પાક સુરક્ષા અને આધુનિક ખેતી તરફ વડોદરા ખેડૂતનું મોટું પગલું, એક લાખ સહાયથી બદલાઈ પરિસ્થિતિ
વડોદરા જિલ્લાના વડોદરા તાલુકાના દોડકા ગામના પ્રગતિશીલ ખેડૂત મનોજભાઈ ભેલાલભાઈ રાઠોડે રાજ્ય સરકારની ‘મુખ્યમંત્રી પાક સંગ્રહ યોજના’નો લાભ લઈને પોતાની ખેતીને વધુ સુરક્ષિત અને આધુનિક બનાવી છે. ખેતર ગામથી દૂર હોવાને કારણે તૈયાર પાક અને મોંઘા સાધનોની સુરક્ષા માટે તેઓ સતત ચિંતિત રહેતા હતા, પરંતુ સરકારની ₹૧ લાખની આર્થિક સહાયથી નિર્મિત ગોડાઉને તેમની આ મોટી સમસ્યાનો કાયમી ઉકેલ લાવી દીધો છે.
સુરક્ષિત પાક સંગ્રહ અને સાધનોની જાળવણી
મનોજભાઈ પોતાના ખેતરમાં પ્રાકૃતિક પદ્ધતિથી કેળા, બટાકા, ઘઉં અને ધાણા-મેથી જેવા વૈવિધ્યસભર પાકોની ખેતી કરે છે. અગાઉ કાપણી પછી તૈયાર માલ ખુલ્લામાં રાખવો પડતો હતો, જેનાથી બગાડનો ભય રહેતો હતો. હવે નવા ગોડાઉનમાં તેઓ અનાજ અને કઠોળની સાથે ખાતર તેમજ પાવડા-કોદાળી જેવા ખેતીના સાધનો પણ સહેલાઈથી સાચવી શકે છે. આ સુવિધાથી પાકની ગુણવત્તા જળવાય છે અને ખેડૂતને બજારમાં સારો ભાવ મેળવવાની તક મળે છે.
ખેત મજૂરો માટે આશ્રયસ્થાન અને બહુલક્ષી ઉપયોગ
મનોજભાઈના જણાવ્યા મુજબ, આ ગોડાઉન માત્ર પાક સંગ્રહ માટે જ નહીં, પણ અન્ય રીતે પણ ઉપયોગી સાબિત થઈ રહ્યું છે. ચોમાસામાં અચાનક વરસાદ આવે કે ઉનાળાની કાળઝાળ ગરમી હોય, ત્યારે ખેતરમાં કામ કરતા મજૂરો માટે આ શેડ આરામ કરવા માટેનું ઉત્તમ આશ્રયસ્થાન બની રહે છે. સરકારના આ પ્રોત્સાહક અભિગમને કારણે ખેડૂતો હવે વધુ નિશ્ચિંત બનીને ખેતી કાર્યમાં ધ્યાન આપી રહ્યા છે.
ઓનલાઇન અરજી પ્રક્રિયા અને પારદર્શક સહાય
ખેડૂતો આ યોજનાનો લાભ લેવા માટે ગ્રામ પંચાયત મારફત અથવા આઈ-ખેડૂત (i-Khedut) પોર્ટલ પર ઓનલાઇન અરજી કરી શકે છે. મનોજભાઈએ પણ આ સરળ અને પારદર્શક પ્રક્રિયા દ્વારા જ સહાય મેળવી હતી. આ યોજનાનો મુખ્ય ઉદ્દેશ્ય ખેત પેદાશોનો બગાડ અટકાવી ખેડૂતોની આર્થિક સ્થિતિ મજબૂત કરવાનો છે, જે છેવાડાના ખેડૂતો સુધી સફળતાપૂર્વક પહોંચી રહ્યો છે.
