દિલ્હીમાં ગેરકાયદેસર બાંગ્લાદેશીઓ વિરુદ્ધ મોટી કાર્યવાહી: 9 મહિનામાં 1,500 થી વધુને કરાયા ડિપોર્ટ
દેશની રાજધાની દિલ્હીમાં ગેરકાયદેસર રીતે વસવાટ કરતા બાંગ્લાદેશી પ્રવાસીઓ વિરુદ્ધ સુરક્ષા એજન્સીઓએ લાલ આંખ કરી છે. નવેમ્બર 2024 થી શરૂ થયેલા એક વિશેષ અભિયાન અંતર્ગત અત્યાર સુધીમાં હજારો શંકાસ્પદ લોકોની ઓળખ કરવામાં આવી છે. દિલ્હી પોલીસના તાજેતરના આંકડા દર્શાવે છે કે જૂન 2025 થી ફેબ્રુઆરી 2026 દરમિયાન કુલ 1,589 ગેરકાયદેસર બાંગ્લાદેશીઓને પકડીને તેમના દેશ પરત મોકલી દેવામાં આવ્યા છે.
પહેલગામ હુમલા બાદ ઓપરેશનમાં આવ્યો વેગ
કેન્દ્રીય ગૃહ મંત્રાલય (MHA) ના નિર્દેશો બાદ આ કાર્યવાહી નવેમ્બર 2024 માં શરૂ થઈ હતી, પરંતુ 22 એપ્રિલ 2025 ના રોજ પહેલગામમાં થયેલા આતંકી હુમલા બાદ આ અભિયાનમાં ભારે વેગ આવ્યો છે. સુરક્ષાના કારણોસર દિલ્હીના ખૂણેખૂણે તપાસ તેજ કરવામાં આવી હતી. માત્ર સાત મહિનામાં પકડાયેલા લોકોની સંખ્યા અગાઉના સમયગાળા કરતા બમણી થઈ ગઈ છે. આ આંકડામાં 55 રોહિંગ્યા મુસ્લિમોનો પણ સમાવેશ થાય છે જેમને કસ્ટડીમાં લેવામાં આવ્યા હતા.
કયા વિસ્તારમાંથી કેટલા લોકો પકડાયા?
દિલ્હી પોલીસના ડેટા અનુસાર, 2025 માં સૌથી વધુ ધરપકડ બાહ્ય (આઉટર) જિલ્લામાંથી (386) કરવામાં આવી છે. અન્ય વિસ્તારોની વિગત નીચે મુજબ છે:
- દક્ષિણ-પૂર્વ જિલ્લો: 287
- ઉત્તર-પશ્ચિમ જિલ્લો: 249
- ઉત્તરી અને દક્ષિણી જિલ્લા: આશરે 190-194
- નવી દિલ્હી: સૌથી ઓછા 20 લોકોની ઓળખ થઈ છે.
પોલીસ અધિકારીઓના જણાવ્યા અનુસાર, મોટાભાગના ગેરકાયદેસર પ્રવાસીઓ હરિયાણા અને રાજસ્થાનની સરહદ પાસે આવેલા ઈંટના ભઠ્ઠાઓમાં મજૂર તરીકે કામ કરતા મળી આવ્યા હતા.
સ્પેશિયલ ફ્લાઈટ્સ દ્વારા મોકલાયા પરત
પકડાયેલા બાંગ્લાદેશીઓને પરત મોકલવાની પ્રક્રિયા પણ ઘણી સઘન બનાવવામાં આવી છે. શરૂઆતમાં તેમને ટ્રેન અને બસ દ્વારા પશ્ચિમ બંગાળની સરહદ સુધી લઈ જવામાં આવતા હતા. જોકે, સુરક્ષા પ્રોટોકોલ વધાર્યા બાદ, હવે ઘણા પ્રવાસીઓને ગાઝિયાબાદના હિંડન એરબેઝથી સ્પેશિયલ ફ્લાઈટ્સ દ્વારા અગરતલા મોકલવામાં આવે છે અને ત્યાંથી બાંગ્લાદેશ બોર્ડર પાર કરાવવામાં આવે છે.
નેટવર્ક તોડવા માટે FIR ની ઝડી
ગેરકાયદેસર ઘૂસણખોરી કરાવનાર, નકલી દસ્તાવેજો બનાવી આપનાર અને આ લોકોને નોકરીએ રાખનાર નેટવર્ક વિરુદ્ધ દિલ્હી પોલીસની ક્રાઈમ બ્રાન્ચ અને સ્પેશિયલ સેલે અનેક FIR નોંધી છે. ગૃહ મંત્રાલયે તમામ રાજ્યો અને કેન્દ્રશાસિત પ્રદેશોને આદેશ આપ્યો છે કે સરહદી વિસ્તારોમાં દેખરેખ વધારવામાં આવે જેથી ભવિષ્યમાં આવી ઘૂસણખોરી અટકાવી શકાય.
