સરકારની સહાય યોજનાઓથી ખેડૂતોને લાખોની સબસીડી, આધુનિક સાધનો સાથે ખેતીમાં પ્રગતિ
બોટાદ જિલ્લાના ગઢડા ખાતે રહેતા પ્રગતિશીલ ખેડૂત અઝીઝભાઇ છેલ્લા ૨૫ થી ૩૦ વર્ષથી ખેતી વ્યવસાય સાથે સંકળાયેલા છે. ૧૧ વીઘા જમીન ધરાવતા અઝીઝભાઇ પોતાના ખેતરમાં મુખ્યત્વે મગફળી, કપાસ અને બાજરી જેવા પાકોનું વાવેતર કરે છે. રાજ્ય સરકારની વિવિધ કૃષિ સહાય યોજનાઓ તેમના માટે આશીર્વાદરૂપ સાબિત થઈ છે. તેમને રોટાવેટર ખરીદવા માટે ૫૦,૦૦૦ રૂપિયા, મીની ટ્રેક્ટર માટે ૪૫,૦૦૦ રૂપિયા અને ઓટોમેટિક ઓરણી માટે ૨૦,૦૦૦ રૂપિયાની આર્થિક સહાય મળી છે. આ આધુનિક સાધનોને કારણે તેમની ખેતી પદ્ધતિ વધુ સરળ અને ઝડપી બની છે.
ખેતીમાં આધુનિકીકરણ અને આર્થિક મજબૂતી
અઝીઝભાઇને કૃષિ વિભાગ તરફથી પાવર થ્રેસર ખરીદવા માટે પણ ૧,૦૯,૩૨૪ રૂપિયાની મોટી સહાય મળવાપાત્ર થઈ છે. આ ઉપરાંત, તેમને પીએમ કિસાન સન્માન નિધિ યોજના હેઠળ ૨૨મા હપ્તાનો લાભ પણ મળવાનો છે. અઝીઝભાઇ સરકારનો આભાર માનતા જણાવે છે કે, સરકાર દ્વારા મળતા પ્રોત્સાહનને કારણે જ આજે નાના ખેડૂતો આર્થિક રીતે મજબૂત બન્યા છે. ખેતીમાં વપરાતા મોંઘા સાધનો હવે સબસિડીના કારણે સામાન્ય ખેડૂતની પહોંચમાં આવ્યા છે, જેનાથી શારીરિક શ્રમ ઘટ્યો છે અને ઉત્પાદકતામાં વધારો થયો છે.
સમઢીયાળાના ભાવેશભાઈની આત્મનિર્ભરતાની ગાથા
આ જ પ્રકારે સમઢીયાળા ગામના ખેડૂત ભાવેશભાઈ પણ સરકારી યોજનાઓનો લાભ મેળવી આત્મનિર્ભર બન્યા છે. ૩૫ વીઘા જમીન ધરાવતા ભાવેશભાઈ ખેતીના સાધનોની ખરીદીમાં મળેલી સહાય વિશે વાત કરતા જણાવે છે કે, તેમને ટ્રેક્ટર ખરીદવા માટે ૬૦,૦૦૦ રૂપિયા અને રોટાવેટર માટે ૪૮,૦૦૦ રૂપિયાની સબસિડી મળી છે. વળી, હાલમાં તેમને પાવર થ્રેસર માટે ૮૭,૪૫૯ રૂપિયાની સહાય મંજૂર થઈ છે. આ આર્થિક ટેકાને લીધે તેઓ હવે બીજા પર નિર્ભર રહેવાને બદલે પોતાના જ આધુનિક સાધનોથી ખેતી કરી રહ્યા છે.
સબસિડી યોજનાઓથી ખેડૂતો બન્યા સશક્ત
ભાવેશભાઈના મતે, જ્યારે ખેડૂતોને ૪ થી ૫ લાખ રૂપિયાના કિંમતી સાધનો પર મોટી સબસીડી મળે છે, ત્યારે તેઓ ખેતીમાં મોટું રોકાણ કરવા સક્ષમ બને છે. પીએમ કિસાન સન્માન નિધિના હપ્તાઓ ખેડૂતોને બિયારણ અને ખાતર જેવા ખર્ચમાં મદદરૂપ થાય છે. રાજ્ય અને કેન્દ્ર સરકારના સંયુક્ત પ્રયાસોથી ખેડૂતો હવે પરંપરાગત ખેતી છોડી આધુનિક યંત્રો તરફ વળ્યા છે. આ પ્રકારની સાધન સહાય યોજનાઓ ગ્રામીણ અર્થતંત્રને વેગ આપી રહી છે અને ખેડૂતોને ખરા અર્થમાં સમૃદ્ધ બનાવી રહી છે.
