વૈભવ સૂર્યવંશીના શાનદાર ફોર્મ બાદ BCCI પાસે મોટી માંગ, ઇંગ્લેન્ડ પ્રવાસ માટે અપીલ

વૈભવ સૂર્યવંશીનો આક્રમક અંદાજ: 15 વર્ષના યુવાને IPL માં મચાવી ધૂમ, માઈકલ વૉને કરી ભારતની સિનિયર ટીમમાં પસંદ કરવાની માંગ

ભારતીય ક્રિકેટમાં જ્યારે પણ કોઈ નવું ટેલેન્ટ આવે છે ત્યારે આખી દુનિયાની નજર તેના પર ટકેલી હોય છે, પરંતુ વૈભવ સૂર્યવંશી નામના 15 વર્ષના આ કિશોરે જે રીતે આઈપીએલ 2026 (IPL 2026) માં એન્ટ્રી કરી છે, તેણે દિગ્ગજોને પણ વિચારતા કરી દીધા છે. ગુવાહાટીમાં ચેન્નાઈ સુપર કિંગ્સ (CSK) સામે રમાયેલી મેચમાં વૈભવે માત્ર 17 બોલમાં 52 રન ફટકારીને સાબિત કરી દીધું કે ઉંમર માત્ર એક આંકડો છે. તેની આ ઈનિંગ બાદ ઇંગ્લેન્ડના પૂર્વ કેપ્ટન માઈકલ વૉન એટલા પ્રભાવિત થયા છે કે તેમણે BCCI ને વૈભવને તાત્કાલિક ઇંગ્લેન્ડ પ્રવાસ માટે ભારતીય ટીમમાં સામેલ કરવાની અપીલ કરી છે.

યશસ્વી જયસ્વાલ સાથેની અતૂટ ભાગીદારી

રાજસ્થાન રોયલ્સ તરફથી ઓપનિંગમાં ઉતરેલા વૈભવ સૂર્યવંશીએ તેના સિનિયર પાર્ટનર યશસ્વી જયસ્વાલ સાથે 75 રનની તોફાની ભાગીદારી કરી હતી. રસપ્રદ વાત એ છે કે, આ ભાગીદારીમાં મોટાભાગના રન વૈભવના બેટથી આવ્યા હતા. જયસ્વાલે એક છેડો સાચવી રાખ્યો હતો (36 બોલમાં 38 રન), જ્યારે વૈભવે મેદાનની ચારેબાજુ છગ્ગાનો વરસાદ કર્યો હતો. મેચ પછી વૈભવે ખુલાસો કર્યો કે ખુદ જયસ્વાલે જ તેને કહ્યું હતું કે, “તું જે રીતે બોલને ટાઈમ કરી રહ્યો છે, બસ સિક્સર મારવાનું ચાલુ રાખ, સિંગલ-ડબલની ચિંતા ન કર.”

માઈકલ વૉનની મોટી ભવિષ્યવાણી

માઈકલ વૉને ક્રિકબઝ પર વાત કરતા કહ્યું કે, વૈભવની બેટિંગ જોઈને એવું લાગતું હતું કે તેણે અનુભવી જયસ્વાલ પાસેથી પણ લાઈમલાઈટ છીનવી લીધી છે. વૉને કહ્યું, “જો હું ભારતીય ક્રિકેટ બોર્ડ હોઉં, તો હું વૈભવને આગામી ઇંગ્લેન્ડના વ્હાઈટ-બોલ પ્રવાસ પર ચોક્કસ લઈ જાઉં. ભલે તેને પ્લેઈંગ ઈલેવનમાં જગ્યા ન મળે, પણ 15 વર્ષની ઉંમરે તેને ભારતીય ટીમના ડ્રેસિંગ રૂમનું વાતાવરણ અને સિનિયર ખેલાડીઓ સાથે રહેવાનો અનુભવ મળવો જોઈએ. તે રમવા માટે અત્યારે જ સક્ષમ છે, તેમાં મને કોઈ શંકા નથી.”

ટીમ ઈન્ડિયામાં એન્ટ્રી બાદ વૈભવ સૂર્યવંશીની રમત બદલાશે? હવે માત્ર ચોગ્ગા-છગ્ગા નહીં, આ હશે અસલી લક્ષ્ય!

અફઘાનિસ્તાન સામેની ટેસ્ટ પહેલાં ઓકિબ નબીની એન્ટ્રી, પણ મુખ્ય ટીમમાં કેમ નથી સ્થાન?

વૈભવ સૂર્યવંશીનું શાનદાર વર્ષ

છેલ્લા 365 દિવસ આ ડાબોડી બેટ્સમેન માટે સપના સમાન રહ્યા છે

1. U19 વર્લ્ડ કપ: ઇંગ્લેન્ડ સામેની ફાઈનલમાં માત્ર 80 બોલમાં 175 રન (15 ચોગ્ગા અને 15 છગ્ગા) ફટકારીને ભારતને એકલા હાથે વર્લ્ડ કપ જીતાડ્યો હતો.
2. વિદેશી ધરતી પર દબદબો: તેણે ઇંગ્લેન્ડ, ઓસ્ટ્રેલિયા અને દક્ષિણ આફ્રિકામાં અન્ડર-19 સ્તરે શાનદાર સદીઓ ફટકારી છે.
3. IPL માં ડેબ્યૂ: આઈપીએલની પોતાની પહેલી જ ઈનિંગમાં તેણે 155 કિમીની ઝડપે બોલિંગ કરતા બોલરોની જે રીતે ધોલાઈ કરી, તે જોઈને લાગે છે કે તે ‘સેકન્ડ-સીઝન સિન્ડ્રોમ’ જેવી વાતોથી ઘણો ઉપર છે.

કેમ ખાસ છે વૈભવ?

વૈભવ પાસે આધુનિક ક્રિકેટના તમામ શોટ્સ છે. તે માત્ર પાવર હિટિંગ જ નથી કરતો, પણ તેની પાસે બોલને ગેપમાં મારવાની અદભૂત આવડત પણ છે. વૉનના મતે, વૈભવની બેટિંગમાં જે આઝાદી જોવા મળે છે તે તેને અન્ય યુવા ખેલાડીઓથી અલગ પાડે છે. ખાસ કરીને 155 ની ઝડપે આવતા બોલ સામે તેનો આત્મવિશ્વાસ કાબિલ-એ-તારીફ છે.