આરબીએસકે ટીમની સમયસર કાર્યવાહીથી ક્લબ ફૂટથી પીડિત બાળકને નવી જિંદગી

આહવા તાલુકાના બાળક માટે આરબીએસકે ટીમની માર્ગદર્શિકા અને પોન્સેટી પદ્ધતિથી આશાજનક પરિણામ

ડાંગ જિલ્લાના આહવા તાલુકાની ભિસ્યા આંગણવાડીના બાળક અક્ષિત ચૌધરીએ જન્મજાત ખામી સામે વિજય મેળવ્યો છે. ઓક્ટોબર ૨૦૨૫માં જન્મેલા આ બાળકના પગમાં ‘ક્લબ ફૂટ’ નામની જન્મજાત ખામી હતી. પી.એચ.સી. ગાઢવીની આર.બી.એસ.કે (RBSK) ટીમે આ બાબતની ગંભીરતા સમજી બાળકના વાલીઓને જરૂરી માર્ગદર્શન આપ્યું હતું. ટીમના સચોટ નિદાન અને પ્રયાસોને કારણે બાળકને સમયસર સારવાર મળી શકી.

ધરમપુરની શ્રીમદ્ રાજચંદ્ર હોસ્પિટલમાં આધુનિક પદ્ધતિથી ઈલાજ

RBSK ટીમ દ્વારા અક્ષિતને વધુ સારી સારવાર માટે ધરમપુરની શ્રીમદ્ રાજચંદ્ર હોસ્પિટલ ખાતે રિફર કરવામાં આવ્યો હતો. ત્યાં તબીબો દ્વારા ‘પોન્સેટી’ (Ponseti) પદ્ધતિનો ઉપયોગ કરીને બાળકના પગની સફળ સારવાર કરવામાં આવી હતી. હાલમાં આ બાળક આર.બી.એસ.કે ટીમ નંબર ૬૦૫ના સતત દેખરેખ અને ફોલોઅપ હેઠળ છે. સારવાર બાદ બાળકના પગમાં ખૂબ જ સારો સુધારો જોવા મળી રહ્યો છે, જે તેના ઉજ્જવળ ભવિષ્યની આશા જગાવે છે.

શું છે ક્લબ ફૂટ? લક્ષણો અને સમયસર સારવારનું મહત્વ

ક્લબ ફૂટ એ એક એવી જન્મજાત ખામી છે જેમાં બાળકના પગનો આકાર સામાન્ય હોતો નથી. આ સ્થિતિમાં બાળકનો પગ અંદરની તરફ વળેલો હોય છે અને એડી ઊંચી રહે છે, જેના કારણે બાળક જમીન પર સીધો પગ મૂકી શકતું નથી. આ સમસ્યા એક અથવા બંને પગમાં હોઈ શકે છે. સામાન્ય રીતે ગર્ભાવસ્થા દરમિયાન હાડકાં કે પેશીઓનો પૂરો વિકાસ ન થવાને કારણે અથવા આનુવંશિક કારણોસર આવું બની શકે છે. જો યોગ્ય સમયે અને નાની ઉંમરે આની સારવાર શરૂ કરવામાં આવે, તો બાળક ભવિષ્યમાં સામાન્ય રીતે ચાલી શકે છે.

ડાંગ જિલ્લામાં વિશ્વ ક્ષય દિવસ નિમિત્તે ૪૫ ગ્રામ પંચાયતોને ટીબી મુક્ત સન્માન

ડાંગના સુબીર તાલુકાના ઘાણીઆંબા ગામમાં પ્રાકૃતિક ખેતી તાલીમ