દેશી ગાય આધારિત પ્રાકૃતિક કૃષિ માટે ગામેગામ ઝુંબેશ, જીવામૃત અને ઘન જીવામૃત અંગે માર્ગદર્શન
દાહોદ જિલ્લામાં ખેડૂતોને ઝેરી મુક્ત ખેતી તરફ વાળવા માટે ‘આત્મા પ્રોજેક્ટ’ દ્વારા એક વિશેષ ઝુંબેશ ચલાવવામાં આવી રહી છે. સરકારના આ પ્રોત્સાહક પ્રયાસોને કારણે અત્યાર સુધીમાં જિલ્લાના ૧૮,૦૦૦થી વધુ ખેડૂતોએ પ્રાકૃતિક ખેતી અપનાવી છે. સમગ્ર જિલ્લો કુદરતી ખેતી તરફ વળે તે માટે દરેક ગ્રામ પંચાયતમાં ક્લસ્ટર બનાવીને ખેડૂતોને ખાસ તાલીમ આપવામાં આવે છે, જેનો મુખ્ય હેતુ ખેતી ખર્ચ ઘટાડીને જમીનની ફળદ્રુપતા વધારવાનો છે.
દેશી ગાય આધારિત ખેતીના પાંચ મુખ્ય આયામોની સમજ
ગામડાઓમાં આયોજિત તાલીમ શિબિરોમાં ખેડૂતોને દેશી ગાય આધારિત પ્રાકૃતિક ખેતી પદ્ધતિ વિશે ઊંડાણપૂર્વક સમજાવવામાં આવે છે. આ પદ્ધતિમાં રાસાયણિક ખાતર કે દવાઓને બદલે જીવામૃત, ઘન જીવામૃત, બીજામૃત, બ્રહ્માસ્ત્ર અને અગ્નિસ્ત્ર જેવા પાંચ મહત્વના પાસાઓ પર ભાર મૂકવામાં આવે છે. આ પ્રાકૃતિક દવાઓ અને ખાતરના ઉપયોગથી ખેતી ખર્ચ શૂન્ય થઈ જાય છે અને ખેતરમાં પાક પણ તંદુરસ્ત ઉતરે છે.
જીવામૃત બનાવવાની રીત અને જમીનને થતા ફાયદા
તાલીમ દરમિયાન ખેડૂતમિત્રોને જીવામૃત અને ઘન જીવામૃત કઈ રીતે બનાવવું, તેનો સંગ્રહ કેવી રીતે કરવો અને પાક પર તેનો છંટકાવ કરવાની સાચી રીત વિશે લાઈવ માર્ગદર્શન આપવામાં આવે છે. નિષ્ણાતો દ્વારા સમજાવવામાં આવે છે કે પ્રાકૃતિક ખેતી કરવાથી જમીન નરમ અને ફળદ્રુપ બને છે, તેમજ લોકોને શુદ્ધ અને પૌષ્ટિક અનાજ મળી રહે છે. આ અભિયાન દ્વારા દાહોદના અંતરિયાળ ગામડાઓના ખેડૂતો હવે ગૌ-આધારિત ખેતીને આજીવિકાનું મજબૂત સાધન બનાવી રહ્યા છે.
