યુદ્ધના ભણકારા વચ્ચે ઈરાનના સુપ્રીમ લીડરની ‘ખાસ વીંટી’: પેગંબર મૂસાના કિસ્સા સાથે અમેરિકાને શું આપ્યો સંકેત?
અમેરિકા દ્વારા સંભવિત હુમલાના જોખમ વચ્ચે ઈરાનના સર્વોચ્ચ નેતા અયાતુલ્લા અલી ખામેનેઈની એક તસવીર સામે આવી છે. આ તસવીરમાં તેમની વીંટી પર કુરાનની એક આયત લખેલી છે: “બિલકુલ નહીં! મારો ઈશ્વર (અલ્લાહ) મારી સાથે છે.” આ મેસેજ તેવા સમયે વાયરલ થયો છે જ્યારે અમેરિકાએ મિડલ ઈસ્ટમાં પોતાના બે યુદ્ધ જહાજો તૈનાત કર્યા છે. ખામેનેઈએ અગાઉ પણ ધમકી આપી હતી કે જો જરૂર પડશે તો ઈરાન આ જહાજોને દરિયામાં ડૂબાડી દેશે.
વીંટી પરની આયત અને પેગંબર મૂસાનો સંબંધ
ખામેનેઈની વીંટી પર જે આયત લખેલી છે તેનો સંદર્ભ કુરાનના ‘અલ સુરહ અશ-શુઅરા’ (26:62) સાથે છે. ઇસ્લામિક માન્યતા મુજબ, જ્યારે ક્રૂર શાસક ફિરઔનની સેનાએ પેગંબર મૂસા અને તેમના અનુયાયીઓને ઘેરી લીધા હતા, ત્યારે મૂસાએ આ શબ્દો ઉચ્ચાર્યા હતા. એવું કહેવાય છે કે તે સમયે પહાડ અને સમંદરની વચ્ચેથી રસ્તો નીકળ્યો હતો અને મૂસા સુરક્ષિત રીતે નીકળી ગયા હતા. આ આયતનો ઉપયોગ કરીને ખામેનેઈ એવો સંકેત આપી રહ્યા છે કે ગમે તેટલી શક્તિશાળી સેના (અમેરિકા) સામે હોય, ઈશ્વર તેમની સાથે છે.
શા માટે વધ્યો છે અમેરિકા-ઈરાન વચ્ચે વિવાદ?
અમેરિકાનો આરોપ છે કે ઈરાન પરમાણુ હથિયારો બનાવી રહ્યું છે, જે મિડલ ઈસ્ટની શાંતિ માટે જોખમી છે. જોકે, ઈરાને હથિયારો બનાવવાની વાત નકારી છે પણ યુરેનિયમ સંવર્ધનની વાત સ્વીકારી છે. તાજેતરમાં ઓમાન અને જિનીવામાં બંને દેશો વચ્ચે બેઠકો થઈ હતી, પરંતુ કોઈ ઉકેલ આવ્યો નથી. અમેરિકા ઈચ્છે છે કે ઈરાન પોતાનો તમામ યુરેનિયમ જથ્થો દેશની બહાર ખસેડે અને મિસાઈલ નિર્માણ બંધ કરે, જેની સામે ઈરાને સખત વાંધો ઉઠાવ્યો છે.
The Quranic gathering was held in the presence of Imam Khamenei, the Leader of the Islamic Revolution and a group of distinguished Quran reciters, on the first day of the holy month of Ramadan [Feb. 19, 2026] at the Imam Khomeini (ra) Hussainiyah. pic.twitter.com/o4jowtJ7bI
— Khamenei Media (@Khamenei_m) February 19, 2026
અમેરિકા પર લૂંટનો આરોપ
અયાતુલ્લા ખામેનેઈએ એક વીડિયો સંદેશ દ્વારા અમેરિકા પર આકરા પ્રહારો કર્યા છે. તેમણે દાવો કર્યો કે 1953થી અમેરિકાની નજર ઈરાનના કુદરતી સંસાધનો પર છે. ખામેનેઈના મતે, અમેરિકા ખાસ કરીને ‘સ્ટ્રેટ ઓફ હોર્મુઝ’ (Hormuz Strait) પર કબજો જમાવીને ઈરાનની સંપત્તિ લૂંટવા માંગે છે, જે ઈરાન ક્યારેય થવા દેશે નહીં. હાલમાં વોલ સ્ટ્રીટ જર્નલના અહેવાલ મુજબ, જો કોઈ સમજૂતી નહીં થાય તો અમેરિકા ઈરાન પર મર્યાદિત લશ્કરી હુમલાનો વિચાર કરી રહ્યું છે.
