હોસ્પિટલની ભયાનક બેદરકારી: પાટા કાપતી વખતે 6 મહિનાના માસૂમની આંગળી કાપી નાખી, સ્ટાફ સામે ગુનો દાખલ
કર્ણાટકની રાજધાની બેંગલુરુમાંથી તબીબી જગતને શરમાવે તેવી એક હૃદયદ્રાવક ઘટના સામે આવી છે. અહીંની એક ખાનગી હોસ્પિટલના સ્ટાફની ઘોર બેદરકારીને કારણે માત્ર 6 મહિનાના માસૂમ બાળકે પોતાની આંગળી ગુમાવવાનો વારો આવ્યો છે. ડ્રેસિંગ હટાવતી વખતે સર્જાયેલી આ ગંભીર ભૂલને પગલે પોલીસે હોસ્પિટલના ત્રણ કર્મચારીઓ વિરુદ્ધ FIR નોંધીને તપાસ હાથ ધરી છે.
કેવી રીતે બની આ કમકમાટીભરી ઘટના?
મળતી માહિતી મુજબ, બાળકને ગત 19 ફેબ્રુઆરીના રોજ સખત તાવ હોવાથી સારવાર માટે હોસ્પિટલમાં દાખલ કરવામાં આવ્યું હતું. મંગળવારે જ્યારે મેડિકલ સ્ટાફ બાળકના હાથમાંથી ડ્રિપ (બાટલો) અને ડ્રેસિંગનો પાટો હટાવી રહ્યો હતો, ત્યારે અસલી મુસીબત સર્જાઈ હતી. પાટો કાપવા માટે વપરાયેલી કાતર ચલાવતી વખતે સ્ટાફે એટલી હદે બેદરકારી દાખવી કે કાતર સીધી બાળકના ડાબા હાથની આંગળી પર ફરી વળી, જેના કારણે આંગળીનો એક હિસ્સો કપાઈને અલગ થઈ ગયો હતો.
માસૂમ હાલ ICUમાં સારવાર હેઠળ
આંગળી કપાતા જ માસૂમ બાળક દર્દથી કણસી ઉઠ્યું હતું અને લોહીનો ફુવારો છૂટ્યો હતો. હોસ્પિટલમાં અફરાતફરી મચી ગઈ હતી અને તાત્કાલિક બાળકની ગંભીર સ્થિતિને જોતા તેને ICUમાં શિફ્ટ કરવામાં આવ્યું હતું. હાલમાં બાળકની સ્થિતિ સ્થિર હોવાનું કહેવાય છે, પરંતુ આ અકસ્માતે પરિવારને ઊંડા આઘાતમાં સરી પાડ્યો છે. પોતાના હસતા-રમતા બાળકની આ હાલત જોઈ માતા-પિતા ભાંગી પડ્યા છે.
પોલીસ કાર્યવાહી અને હોસ્પિટલ સામે આક્રોશ
બાળકના માતા-પિતાએ આ મામલે મૌન ન રહેતા સ્થાનિક પોલીસ સ્ટેશનમાં હોસ્પિટલ વિરુદ્ધ ફરિયાદ નોંધાવી છે. પોલીસે ઘટનાની ગંભીરતાને ધ્યાનમાં રાખીને હોસ્પિટલના ત્રણ જવાબદાર સ્ટાફ મેમ્બર સામે ગુનો દાખલ કર્યો છે. પોલીસ અધિકારીઓએ ખાતરી આપી છે કે તપાસના અંતે જો હોસ્પિટલ પ્રશાસન કે સ્ટાફની કોઈ પણ પ્રકારની કાયદાકીય ભૂલ જણાશે, તો તેમની સામે કડકમાં કડક પગલાં લેવામાં આવશે.
