ભારત-પાકિસ્તાન મહામુકાબલો: એકતરફી મેચ છતાં વ્યુઅરશિપમાં ધરખમ ઉછાળો, ડિજિટલ પ્લેટફોર્મ પર રચાયો નવો કીર્તિમાન
ભારત અને પાકિસ્તાન વચ્ચેની ક્રિકેટ મેચ માત્ર રમત નહીં, પરંતુ કરોડો ચાહકો માટે લાગણીઓનો એક મહાસાગર છે. આ પરંપરા T20 વર્લ્ડ કપ 2026માં પણ અકબંધ રહી છે. કોલંબોમાં રમાયેલા આ હાઈ-વોલ્ટેજ મુકાબલાએ વ્યુઅરશિપ અને ડિજિટલ કન્સમ્પ્શનના તમામ જૂના રેકોર્ડ્સ તોડીને એક નવો ઈતિહાસ રચી દીધો છે. ભલે મેદાન પર સ્પર્ધા અસમાન રહી હોય, પરંતુ સ્ક્રીન સામે બેઠેલા દર્શકોની સંખ્યાએ સાબિત કરી દીધું છે કે વિશ્વ ક્રિકેટમાં આનાથી મોટી બીજી કોઈ ‘રાઈવલરી’ નથી.
ડિજિટલ પ્લેટફોર્મ પર રેકોર્ડબ્રેક 163 મિલિયન દર્શકો
ટૂર્નામેન્ટના સત્તાવાર બ્રોડકાસ્ટર જિયોસ્ટારના તાજેતરના આંકડા મુજબ, ભારત-પાકિસ્તાન મેચને ડિજિટલ પ્લેટફોર્મ પર અધધ 163 મિલિયન (16.3 કરોડ) લોકોએ નિહાળી હતી. આ આંકડો ICC T20 વર્લ્ડ કપના ઈતિહાસમાં કોઈપણ એક મેચ માટેની અત્યાર સુધીની સૌથી મોટી ડિજિટલ પહોંચ (Reach) છે.
તુલનાત્મક રીતે જોઈએ તો, આ સંખ્યા 2024માં અમેરિકા ખાતે યોજાયેલી ભારત-પાકિસ્તાન મેચ કરતા 56% વધુ છે. એટલું જ નહીં, 2024ના વર્લ્ડ કપની ફાઈનલ મેચ, જેમાં ભારતે રોહિત શર્માના નેતૃત્વમાં ખિતાબ જીત્યો હતો, તેના ડિજિટલ રેકોર્ડ્સ પણ આ વખતે કોલંબોમાં રમાયેલી લીગ મેચ સામે વામણા સાબિત થયા છે.
વોચ ટાઈમમાં 20 બિલિયન મિનિટનો આંક વટાવ્યો
દર્શકોની સંલગ્નતા (Engagement) માપવા માટેનો સૌથી મહત્વનો માપદંડ ‘વોચ ટાઈમ’ માનવામાં આવે છે. આ મેચે કુલ 20 બિલિયન (2000 કરોડ) મિનિટનો વોચ ટાઈમ જનરેટ કર્યો છે. 2024ની એડિશનની સરખામણીમાં આ વખતે કન્સમ્પ્શનમાં 42% નો વધારો જોવા મળ્યો છે.
વ્યુઅરશિપના મુખ્ય પાસાઓ:
CTV (કનેક્ટેડ ટીવી): 2024ની સરખામણીમાં આ વખતે સ્માર્ટ ટીવી પર મેચ જોનારાઓની સંખ્યા 2.4 ગણી વધી છે.
લિનિયર ટીવી: ટીવી રેટિંગ્સ (TVR) માં 71% નો ગ્રોથ નોંધાયો છે, જે 2021 પછીની સૌથી વધુ રેટિંગ મેળવનાર ભારત-પાકિસ્તાન મેચ બની છે.
મોબાઇલ યુઝર્સ: લીગ સ્ટેજની કોઈપણ ICC મેચ કરતા આ વખતે મોબાઇલ પર સૌથી વધુ ટ્રાફિક જોવા મળ્યો હતો.
મેદાન પર ભારતનો દબદબો: હેડ-ટુ-હેડ રેકોર્ડ 8-1
જોકે રમતની દૃષ્ટિએ આ મેચ એકતરફી રહી હતી. ભારતીય ટીમે પાકિસ્તાન પર સંપૂર્ણ પ્રભુત્વ જમાવી રાખ્યું હતું. આ જીત સાથે T20 વર્લ્ડ કપના ઈતિહાસમાં ભારત અને પાકિસ્તાન વચ્ચેનો હેડ-ટુ-હેડ રેકોર્ડ હવે 8-1 થઈ ગયો છે. વિશ્લેષકોનું માનવું છે કે પાકિસ્તાની ટીમની હાલની નબળી સ્થિતિને કારણે મેચમાં જે રોમાંચ હોવો જોઈએ તે ઓછો હતો, તેમ છતાં દર્શકોનો ઉત્સાહ જરાય ઓછો થયો નથી.
અસમાન સ્પર્ધા છતાં અકબંધ ક્રેઝ
ક્રિકેટ પંડિતોના મતે, છેલ્લા કેટલાક વર્ષોમાં ભારત અને પાકિસ્તાન વચ્ચેની ટીમોના સ્તરમાં મોટો તફાવત (Quality Gap) જોવા મળ્યો છે. ભારત અત્યારે વિશ્વની સર્વશ્રેષ્ઠ ટીમોમાંની એક છે, જ્યારે પાકિસ્તાન સાતત્યના અભાવે સંઘર્ષ કરી રહ્યું છે. આમ છતાં, આંકડા દર્શાવે છે કે ઉપખંડના ચાહકો માટે આ મેચ માત્ર રમત નથી પણ એક ઉત્સવ છે. રાજકીય તણાવ અને દ્વિપક્ષીય શ્રેણીના અભાવે આંતરરાષ્ટ્રીય ટૂર્નામેન્ટમાં જ્યારે પણ આ બે ટીમો આમને-સામને આવે છે, ત્યારે તે બ્રોડકાસ્ટર્સ માટે સોનાની ખાણ સાબિત થાય છે.
