મગરમચ્છ કરતા કંટાળો વધુ ખતરનાક! ‘તુ યા મૈં’ માં આદર્શ-શનાયાની જોડી નબળી સ્ક્રિપ્ટમાં ફસાઈ
બોલિવૂડમાં આજકાલ રિમેકનો દોર અટકવાનું નામ નથી લેતો. આ જ કડીમાં દિગ્દર્શક બિજોય નામ્બિયાર ફિલ્મ ‘તુ યા મૈં’ લઈને આવ્યા છે. ફિલ્મની શરૂઆતમાં જ મોટા અક્ષરોમાં લખેલું આવે છે કે આ થાઈ ફિલ્મ ‘The Pool’ પરથી ‘એડોપ્ટ’ કરવામાં આવી છે. હવે સીધેસીધું ‘રિમેક’ કહેવાને બદલે અંગ્રેજી શબ્દોમાં વાતને લપેટીને રજૂ કરવી એ મેકર્સની જૂની આદત છે. પરંતુ પ્રેક્ષકો હવે સમજદાર છે, તેમને ખબર છે કે ઓરિજિનલ ફિલ્મ યૂટ્યૂબ પર પહેલેથી જ ઉપલબ્ધ છે. સમસ્યા એ નથી કે આ રિમેક છે, સમસ્યા એ છે કે ઓરિજિનલ ફિલ્મ જે ૧ કલાક ૪૦ મિનિટની હતી, તેને ખેંચીને અહીં ૨ કલાક ૨૫ મિનિટની કરી દેવામાં આવી છે, જે દર્શકોની ધીરજની કસોટી કરે છે.
વાર્તા: ઇન્ફ્લુએન્સર, ઇશ્ક અને એક સ્વિમિંગ પૂલ
ફિલ્મની વાર્તા બે સોશિયલ મીડિયા ઇન્ફ્લુએન્સર્સની આસપાસ ફરે છે. શનાયા કપૂર (મિસ વેનિટી) ના ૨ મિલિયન ફોલોઅર્સ છે, જ્યારે આદર્શ ગૌરવ (એક લોકલ રેપર) પાસે માત્ર ૧૦ હજાર. બંને એક કોલેબોરેશન માટે મળે છે, તેમની વચ્ચે પ્રેમ પાંગરે છે અને પછી વાર્તામાં ટ્વિસ્ટ આવે છે. બંને એક ખાલી પડેલા ૨૦ ફૂટ ઊંડા સ્વિમિંગ પૂલમાં ફસાઈ જાય છે. મુશ્કેલી ત્યારે વધી જાય છે જ્યારે તેમની સાથે તે પૂલમાં એક ખૂંખાર મગરમચ્છ પણ આવી જાય છે. હવે પાણી વિનાના તે સિમેન્ટના ખાડામાંથી આ બંને કેવી રીતે બચશે અને મગરમચ્છનો સામનો કેવી રીતે કરશે, તે જ આ ફિલ્મનો સાર છે.
કેવી છે ફિલ્મ: ફર્સ્ટ હાફમાં ગીતો અને સેકન્ડ હાફમાં લોજિકનો અભાવ
ફિલ્મનો ફર્સ્ટ હાફ અત્યંત નિરાશાજનક છે. એવું લાગે છે કે ફિલ્મ સાથે જોડાયેલા દરેક વ્યક્તિને ગીતો બનાવવાનો શોખ જાગ્યો હતો અને તેમણે આખી ફિલ્મમાં જ્યાં જગ્યા મળી ત્યાં ગીતો ઠાંસી દીધા છે. એક મોટી ઇન્ફ્લુએન્સરને એક ‘છપરી’ જેવો દેખાતો છોકરો કેવી રીતે ગમી જાય છે, તેમની કેમેસ્ટ્રી બરાબર જામતી નથી. દર થોડી વારે આવતા ગીતો દર્શકોને ડરાવવાને બદલે ઇરિટેટ (કંટાળો) કરે છે.
સેકન્ડ હાફ માં અસલી વાર્તા એટલે કે સર્વાઈવલ ડ્રામા શરૂ થાય છે. જોકે, અહીં પણ દિગ્દર્શક બિજોય નામ્બિયાર આપણને તે ડર કે રોમાંચનો અનુભવ કરાવી શકતા નથી, જેની અપેક્ષા એક થ્રિલર ફિલ્મ પાસે હોય છે. ફિલ્મ ઘણી જગ્યાએ લોજિક (તર્ક) ને નેવે મૂકતી જણાય છે. ૨ કલાક ૨૫ મિનિટનો સમયગાળો ફિલ્મ માટે સૌથી મોટો દુશ્મન સાબિત થયો છે.
એક્ટિંગ: આદર્શ ગૌરવનું શાનદાર પર્ફોર્મન્સ અને શનાયાનું સરપ્રાઈઝ
એક્ટિંગ: આદર્શ ગૌરવનું શાનદાર પર્ફોર્મન્સ અને શનાયાનું સરપ્રાઈઝફિલ્મની એકમાત્ર મજબૂત કડી તેના મુખ્ય કલાકારો છે:
-
આદર્શ ગૌરવ: આદર્શે ફરી એકવાર સાબિત કર્યું છે કે તે ‘લાંબી રેસનો ઘોડો’ છે. મુંબઈના લોકલ રેપરના રોલમાં તેનો લુક, બોલી અને બોડી લેંગ્વેજ કમાલની છે. ફિલ્મની નબળી સ્ક્રિપ્ટને તેણે પોતાના ખભા પર ઉંચકવાનો પૂરો પ્રયાસ કર્યો છે.
-
શનાયા કપૂર: ‘નેપો કિડ’ હોવાને કારણે શનાયાને અવારનવાર ટ્રોલ કરવામાં આવે છે, પરંતુ આ ફિલ્મમાં તેણે પ્રશંસનીય કામ કર્યું છે. તેણે પોતાના પાત્રને પૂરી ઈમાનદારીથી ભજવ્યું છે અને આદર્શ સાથે તેની જોડી સ્ક્રીન પર ઠીક લાગે છે. ગ્લેમરસ હોવા છતાં તેણે પોતાનું ધ્યાન એક્ટિંગ પર કેન્દ્રિત રાખ્યું છે.
-
પારુલ ગુલાટી: પારુલ જેવી સક્ષમ અભિનેત્રીને એક નાના અને બિનજરૂરી રોલમાં જોવી ખટકે છે. આ રોલ ન તો તેના સ્તરનો હતો કે ન તો તે આમાં કંઈ ખાસ કરી શકી છે.
લેખન અને દિગ્દર્શન: બિજોય નામ્બિયાર થાપ ખાઈ ગયા!
હિમાંશુ શર્મા દ્વારા લખાયેલી આ વાર્તા ઘણી ખેંચાયેલી લાગે છે. બિજોય નામ્બિયાર, જેમની પાસેથી આપણે ‘શૈતાન’ અને ‘વઝીર’ જેવી ફિલ્મોની અપેક્ષા રાખીએ છીએ, તેઓ અહીં ફિક્કા સાબિત થયા છે. ફિલ્મનું ટ્રીટમેન્ટ ઘણું જ એવરેજ છે. કેટલાક દ્રશ્યો સિનેમેટિક રીતે સારા છે, પરંતુ તે આખી ફિલ્મને બચાવવા માટે પૂરતા નથી. ફિલ્મનું લોકેશન અને સિનેમેટોગ્રાફી ચોક્કસપણે આંખોને ગમે તેવી છે.
ફાઈનલ વર્ડિક્ટ: જોવી કે નહીં?
‘તુ યા મૈં’ એક અત્યંત સામાન્ય ફિલ્મ છે. જો તમે આદર્શ ગૌરવના બહુ મોટા ફેન હોવ અથવા શનાયા કપૂરનું ડેબ્યૂ (એક અલગ અંદાજમાં) જોવા માંગતા હોવ, તો જ થિયેટર તરફ જજો. અન્યથા, તમે આની ઓરિજિનલ ફિલ્મ ‘The Pool’ ઘરે બેઠા ઓછા સમયમાં જોઈ શકો છો.
