બાળ લગ્ન પ્રતિબંધક અધિનિયમ અને નશા મુક્તિ વિષય પર માર્ગદર્શન
વડોદરા જિલ્લાના ગામડાઓમાં બાળ લગ્ન જેવી કુરીતિઓ અટકાવવા અને વ્યસનમુક્ત સમાજ બનાવવા માટે ‘બાળ વિવાહમુક્ત ભારત’ અભિયાન તેજ બનાવવામાં આવ્યું છે. આ અભિયાનના ભાગરૂપે વડોદરા બાળ લગ્ન પ્રતિબંધક અધિકારીની કચેરી, જિલ્લા બાળ સુરક્ષા એકમ અને મિરેકલ ફાઉન્ડેશનના સંયુક્ત ઉપક્રમે ડેસર તાલુકા સેવા સદન ખાતે એક દિવસીય તાલીમનું આયોજન કરવામાં આવ્યું હતું. આ કાર્યક્રમમાં આંગણવાડી કાર્યકરોને સમાજમાં પરિવર્તન લાવવા માટે તૈયાર કરવામાં આવ્યા હતા.
ડેસર તાલુકાની પાયલોટ પ્રોજેક્ટ તરીકે પસંદગી
બાળકોની સુરક્ષા અને પરિવારને આર્થિક-સામાજિક રીતે મજબૂત બનાવવા માટે જિલ્લા મેજિસ્ટ્રેટ દ્વારા ડેસર તાલુકાને ‘પાયલોટ પ્રોજેક્ટ’ તરીકે પસંદ કરવામાં આવ્યો છે. આ તાલીમમાં આંગણવાડી કાર્યકરોને બાળકોના મૂળભૂત અધિકારો, ‘બાળ લગ્ન પ્રતિબંધક અધિનિયમ ૨૦૦૬’ ની કલમો અને સરકારની ‘મિશન વાત્સલ્ય’ યોજના વિશે ઊંડાણપૂર્વક સમજ આપવામાં આવી હતી. આ ઉપરાંત, નવી પેઢીને નશાની લતથી દૂર રાખવા માટેના ઉપાયો અંગે પણ ચર્ચા કરવામાં આવી હતી.
અધિકારીઓ અને કાર્યકરો દ્વારા સમાજ સુધારણાનો સંકલ્પ
આ તાલીમ કાર્યક્રમમાં જિલ્લા બાળ સુરક્ષા અધિકારી અમિત વસાવા, પ્રોટેક્શન ઓફિસર જીતેન્દ્ર મહેરિયા અને મિરેકલ ફાઉન્ડેશનના પ્રતિનિધિઓએ હાજર રહીને માર્ગદર્શન આપ્યું હતું. ડેસર તાલુકાના વિવિધ ગામોમાંથી આવેલી આંગણવાડી કાર્યકરોએ આ તાલીમમાં ઉત્સાહભેર ભાગ લીધો હતો. આ બહેનો હવે પોતાના ગામમાં જઈને વાલીઓને બાળ લગ્નના ગેરફાયદા સમજાવશે અને બાળકોના સુરક્ષિત ભવિષ્ય માટે કામ કરશે.
