અજબ ગજબ! ગુજરાતમાં એક જ વ્યક્તિ કેવી રીતે બની ભાજપ, કોંગ્રેસ અને AAPનો ઉમેદવાર?
ચૂંટણીનો માહોલ હોય એટલે પક્ષપલટો કે ટિકિટ માટેની ખેંચતાણ સામાન્ય વાત છે. સામાન્ય રીતે કોઈ પણ ઉમેદવાર એક પક્ષ તરફથી પોતાનું નામાંકન ફોર્મ ભરે છે, પરંતુ દાહોદ જિલ્લા પંચાયતની પિપેરો બેઠક પર કંઈક અલગ જ ખેલ જોવા મળ્યો છે. અહીં ભરત સિંહ વખાલા નામના ઉમેદવારે ભાજપ (BJP), કોંગ્રેસ અને આમ આદમી પાર્ટી (AAP) એમ ત્રણેય પક્ષોના સત્તાવાર ઉમેદવાર તરીકે ફોર્મ ભરીને સૌને ચોંકાવી દીધા છે.
કોણ છે આ ભરત સિંહ વખાલા?
ભરત સિંહ વખાલા પિપેરો વિસ્તારના જાણીતા ચહેરા છે. રસપ્રદ વાત એ છે કે તેમનો રાજકીય ઈતિહાસ ઘણો વળાંકો વાળો રહ્યો છે. તેઓ અગાઉ કોંગ્રેસમાં હતા, ત્યારબાદ ‘આપ’માં જોડાયા અને વિધાનસભા ચૂંટણીમાં ભાજપના ગઢ ગણાતા આ વિસ્તારમાં કડક ટક્કર આપી હતી. તાજેતરમાં તેઓ ભાજપના શરણે ગયા હોવાની પણ ચર્ચા હતી. પરંતુ જ્યારે ફોર્મ ચકાસણીની વાત આવી ત્યારે ખબર પડી કે તેમણે તો ત્રણેય દરવાજા ખુલ્લા રાખ્યા છે.
વહીવટી ગૂંચવણ: 11 ફોર્મ અને એક જ ચહેરો
પિપેરો બેઠક માટે કુલ 11 નામાંકન ફોર્મ ભરાયા હતા. જ્યારે ચૂંટણી અધિકારીઓએ આ ફોર્મની તપાસ કરી ત્યારે એક વિચિત્ર વહીવટી કોયડો સામે આવ્યો:
ભાજપ: કુલ 5 ફોર્મ ભરાયા, જેમાં એક વખાલાનું છે.
કોંગ્રેસ: 2 ફોર્મ ભરાયા, જેમાં પણ એક વખાલાનું છે.
AAP: માત્ર 1 ફોર્મ ભરાયું અને તે પણ વખાલાનું જ છે! આ સિવાય અપક્ષ અને અન્ય પાર્ટીના ફોર્મ અલગ છે. ટેકનિકલી જોતા, ત્રણેય મુખ્ય પક્ષોએ એક જ વ્યક્તિને પોતાના સંભવિત ઉમેદવાર તરીકે રજૂ કર્યા હોય તેવું ચિત્ર ઊભું થયું છે.
કાયદાકીય ગૂંચ અને ‘મેન્ડેટ’નો ખેલ
ચૂંટણીના નિયમો મુજબ, તમે ફોર્મ ભલે ગમે તેટલા ભરો, પણ તમારી ઉમેદવારી ત્યારે જ માન્ય ગણાય જ્યારે પાર્ટી તમને ‘ફોર્મ-બી’ એટલે કે સત્તાવાર મેન્ડેટ આપે. ભરત સિંહ વખાલાએ ત્રણેય પાર્ટીના નામે ફોર્મ તો ભરી દીધા છે, પણ હવે સવાલ એ છે કે આખરી સમયે તેઓ કઈ પાર્ટીનું મેન્ડેટ રજૂ કરે છે?
સ્થાનિક ચૂંટણી અધિકારીઓના જણાવ્યા અનુસાર, ખરી સ્થિતિ ફોર્મ ખેંચવાના છેલ્લા દિવસે જ સ્પષ્ટ થશે. જો ઉમેદવાર એક પક્ષનું મેન્ડેટ જમા કરાવે તો બાકીના પક્ષોના ફોર્મ આપોઆપ રદ થઈ જાય અથવા તેમને અપક્ષ તરીકે ગણવામાં આવે (જો તેઓ ફોર્મ પાછું ન ખેંચે તો).
રાજકીય ગલીઓમાં ગણગણાટ
પિપેરો બેઠક એ ભાજપના વરિષ્ઠ નેતા બચુભાઈ ખાબડનો ગઢ માનવામાં આવે છે. આવા મજબૂત ગઢમાં વખાલાએ જે રીતે ત્રણેય પક્ષોમાં પોતાની પકડ બતાવી છે, તેનાથી રાજકીય ગલીઓમાં અનેક ચર્ચાઓ જાગી છે. લોકો મજાકમાં કહી રહ્યા છે કે, “વખાલાએ એવી રમત રમી છે કે હાર ભલે ગમે તે પક્ષની થાય, જીત તો એમની જ થવાની છે!”
