BSP ધારાસભ્ય ઉમાશંકર સિંહના ઠેકાણાઓ પર ITના દરોડા બીજા દિવસે પણ યથાવત: ફેલાયો ફફડાટ
ઉત્તર પ્રદેશના બલિયા જિલ્લાની રસડા બેઠકના બહુજન સમાજ પાર્ટી (BSP) ના ધારાસભ્ય ઉમાશંકર સિંહની મુશ્કેલીઓમાં સતત વધારો થતો જોવા મળી રહ્યો છે. આવકવેરા વિભાગ (IT) ની ટીમે ધારાસભ્યના વિવિધ ઠેકાણાઓ પર દરોડા પાડવાની કાર્યવાહી શરૂ કરી છે, જે હવે બીજા દિવસે પણ સતત ચાલુ રહી છે. આ ઓપરેશનને 24 કલાકથી વધુ સમય વીતી ગયો છે અને તપાસનો વ્યાપ વધુ વિસ્તરી રહ્યો હોય તેમ જણાય છે.
લખનૌથી બલિયા સુધી તપાસનો ધમધમાટ
બુધવારે વહેલી સવારે શરૂ થયેલી આ કાર્યવાહીમાં ધારાસભ્ય ઉમાશંકર સિંહ, તેમના ભાઈ અને બિઝનેસ પાર્ટનર્સ સાથે જોડાયેલા કુલ 30 જેટલા સ્થળો પર આવકવેરા વિભાગે ત્રાટકી હતી. લખનૌમાં તેમના નિવાસસ્થાનેથી ટીમ ગઈકાલે રાત્રે મોડેથી રવાના થઈ હતી, પરંતુ વિપુલ ખંડ સ્થિત તેમની ઓફિસમાં હજુ પણ તપાસ ચાલુ છે. આ ઉપરાંત, બલિયામાં તેમની માલિકીની હોટલ ‘SKY’, પ્લાન્ટ અને અન્ય રહેણાંક વિસ્તારોમાં પણ અધિકારીઓ દ્વારા ઝીણવટભરી તપાસ કરવામાં આવી રહી છે.
ઈલેક્ટ્રોનિક ઉપકરણો અને દસ્તાવેજો જપ્ત
સૂત્રો પાસેથી મળતી માહિતી મુજબ, આવકવેરા વિભાગે અત્યાર સુધીમાં મોટી સંખ્યામાં શંકાસ્પદ દસ્તાવેજો અને ઇલેક્ટ્રોનિક ઉપકરણો (લેપટોપ, હાર્ડ ડિસ્ક) જપ્ત કર્યા છે. વારાણસી અને સોનભદ્રમાં પણ વિભાગની ટીમો સક્રિય છે અને વ્યવસાયિક લેવડ-દેવડની તપાસ કરી રહી છે. જોકે, આ દરોડા અંગે હજુ સુધી આવકવેરા વિભાગ તરફથી કોઈ સત્તાવાર નિવેદન બહાર પાડવામાં આવ્યું નથી.
ક્રશર એસોસિએશનના પ્રમુખ પણ નિશાના પર
આ તપાસ માત્ર ધારાસભ્ય પૂરતી મર્યાદિત નથી. આવકવેરા વિભાગે ક્રશર ઓનર્સ એસોસિએશનના પ્રમુખ અજય સિંહ તેમજ ચંદ્રભૂષણ ગુપ્તા અને દેવેન્દ્ર કેસરીના ઠેકાણાઓ પર પણ સર્ચ ઓપરેશન હાથ ધર્યું છે. ખાસ કરીને ‘મેસર્સ છાત્ર શક્તિ’ ના ક્રશર પ્લાન્ટ અને તેની ઓફિસોની તપાસ કરવામાં આવી રહી છે. જાણવા મળ્યું છે કે અધિકારીઓના હાથમાં કેટલાક એવા મહત્વના પુરાવા લાગ્યા છે જે મોટા પાયે ટેક્સ ચોરી તરફ ઈશારો કરે છે.
