મહિન્દ્રા સ્કોર્પિયો-N નવા અવતારમાં થશે લોન્ચ: જાણો શું બદલાશે અને ક્યારે આવશે માર્કેટમાં?
ભારતીય રસ્તાઓ પર રાજ કરનારી અને એસયુવી પ્રેમીઓની ફેવરિટ એવી મહિન્દ્રા સ્કોર્પિયો-N હવે ખૂબ જ ટૂંક સમયમાં નવા અને અપડેટેડ લુકમાં જોવા મળશે. તેના પાવરફુલ એન્જિન અને ઓફ-રોડિંગ ક્ષમતાને કારણે જાણીતી આ ગાડીમાં કંપની હવે ડિઝાઈનથી લઈને ફીચર્સ સુધીના અનેક મોટા ફેરફારો કરવા જઈ રહી છે.
લોન્ચિંગ અને અત્યાર સુધીની સફર
મહિન્દ્રાએ સ્કોર્પિયો-N ને પહેલીવાર જૂન 2022 માં લોન્ચ કરી હતી. તે જૂની સ્કોર્પિયોનું પ્રીમિયમ અને મોટું વર્ઝન હતું. લોન્ચ થયા પછી તેમાં કોઈ ખાસ ફેરફાર કરવામાં આવ્યા નહોતા, પરંતુ તેની સતત વધતી લોકપ્રિયતાને જોતા કંપની હવે 2026 મહિન્દ્રા સ્કોર્પિયો-N ફેસલિફ્ટ પર કામ કરી રહી છે. જોકે કંપનીએ હજુ કોઈ સત્તાવાર તારીખ જાહેર કરી નથી, પરંતુ અંદાજ છે કે તેને 2026 ના મધ્ય સુધીમાં માર્કેટમાં ઉતારવામાં આવી શકે છે.
નવો અને વધુ મજબૂત લુક
ટેસ્ટિંગ દરમિયાન જોવા મળેલી તસવીરો પરથી જાણવા મળ્યું છે કે નવી સ્કોર્પિયો-N તેનો સિગ્નેચર ‘મજબૂત બોડી લુક’ જાળવી રાખશે. ફેરફારની વાત કરીએ તો, તેના આગળના ભાગમાં નવી ડિઝાઈનની ગ્રિલ, અપડેટેડ હેડલેમ્પ્સ (નવી LED DRL સાથે) અને નવું બમ્પર જોવા મળશે. આ સિવાય તેમાં મોટા અને આકર્ષક એલોય વ્હીલ્સ પણ આપવામાં આવશે. ગાડીના કદમાં (લંબાઈ, પહોળાઈ અને વ્હીલબેઝ) કોઈ ફેરફારની શક્યતા નથી.
કેબિનમાં મળશે પ્રીમિયમ ફીચર્સ
નવી સ્કોર્પિયો-N ફેસલિફ્ટનું ઈન્ટિરિયર પહેલા કરતા વધુ આધુનિક અને લક્ઝરી હશે. તેમાં મોટી ટચસ્ક્રીન ઇન્ફોટેનમેન્ટ સિસ્ટમ, Harman Kardon ઓડિયો સિસ્ટમ (Dolby Atmos સાથે) અને પેનોરોમિક સનરૂફ જેવી સુવિધાઓ મળી શકે છે. આ ઉપરાંત, ડ્રાઈવર માટે ફૂલ ડિજિટલ TFT ઇન્સ્ટ્રુમેન્ટ ક્લસ્ટર અને મેમરી ફંક્શન ધરાવતી પાવર્ડ સીટ્સ પણ આ નવા મોડલનું આકર્ષણ બની શકે છે.
એન્જિન અને પાવરમાં શું હશે ખાસ?
એન્જિનના મામલે કંપની કોઈ ફેરફાર કરે તેવી શક્યતા ઓછી છે, કારણ કે વર્તમાન એન્જિન પહેલેથી જ ખૂબ શક્તિશાળી છે. તેમાં 2.2 લિટર ટર્બો ડીઝલ (જે 132PS થી 175PS સુધીની પાવર આપે છે) અને 2.0 લિટર ટર્બો પેટ્રોલ (200PS પાવર) એન્જિનનો વિકલ્પ ચાલુ રહેશે. ગ્રાહકોને 6-સ્પીડ મેન્યુઅલ અને 6-સ્પીડ ઓટોમેટિક ગિયરબોક્સના વિકલ્પો પણ પહેલાની જેમ જ મળતા રહેશે.
