ડિજિટલ યુગમાં ભાષા અવરોધ દૂર કરશે ‘ભાષિણી’: મંત્રી અર્જુન મોઢવાડિયાએ વર્કશોપમાં વ્યક્ત કર્યો વિશ્વાસ
ગુજરાત સરકારના વિજ્ઞાન અને પ્રૌદ્યોગિકી મંત્રી શ્રી અર્જુન મોઢવાડિયાની અધ્યક્ષતામાં ગાંધીનગર ખાતે ‘ભાષિણી રાજ્યમ – ગુજરાત ચેપ્ટર’ વિષય પર એક વિશેષ કાર્યશાળાનું આયોજન કરવામાં આવ્યું હતું. આ પ્રસંગે મંત્રીશ્રીએ સ્પષ્ટપણે જણાવ્યું હતું કે, આર્ટિફિશિયલ ઇન્ટેલિજન્સ (AI) આધારિત ‘ભાષિણી’ ટૂલ્સના માધ્યમથી હવે ભાષાના કારણે કોઈપણ નાગરિકનું કામ અટકશે નહીં. ડિજિટલ યુગમાં ભારતની ભાષાકીય વિવિધતાને જાળવી રાખીને અંગ્રેજી સહિતની વૈશ્વિક ભાષાઓનું સ્થાનિક બોલીમાં ભાષાંતર કરવું હવે અત્યંત સરળ બન્યું છે. આ પહેલથી સરકારી સેવાઓ અને માહિતી સામાન્ય જનતા સુધી તેમની જ ભાષામાં પહોંચશે.
‘અક્ષર દ્રષ્ટિ’ પોર્ટલનું લોન્ચિંગ અને જાપાનનું ઉદાહરણ
આ વર્કશોપ દરમિયાન મંત્રી શ્રી મોઢવાડિયાએ ‘અક્ષર દ્રષ્ટિ’ પોર્ટલ લોન્ચ કરીને જનતા માટે ખુલ્લું મૂક્યું હતું. તેમણે જાપાનનું પ્રેરણાદાયી ઉદાહરણ આપતા કહ્યું કે, ત્યાં તમામ સાઈન બોર્ડ અને વ્યવહારો પોતાની માતૃભાષામાં જ થાય છે. વડાપ્રધાન શ્રી નરેન્દ્ર મોદીના ‘ડિજિટલ ઇન્ડિયા’ અભિયાન હેઠળ વિકસિત ભાષિણી ટૂલ્સથી હવે ગુજરાત સરકારના પરિપત્રો અને વેબસાઈટને ગુજરાતીમાં ઉપલબ્ધ કરાવી શકાશે. આનાથી શિક્ષણ ક્ષેત્રે પણ મોટી ક્રાંતિ આવશે, કારણ કે વિદ્યાર્થીઓ જટિલ વિષયોને પોતાની ભાષામાં વધુ સારી રીતે સમજી અને શીખી શકશે.
વહીવટી પારદર્શિતા અને ભવિષ્યની ડિજિટલ ઇકોસિસ્ટમ
ડિજિટલ ઇન્ડિયા ભાષિણી ડિવિઝનના CEO શ્રી અમિતાભ નાગે આ અવસરે લાઇવ ડેમો દ્વારા અંગ્રેજી સંબોધનનું ગુજરાતીમાં ત્વરિત ભાષાંતર કરી બતાવ્યું હતું. વિજ્ઞાન અને પ્રૌદ્યોગિકી સચિવ શ્રી પી. ભારતીએ જાહેરાત કરી હતી કે રાજ્ય સરકાર ટૂંક સમયમાં ‘ડીપ ટેક મિશન’ અમલમાં મૂકશે. આ ઉપરાંત, ગિફ્ટ સિટીમાં ‘AI સેન્ટર ઓફ એક્સેલન્સ’ અને ગાંધીનગરમાં અત્યાધુનિક ડેટા સેન્ટરની સ્થાપના કરવામાં આવશે, જે નાગરિકોની પ્રાઇવેસી અને ડેટા સુરક્ષા સાથે સર્વસમાવેશક સેવાઓ પૂરી પાડશે.
યુનિફાઇડ AI પોલિસી અને ‘ગોલ્ડન રેકોર્ડ’નું નિર્માણ
ગુજરાત ઇન્ફોર્મેટિક્સ લિમિટેડ (GIL) ના એમડી શ્રી અરવિંદ વિજયને જણાવ્યું હતું કે, વિવિધ સરકારી વિભાગો વચ્ચે સંકલન સાધવા માટે ‘યુનિફાઇડ AI પોલિસી’ તૈયાર કરવામાં આવશે. Gujarat Unified Data Stack (GUDS) હેઠળ એક જ પોર્ટલ પર નાગરિકોના ડેટાનો ‘ગોલ્ડન રેકોર્ડ’ તૈયાર થશે, જેથી સરકારી યોજનાઓના અમલીકરણમાં સચોટતા અને પારદર્શિતા વધશે. વર્કશોપમાં ‘ભાષિણી’ એપ મિત્ર, પ્રવક્તા અને કાનૂની પાસાઓ જેવા વિવિધ ટેકનિકલ સત્રોમાં નિષ્ણાતો દ્વારા ઊંડાણપૂર્વક માર્ગદર્શન આપવામાં આવ્યું હતું.
