કોર્ટ કાર્યવાહીથી ભાગીને રાહત ન મળી શકે: બોમ્બે હાઈકોર્ટની વિજય માલ્યાને આકરી ફટકાર
કિંગફિશર એરલાઇન્સના ભૂતપૂર્વ માલિક અને ભાગેડુ ઉદ્યોગપતિ વિજય માલ્યાએ સોશિયલ મીડિયા પર શ્રેણીબદ્ધ પોસ્ટ કરીને ફરી એકવાર પોતાની નિર્દોષતાનો દાવો કર્યો છે. માલ્યાએ આક્ષેપ કર્યો છે કે ભારતીય બેંકો અને તપાસ એજન્સીઓએ તેમની મૂળ લોન કરતાં બમણી રકમ વસૂલી લીધી હોવા છતાં તેમની સાથે મોટો અન્યાય કરવામાં આવી રહ્યો છે. આ ઉપરાંત, તેમણે દાવો કર્યો છે કે તેઓ ભારત પાછા ફરવાથી ભાગી રહ્યા નથી, પરંતુ યુકે (બ્રિટન) ના કાનૂની પ્રતિબંધોના કારણે તેમને દેશ છોડવાની પરવાનગી મળતી નથી.
ઓક્ટોબર ૨૦૨૫ માં કેન્દ્રીય નાણા રાજ્ય મંત્રી પંકજ ચૌધરીએ લોકસભામાં માહિતી આપી હતી કે ‘ભાગેડુ આર્થિક અપરાધી અધિનિયમ, ૨૦૧૮’ (FEOA) હેઠળ ૧૫ લોકોને ભાગેડુ જાહેર કરવામાં આવ્યા છે, જેમાં વિજય માલ્યા અને નીરવ મોદી મુખ્ય નામો છે. આ યાદી અને કાનૂની કાર્યવાહી સામે માલ્યાએ હવે સોશિયલ મીડિયા પર પોતાનો પક્ષ રજૂ કર્યો છે.
‘હું ૧૯૯૨ થી યુકેનો નિવાસી છું, ભારત સરકારે પોસ્ટર બોય બનાવ્યો’
પોતાની સફાઈ આપતાં વિજય માલ્યાએ જણાવ્યું કે, “જે લોકો મને ભાગેડુ કહે છે અને દાવો કરે છે કે હું ભારત પાછા ફરવાનો ઇનકાર કરું છું, તેમણે સત્ય જાણવાની જરૂર છે. હું ૧૯૯૨ થી યુનાઇટેડ કિંગડમનો કાયમી નિવાસી છું અને હાલમાં મને યુકે છોડવાથી કાનૂની રીતે પ્રતિબંધિત કરવામાં આવ્યો છે. ભારત સરકારે મને પોતાના રાજકીય અને પ્રચારાત્મક સ્વાર્થ માટે ‘પોસ્ટર બોય’ બનાવી દીધો છે અને મારી સાથે મોટો અન્યાય કર્યો છે.”
To all who believe in fair and proper accounting justice please see the following table. Do I still deserve the way I am berated by the media and referred to as a fraudster at the very outset of a journalist’s script ? Why not start asking when I will get my refund ? pic.twitter.com/oP80Ba5Nuw
— Vijay Mallya (@TheVijayMallya) September 8, 2026
દરમિયાન, વિદેશ મંત્રાલયે સ્પષ્ટપણે દોહરાવ્યું છે કે ભારત સરકાર વિદેશમાં છુપાયેલા તમામ ભાગેડુ આર્થિક ગુનેગારોને સ્વદેશ લાવીને કોર્ટ સમક્ષ ઊભા રાખવા માટે પૂર્ણપણે કટિબદ્ધ છે. કાનૂની પ્રક્રિયાઓ જટિલ હોવા છતાં એજન્સીઓ સતત પ્રયત્નશીલ છે.
ઈડીનું સોગંદનામું અને ૧૪,૧૩૧ કરોડની વસૂલાતનો દાવો
વિજય માલ્યાએ બોમ્બે હાઈકોર્ટમાં એન્ફોર્સમેન્ટ ડિરેક્ટોરેટ (ED) દ્વારા દાખલ કરવામાં આવેલા એક સોગંદનામાનો ફકરો શેર કરીને દાવો કર્યો છે કે, કોર્ટના આદેશ મુજબ ૬,૨૦૩ કરોડ રૂપિયાના દેવા સામે ઈડી અને બેંકોએ ૨૦૨૧ સુધીમાં ૧૪,૧૩૧.૬૦ કરોડ રૂપિયાથી વધુની સંપત્તિ જપ્ત કરીને વસૂલ કરી લીધી છે.
માલ્યાએ ઉમેર્યું કે, “કોર્ટ આદેશિત રકમ કરતાં બમણા પૈસા વસૂલ્યા પછી પણ પંચ વર્ષ વીતી જવા છતાં મને ‘છેતરપિંડી કરનાર’ કહેવામાં આવે છે. ઈડીએ મારી તમામ સંપત્તિ અને બેંક ખાતાઓ જપ્ત કરી લીધા હોવાથી હું સીધી ચૂકવણી કરી શક્યો નહોતો. ઈડીએ કિંગફિશરના કર્મચારીઓના પગાર માટે પણ મારી જપ્ત સંપત્તિમાંથી ૩૫૦ કરોડ રૂપિયાથી વધુ રકમ છોડી હતી. ટીકાકારોએ આ સ્વતંત્ર આંકડા તપાસવા જોઈએ.”
બોમ્બે હાઈકોર્ટની આકરી ફટકાર
બીજી તરફ, બોમ્બે હાઈકોર્ટે માલ્યાની દલીલોને ફગાવી દેતાં આકરા શબ્દોમાં ઠપકો આપ્યો હતો. મુખ્ય ન્યાયાધીશ ચંદ્રશેખરની અધ્યક્ષતાવાળી બેન્ચે માલ્યા દ્વારા ભાગેડુ આર્થિક અપરાધી કાયદાની માન્યતાને પડકારતી અરજી પર સુનાવણી કરતી વખતે સ્પષ્ટ કર્યું કે, જે વ્યક્તિ ભારતીય અદાલતોના અધિકારક્ષેત્રથી દૂર ભાગી રહી છે અને ઇરાદાપૂર્વક કોર્ટ કાર્યવાહી ટાળી રહી છે, તે આવી બંધારણીય રાહત મેળવવા માટે હકદાર નથી. કોર્ટે માલ્યાને ભારત પાછા ફરવા અંગે પોતાનું વલણ સ્પષ્ટ કરવા માટે અંતિમ તક આપી છે.
