‘પ્રાકૃતિક ડાંગ’નો લહાવો એક જ સ્થળે, ૪૫ સખી મંડળ અને ૯૫૦થી વધુ વેપારીઓ સાથે ભવ્ય આયોજન
ઐતિહાસિક ‘ડાંગ દરબાર’ લોકમેળાના પ્રારંભ સાથે જ આહવામાં માનવ મહેરામણ ઉમટી પડ્યું છે. ડાંગ ઉપરાંત પાડોશી રાજ્ય મહારાષ્ટ્ર અને નજીકના જિલ્લાઓમાંથી આવતા પ્રવાસીઓ મેળાની સુંદર વ્યવસ્થા અને આયોજનના વખાણ કરી રહ્યા છે. ખાસ કરીને, ડાંગ જિલ્લા કલેક્ટર શાલિની દુહાનના માર્ગદર્શન હેઠળ ઊભા કરવામાં આવેલા સખી મંડળોના સ્ટોલ્સ મુલાકાતીઓ માટે આકર્ષણનું કેન્દ્ર બન્યા છે, જે મહિલા સશક્તિકરણનું ઉત્તમ ઉદાહરણ પૂરું પાડે છે.
૨૮ વર્ષથી મેળો જોતા મુલાકાતીએ કરી વહીવટી તંત્રની સરાહના
મહારાષ્ટ્રના સરાડથી આવેલા સરોજબેન ભોયે, જેઓ છેલ્લા ૨૮ વર્ષથી આ મેળો જોતા આવ્યા છે, તેમણે જણાવ્યું કે વર્તમાન સરકાર અને વહીવટી તંત્ર દ્વારા કરવામાં આવેલી સુવિધાઓ અભૂતપૂર્વ છે. તેમણે ખાસ કરીને ગ્રામીણ વિસ્તારની મહિલાઓ માટે એક જ સ્થળે પ્રાકૃતિક પેદાશો અને હસ્તકલાની વસ્તુઓના વેચાણ માટે જે વ્યવસ્થા કરી છે તેને બિરદાવી હતી. આ પહેલથી આદિવાસી મહિલાઓને પોતાની ચીજવસ્તુઓ સીધી ગ્રાહકો સુધી પહોંચાડવાની તક મળી છે.
૯૫૦ થી વધુ વેપારીઓ અને ૪૫ સખી મંડળોને પ્લેટફોર્મ
ડાંગ દરબારના આ ભવ્ય મેળામાં સ્થાનિક અર્થતંત્રને વેગ આપવા માટે ૯૫૦ થી વધુ વેપારીઓને પ્લોટની ફાળવણી કરવામાં આવી છે. આ ઉપરાંત, ૪૫ થી વધુ સ્થાનિક સખી મંડળોને વિશેષ સ્ટોલ્સ ફાળવવામાં આવ્યા છે. આ સ્ટોલ્સ પર ‘પ્રાકૃતિક ડાંગ’ની શુદ્ધ પેદાશો અને પરંપરાગત હસ્તકલાની વસ્તુઓ ઉપલબ્ધ છે. વહીવટી તંત્રનો આ ઉમદા હેતુ મહિલાઓને આર્થિક રીતે સશક્ત બનાવવાની સાથે ડાંગના પ્રાકૃતિક વારસાને જાળવી રાખવાનો છે.
