વિરાટ કોહલી પાસે એશિયાનો નંબર-1 બેટ્સમેન બનવાની સુવર્ણ તક, માત્ર 29 રન બનાવતા જ તૂટશે પાકિસ્તાની ખેલાડીનો રેકોર્ડ
રોયલ ચેલેન્જર્સ બેંગલુરુ (RCB) ના દિગ્ગજ બેટ્સમેન વિરાટ કોહલી આઈપીએલ 2026ની પ્રથમ મેચમાં સનરાઈઝર્સ હૈદરાબાદ સામે મેદાનમાં ઉતરશે. બેંગલુરુના હોમ ગ્રાઉન્ડ એમ. ચિન્નાસ્વામી સ્ટેડિયમમાં રમાનારી આ મેચ પર સમગ્ર વિશ્વની નજર ટકેલી છે, કારણ કે લાંબા સમય બાદ ‘કિંગ કોહલી’ ક્રિકેટના મેદાનમાં પરત ફરી રહ્યા છે. આ મેચ માત્ર વાપસી માટે જ નહીં, પરંતુ એક મોટા રેકોર્ડ માટે પણ મહત્વની છે. વિરાટ પાસે આ મેચમાં ટી20 ફોર્મેટમાં એશિયાનો નંબર-1 બેટ્સમેન બનવાની શાનદાર તક છે.
શોએબ મલિકના રેકોર્ડ પર ખતરો
વર્તમાન આંકડાઓ મુજબ, ટી20 ફોર્મેટમાં એશિયા તરફથી સૌથી વધુ રન બનાવવાનો રેકોર્ડ પાકિસ્તાનના પૂર્વ ખેલાડી શોએબ મલિકના નામે છે. મલિકે પોતાની કારકિર્દીમાં કુલ 557 મેચ રમીને 13,571 રન બનાવ્યા છે. બીજી તરફ, વિરાટ કોહલી અત્યાર સુધી 414 મેચોમાં 13,543 રન બનાવી ચૂક્યો છે. હવે વિરાટને શોએબ મલિકને પાછળ છોડીને એશિયાનો સૌથી સફળ ટી20 બેટ્સમેન બનવા માટે માત્ર 29 રનની જરૂર છે. ચાહકોને આશા છે કે હૈદરાબાદ સામેની પ્રથમ મેચમાં જ વિરાટ આ આંકડો પાર કરી લેશે.
ટી20 ફોર્મેટમાં વિરાટ કોહલીના દબદબા સમાન આંકડા
વિરાટ કોહલીના ટી20 કરિયર પર નજર કરીએ તો તે અત્યંત પ્રભાવશાળી છે. તેણે અત્યાર સુધી રમેલી 414 મેચોમાં 41.92ની શાનદાર સરેરાશ અને 134.67ના સ્ટ્રાઈક રેટ સાથે રન બનાવ્યા છે. તેના નામે આ ફોર્મેટમાં 105 અડધી સદી અને 9 સદી નોંધાયેલી છે. કોહલી જે રીતે હાલમાં ફોર્મમાં છે, તે જોતા 29 રન બનાવવો તેના માટે બહુ મોટો પડકાર જણાતો નથી.
ક્રિસ ગેલનો વર્લ્ડ રેકોર્ડ હજુ પણ ઘણો દૂર
જોકે એશિયામાં વિરાટ નંબર-1 બની શકે છે, પરંતુ વિશ્વ સ્તરે ક્રિસ ગેલનો રેકોર્ડ તોડવા માટે તેણે હજુ ઘણી મજલ કાપવી પડશે. ટી20 ક્રિકેટમાં સૌથી વધુ રન બનાવવાનો રેકોર્ડ વેસ્ટ ઈન્ડિઝના ‘યુનિવર્સ બોસ’ ક્રિસ ગેલના નામે છે. ગેલે 463 મેચોમાં 14,562 રન બનાવ્યા છે, જેમાં રેકોર્ડબ્રેક 22 સદીઓ સામેલ છે. વિરાટ કોહલી અત્યારે સૌથી વધુ રન બનાવનારા બેટ્સમેનોની યાદીમાં 7મા સ્થાને છે અને ગેલને પાછળ છોડવા માટે તેને હજુ 1,020 રનની જરૂર છે.
