કમિશનરની સૂચનાથી કરમસદ-વિદ્યાનગર વિસ્તારમાં દબાણ વિરોધી ઝુંબેશ તેજ
કરમસદ-આણંદ મહાનગરપાલિકાના કમિશનર દ્વારા શહેરના રસ્તાઓ પર લોકોને નડતરરૂપ થતા ગેરકાયદેસર દબાણોને દૂર કરવા માટે એસ્ટેટ વિભાગને કડક આદેશ આપવામાં આવ્યા છે. ટ્રાફિકની સમસ્યા હળવી કરવા અને રાહદારીઓની સુવિધા માટે આ ઝુંબેશ સતત ચાલુ રાખવા જણાવાયું છે. કમિશનરની આ સૂચના બાદ તંત્ર હરકતમાં આવ્યું છે અને શહેરના મુખ્ય માર્ગો પરથી લારી-ગલ્લા અને કેબિનો હટાવવાની પ્રક્રિયા તેજ કરી દેવામાં આવી છે.
વિદ્યાનગર ભાઈકાકા સર્કલ પાસેથી લારીઓ અને ટેમ્પા જપ્ત કરાયા
કમિશનરના આદેશ મુજબ એસ્ટેટ વિભાગની ટીમે વિદ્યાનગરના ભાઈકાકા સર્કલ પાસે ઓચિંતી તપાસ હાથ ધરી હતી. આ કાર્યવાહી દરમિયાન જાહેર રસ્તા પર દબાણ કરીને ઊભી રાખવામાં આવેલી ૧૦ જેટલી લારીઓ અને ૩ ટેમ્પા જપ્ત કરવામાં આવ્યા છે. રસ્તાની વચ્ચે ગેરકાયદેસર રીતે વેપાર કરતા લોકો સામે આ કાર્યવાહીથી અન્ય દબાણકર્તાઓમાં પણ ફફડાટ ફેલાયો છે.
મોગરી વિસ્તારમાં રાત્રિ દરમિયાન દબાણ હટાવવાની કામગીરી
મહાનગરપાલિકાની ટીમે માત્ર દિવસના સમયે જ નહીં, પરંતુ રાત્રિના સમયે પણ દબાણ હટાવવાની ઝુંબેશ ચાલુ રાખી છે. ગઈકાલે મોડી રાત્રે મોગરીમાં મહાત્મા ગાંધી વિદ્યાલય પાસે આવેલી ગેરકાયદેસર લારીઓ પર કાર્યવાહી કરવામાં આવી હતી. આ ઓપરેશન દરમિયાન ૫ લારીઓ તેમાં રહેલા પરચુરણ સામાન સાથે જપ્ત કરવામાં આવી હતી. તંત્ર દ્વારા સ્પષ્ટ કરવામાં આવ્યું છે કે ગમે તે સમયે દબાણો હટાવવાની કામગીરી કરવામાં આવશે.
દબાણ કરનારાઓ સામે દંડનીય કાર્યવાહીની ચીમકી
એસ્ટેટ વિભાગના ઇન્સ્પેક્ટરે તમામ લારી-ગલ્લા ધારકોને કડક શબ્દોમાં ચેતવણી આપી છે કે જાહેર રસ્તાઓ પર દબાણ ન કરવું. જો કોઈ પણ લારી કે ગલ્લો લોકોને અડચણરૂપ જણાશે, તો તેને તાત્કાલિક જપ્ત કરવામાં આવશે અને તેના માલિક સામે ભારે દંડ વસૂલવાની કાર્યવાહી કરવામાં આવશે. શહેરને સુંદર અને ટ્રાફિક મુક્ત રાખવા માટે નાગરિકોને પણ સહકાર આપવા અપીલ કરવામાં આવી છે.
