IPL 2026: ધોની અંગે CSKનો સૌથી મોટો ખુલાસો, શું ‘થાલા’ આખી સીઝન રમશે? CEOએ આપી મહત્વની અપડેટ
IPL 2026 ની આતુરતાથી રાહ જોઈ રહેલા ક્રિકેટ પ્રેમીઓ માટે એક મોટા સમાચાર સામે આવ્યા છે. ચેન્નાઈ સુપર કિંગ્સ (CSK) એ ટીમના દિગ્ગજ ખેલાડી મહેન્દ્ર સિંહ ધોનીને લઈને ચાલી રહેલી તમામ અટકળો પર વિરામ મૂકી દીધો છે. IPL ની 19મી સીઝન શરૂ થવાને હવે ગણતરીના દિવસો બાકી છે, ત્યારે CSK ના CEO કાશી વિશ્વનાથને ધોનીની ઉપલબ્ધતા અંગે મોટું નિવેદન આપ્યું છે.
શું ધોની તમામ મેચો રમશે?
IPL 2026 ના શિડ્યુલની જાહેરાત ટૂંક સમયમાં થવાની છે, જેની શરૂઆત 28 માર્ચથી થવાની સંભાવના છે. આ દરમિયાન ચાહકોના મનમાં સૌથી મોટો પ્રશ્ન એ હતો કે શું 44 વર્ષની વયે ધોની આખી સીઝન રમી શકશે? આ અંગે સ્પષ્ટતા કરતા CEO કાશી વિશ્વનાથને જણાવ્યું હતું કે, “અમને આશા છે કે મહેન્દ્ર સિંહ ધોની આ સીઝનની તમામ મેચો રમશે.” તેમણે ધોનીની ઉંમર અને ફિટનેસ અંગેની ચિંતાઓને ફગાવી દેતા ચાહકોને મોટી રાહત આપી છે.
ટીમમાં ધોનીની ભૂમિકા શું હશે?
ધોનીના રોલ અંગે વાત કરતા CEO એ જણાવ્યું કે, ધોની બેટ્સમેન તરીકે રમશે, વિકેટકીપર તરીકે કે પછી ‘ઈમ્પેક્ટ પ્લેયર’ તરીકે, તેનો નિર્ણય એડમિનિસ્ટ્રેટિવ સ્ટાફ નહીં પણ ક્રિકેટિંગ સ્ટાફ (કોચ અને કેપ્ટન) લેશે. ટીમમાં હવે સંજુ સેમસન જેવો બીજો વિકેટકીપર-બેટ્સમેન હોવાથી મેનેજમેન્ટ ધોનીનો ઉપયોગ કેવી રીતે કરવો તેની રણનીતિ તૈયાર કરશે.
સંજુ સેમસન અને શિવમ દુબેના વખાણ
CSK ના CEO એ તાજેતરમાં T20 વર્લ્ડ કપમાં શાનદાર પ્રદર્શન કરનાર સંજુ સેમસન અને શિવમ દુબેની પણ પ્રશંસા કરી હતી. તેમણે કહ્યું, “અમે ખૂબ ખુશ છીએ કે ભારતે સતત બીજી વાર વર્લ્ડ કપ જીત્યો છે. CSK ના બે ખેલાડીઓ, સંજુ અને શિવમ દુબેએ વર્લ્ડ કપમાં જે પ્રદર્શન કર્યું છે, તેનાથી ટીમનો આત્મવિશ્વાસ વધ્યો છે. અમને ખાતરી છે કે તેઓ IPL માં પણ CSK માટે આવું જ પ્રદર્શન કરશે.”
પ્રેક્ટિસ કેમ્પ શરૂ
IPL 2026 માટે ચેન્નાઈ સુપર કિંગ્સનો ટ્રેનિંગ કેમ્પ શરૂ થઈ ગયો છે. કાશી વિશ્વનાથને જણાવ્યું કે ખેલાડીઓની તૈયારીઓ અત્યંત સારી ચાલી રહી છે અને હાલમાં કોઈ સમસ્યા નથી. વર્લ્ડ કપ રમીને પરત ફરેલા ખેલાડીઓ પણ ટૂંક સમયમાં ટીમ સાથે જોડાશે અને આગામી સીઝન માટે સજ્જ થશે. 28 માર્ચે રમાનારી સંભવિત પ્રથમ મેચમાં ચેન્નાઈ સુપર કિંગ્સનો સામનો ડિફેન્ડિંગ ચેમ્પિયન રોયલ ચેલેન્જર્સ બેંગલુરુ (RCB) સામે થઈ શકે છે.
