GLPC યોજના હેઠળ સ્વસહાય જૂથો બન્યા મહિલાઓના આર્થિક સશક્તિકરણનું મજબૂત માધ્યમ
ભારત તહેવારોનો દેશ છે, જ્યાં દરેક ઉત્સવ પોતાની સાથે સ્વાદની નવી લિજ્જત લઈને આવે છે. આ તહેવારો માત્ર આનંદનું જ નહીં, પણ નાના ઉદ્યોગો અને ખાસ કરીને ગ્રામીણ મહિલાઓ માટે આર્થિક ઉન્નતિનું પણ સાધન બન્યા છે. ગુજરાત સરકારની જિલ્લા ગ્રામ વિકાસ એજન્સી હેઠળ કાર્યરત જી.એલ.પી.સી. યોજના આજે હજારો બહેનો માટે આશીર્વાદરૂપ સાબિત થઈ રહી છે. સ્વસહાય જૂથો દ્વારા મહિલાઓ ગૃહઉદ્યોગ અને કૌશલ્ય વિકાસના માધ્યમથી આત્મનિર્ભર બની રહી છે, જે તેમના પરિવારને આર્થિક રીતે સધ્ધર બનાવવામાં મદદરૂપ થાય છે.
વડોદરાના નર્મદપુરા ગામની સખીઓનું સાહસ
વડોદરા જિલ્લાના વાઘોડિયા તાલુકાના નર્મદપુરા ગામમાં આવેલું “કૃપા સખી મંડળ” મહિલા સ્વાવલંબનનું ઉત્કૃષ્ટ ઉદાહરણ પૂરું પાડે છે. છેલ્લા છ વર્ષથી કાર્યરત આ મંડળમાં ૧૦ બહેનો સાથે મળીને વિવિધ પ્રકારના નાસ્તા અને ફરસાણ બનાવવાનું કામ કરે છે. સરકાર તરફથી મળેલી ૬ લાખ રૂપિયાની કેશ ક્રેડિટ લોનની મદદથી આ બહેનોએ પોતાના ગૃહઉદ્યોગને પાંખો આપી છે. આર્થિક વ્યવહારની શિસ્ત જાળવવા માટે તેઓ દર મહિને નિયમિત બચત પણ કરે છે, જે મુશ્કેલીના સમયે કે વ્યવસાયના વિસ્તરણમાં કામ લાગે છે.
સ્વાદ અને ગુણવત્તાનો અનોખો સંગમ
મંડળના પ્રમુખ જયશ્રીબેન ચૌહાણના નેતૃત્વમાં બહેનો ઓર્ડર મુજબ તાજો, સ્વચ્છ અને સ્વાદિષ્ટ નાસ્તો તૈયાર કરે છે. ખાસ કરીને હોળી જેવા તહેવારોમાં ઘઉંની સેવ, થેપલા, ફરસીપુરી અને શક્કરપારાની ખૂબ જ માંગ રહે છે. ગ્રાહકોને ઘર જેવો સ્વાદ મળતો હોવાથી તેઓ હોંશે હોંશે અહીંથી ખરીદી કરે છે. તહેવારોની મોસમમાં ઉત્પાદનમાં વિવિધતા લાવીને બહેનો વધારાની આવક મેળવે છે. આ રીતે ઘરની જવાબદારીઓ સંભાળવાની સાથે તેઓ વ્યવસાયિક કુશળતાનો ઉપયોગ કરીને પોતાના પગ પર ઉભી રહી છે.
સહયોગ અને સામાજિક ગૌરવની પ્રાપ્તિ
બહેનોની આ સફળતામાં માત્ર સરકારી સહાય જ નહીં, પરંતુ એપોલો (Apollo) જેવી જાણીતી કંપનીઓનો પણ મહત્વનો ફાળો રહ્યો છે. આવી સંસ્થાઓ દ્વારા મળેલી તાલીમ અને સાધન સામગ્રીના કારણે મહિલાઓ વધુ આત્મવિશ્વાસ સાથે કામ કરી રહી છે. આજે સખી મંડળની બહેનો પોતાની મહેનતથી કમાણી કરીને પરિવારનું સંચાલન કરી રહી છે અને સમાજમાં સન્માનજનક સ્થાન પ્રાપ્ત કર્યું છે. આ સફળતા ગાથા અન્ય ગ્રામીણ મહિલાઓ માટે પણ પ્રેરણારૂપ છે કે જો ઈચ્છાશક્તિ હોય તો ગૃહઉદ્યોગ દ્વારા પણ ઉજ્જવળ ભવિષ્ય બનાવી શકાય છે.
