કેનેડાના વડાપ્રધાન માર્ક કાર્નીની પ્રથમ ભારત મુલાકાત: દિલ્હીના હૈદરાબાદ હાઉસમાં પીએમ મોદી સાથે મુલાકાત
ભારત અને કેનેડા વચ્ચેના સંબંધોમાં એક નવો વળાંક જોવા મળી રહ્યો છે. કેનેડાના વડાપ્રધાન માર્ક જે. કાર્ની હાલમાં ભારતની સત્તાવાર મુલાકાતે છે, જ્યાં સોમવારે તેમણે નવી દિલ્હીના હૈદરાબાદ હાઉસમાં વડાપ્રધાન નરેન્દ્ર મોદી સાથે મુલાકાત કરી હતી. આ બેઠક દરમિયાન બંને નેતાઓએ દ્વિપક્ષીય સંબંધોને વધુ મજબૂત બનાવવા અને વ્યૂહાત્મક ભાગીદારીને નવી ઊંચાઈએ લઈ જવા પર ભાર મૂક્યો હતો. પીએમ મોદી અને પીએમ કાર્ની વચ્ચે પ્રતિનિધિમંડળ સ્તરની મંત્રણા પણ યોજાવાની છે, જે બંને દેશો માટે અત્યંત મહત્વપૂર્ણ માનવામાં આવે છે.
વિદેશ મંત્રી એસ. જયશંકર સાથેની મુલાકાત અને ભાગીદારીની પ્રશંસા
પીએમ મોદી સાથેની મુલાકાત પહેલા, 2 માર્ચના રોજ સવારે કેનેડાના વડાપ્રધાન માર્ક કાર્નીએ ભારતના વિદેશ મંત્રી એસ. જયશંકર સાથે મુલાકાત કરી હતી. એસ. જયશંકરે સોશિયલ મીડિયા પર આ મુલાકાત અંગે ખુશી વ્યક્ત કરતા જણાવ્યું હતું કે, તેઓ કેનેડાના વડાપ્રધાનના ભારત સાથેના સંબંધો સુધારવાના અને ભાગીદારી વધારવાના સંકલ્પની પ્રશંસા કરે છે. રવિવારે સાંજે વિદેશ મંત્રીએ તેમના કેનેડિયન સમકક્ષ અનીતા આનંદ સાથે પણ બેઠક યોજી હતી, જેમાં વિવિધ આંતરરાષ્ટ્રીય મુદ્દાઓ પર ચર્ચા કરવામાં આવી હતી.
મુંબઈથી દિલ્હી સુધીનો પ્રવાસ: ભવ્ય સ્વાગત
વડાપ્રધાન નરેન્દ્ર મોદીના આમંત્રણ પર માર્ક કાર્ની 27 ફેબ્રુઆરીથી 2 માર્ચ સુધી ભારતની સત્તાવાર મુલાકાતે છે. વડાપ્રધાન તરીકે આ તેમની પ્રથમ ભારત મુલાકાત છે. તેઓ 27 ફેબ્રુઆરીએ સૌપ્રથમ મુંબઈ પહોંચ્યા હતા, જ્યાં તેમણે વિવિધ કાર્યક્રમોમાં હાજરી આપી હતી. રવિવારે સાંજે જ્યારે તેઓ મુંબઈથી દિલ્હી પહોંચ્યા ત્યારે એરપોર્ટ પર કેન્દ્રીય રાજ્ય મંત્રી જિતિન પ્રસાદ દ્વારા તેમનું ઉષ્માભર્યું સ્વાગત કરવામાં આવ્યું હતું.
આર્થિક અને વ્યૂહાત્મક મુદ્દાઓ પર ધ્યાન
આ મુલાકાત દરમિયાન બંને દેશોના નેતાઓ જૂન 2025માં G7 સમિટ અને નવેમ્બર 2025માં જોહાનિસબર્ગ ખાતે મળેલી G20 સમિટ દરમિયાન થયેલી ચર્ચાઓને આગળ વધારશે. મુખ્યત્વે વેપાર અને રોકાણ, ઉર્જા ક્ષેત્ર, મહત્વપૂર્ણ ખનિજો (Critical Minerals), કૃષિ, શિક્ષણ, સંશોધન અને ઇનોવેશન જેવા ક્ષેત્રોમાં સહયોગ વધારવા પર ધ્યાન કેન્દ્રિત કરવામાં આવશે.
વિદેશ મંત્રાલયના જણાવ્યા અનુસાર, પીએમ મોદી અને પીએમ કાર્ની ‘ભારત-કેનેડા CEO ફોરમ’માં પણ ભાગ લેશે. આ મુલાકાત ભારત-કેનેડા દ્વિપક્ષીય સંબંધોને સામાન્ય બનાવવાના એક મહત્વપૂર્ણ તબક્કે થઈ રહી છે, જે આગામી સમયમાં બંને દેશો વચ્ચેના આર્થિક અને રાજકીય સંબંધોને નવી દિશા આપશે.
