વેગવંતી બનાવી લોકોની સમસ્યાઓ હલ કરવાનો હતો.
જર્જરિત મકાનો અને બિનઉપયોગી વાહનોના નિકાલ માટે આદેશ
વહીવટી પ્રક્રિયાને વધુ સુદૃઢ બનાવવા માટે કલેક્ટર ગર્ગે જૂના અને જોખમી બાંધકામોને તાત્કાલિક પાડી નાખવા તેમજ કચેરીઓમાં પડ્યા રહેતા નકામા વાહનોનો ઝડપથી નિકાલ કરવા જણાવ્યું હતું. આ ઉપરાંત, ‘સેવા સેતુ 2.0’ અંતર્ગત ચાલી રહેલા સર્વેની કામગીરીને સમયમર્યાદામાં પૂરી કરી સો ટકા લક્ષ્યાંક હાંસલ કરવા તાકીદ કરી હતી. જિલ્લામાં ઉઠતા નકારાત્મક સમાચારો અને જનતાની ફરિયાદો પર તાત્કાલિક પગલાં લેવા માટે પણ અધિકારીઓને સતર્ક કરવામાં આવ્યા હતા.
માર્ગ સલામતી: જૂના વાહનો પર રિફ્લેક્ટર લગાવવા સાંસદની અપીલ
બેઠકમાં રોડ સેફટીના મુદ્દે ગંભીર ચર્ચા કરવામાં આવી હતી. સાંસદ પ્રભુભાઈ વસાવાએ ચિંતા વ્યક્ત કરતા જણાવ્યું કે, રાત્રિના સમયે રિફ્લેક્ટર વગરના વાહનોને કારણે અકસ્માતોની સંખ્યા વધે છે. તેમણે આવા વાહનો પર રિફ્લેક્ટર લગાવવા અને શાળા-કોલેજોમાં વિદ્યાર્થીઓ માટે માર્ગ સલામતીના જાગૃતિ કાર્યક્રમો યોજવા પર ભાર મૂક્યો હતો. બેઠકમાં જિલ્લા વિકાસ અધિકારી અને અન્ય ઉચ્ચ વહીવટી અધિકારીઓએ પણ હાજર રહી વિકાસના કામોની સમીક્ષા કરી હતી.
