ગાય દોહનથી લઈને ખેતરમાં હળ ચલાવ્યા સુધી : ભાદરામાં રાજ્યપાલશ્રીની સાદગી અને કૃષિપ્રેમ
જામનગર જિલ્લાના ભાદરા ગામની મુલાકાતે આવેલા રાજ્યપાલ શ્રી આચાર્ય દેવવ્રતજીએ પોતાની અનોખી સાદગીથી સૌના દિલ જીતી લીધા હતા. પ્રોટોકોલ અને વૈભવી સુવિધાઓ બાજુ પર મૂકીને તેમણે ગામની સરકારી શાળાના એક સામાન્ય ઓરડામાં રાત્રિરોકાણ કર્યું હતું. બીજા દિવસે વહેલી સવારે તેઓ સીધા જ સ્થાનિક ખેડૂત ઘનશ્યામભાઈ ભંડેરીના પ્રાકૃતિક ખેતરની મુલાકાતે પહોંચી ગયા હતા. રાજ્યના સર્વોચ્ચ પદ પર હોવા છતાં એક સામાન્ય માણસની જેમ ખેડૂતો વચ્ચે જઈને તેમનો ઉત્સાહ વધાર્યો હતો.
જાતે ગાય દોહી અને હળ ચલાવીને ખેડૂતોને આપ્યું પ્રોત્સાહન
ખેતરની મુલાકાત દરમિયાન રાજ્યપાલશ્રીએ માત્ર વાતો જ નહીં, પણ પ્રત્યક્ષ કામ કરીને કૃષિ પ્રત્યેનો પોતાનો લગાવ દર્શાવ્યો હતો. તેમણે ખેતરમાં ગાયનું દોહન કર્યું હતું અને પોતે હળ ચલાવીને ખેડૂતોને આશ્ચર્યચકિત કરી દીધા હતા. આ ઉપરાંત, તેમણે ખેતરમાં જઈને પાકની ગુણવત્તા તપાસી હતી અને પ્રાકૃતિક ખેતી માટે ખૂબ જ જરૂરી એવા ‘ઘન જીવામૃત’ બનાવવાની રીતનું પણ બારીકાઈથી નિરીક્ષણ કર્યું હતું. તેમની આ સક્રિયતા જોઈને હાજર રહેલા તમામ ખેડૂતોમાં નવો જોમ ભરાયો હતો.
ઓર્ગેનિક કાર્બન વધારવા અને કેમિકલમુક્ત ખેતી માટે રાજ્યપાલશ્રીનું માર્ગદર્શન
સ્થાનિક ખેડૂતો સાથે ખાટલા પરિસંવાદ કરતા રાજ્યપાલશ્રીએ જણાવ્યું હતું કે ખેતીને સમૃદ્ધ બનાવવા માટે જમીનમાં ઓર્ગેનિક કાર્બનનું પ્રમાણ વધારવું ખૂબ જ અનિવાર્ય છે. તેમણે સમજાવ્યું હતું કે કેમિકલવાળી ખેતી કરવાથી જમીન અને સ્વાસ્થ્ય બંને બગડે છે, જ્યારે પ્રાકૃતિક ખેતી આર્થિક રીતે પણ ફાયદાકારક છે. તેમણે દરેક ખેડૂતને વિનંતી કરી હતી કે જો આખા ખેતરમાં શક્ય ન હોય તો ભલે શરૂઆતમાં માત્ર એક જ એકર જમીનમાં આ પ્રયોગ કરો, પણ કેમિકલમુક્ત ખેતીની શરૂઆત ચોક્કસ કરો.
ખેડૂતોમાં ગૌરવની લાગણી અને નવી ચેતનાનો સંચાર
જેમના ખેતરની રાજ્યપાલશ્રીએ મુલાકાત લીધી હતી તે ખેડૂત ઘનશ્યામભાઈએ હરખ સાથે જણાવ્યું કે, રાજ્યપાલ પોતે અમારા જેવા સામાન્ય ખેડૂતના આંગણે આવે અને ખેતીકામમાં મદદ કરે તે અમારા માટે સ્વપ્ન સમાન છે. આ મુલાકાતથી માત્ર ભાદરા જ નહીં પણ આસપાસના તમામ ગામોના ખેડૂતોમાં પ્રાકૃતિક ખેતી અપનાવવા માટે એક નવી જાગૃતિ અને આશાનો સંચાર થયો છે. રાજ્યપાલશ્રીના આ સરળ સ્વભાવ અને માર્ગદર્શને ખેડૂતોને પ્રકૃતિ સાથે ફરી જોડાવવાની નવી દિશા આપી છે.
