‘બ્રાયન લારાની ઝલક’: એલન બોર્ડર બન્યા 14 વર્ષના વૈભવ સૂર્યવંશીના ફેન, પરંતુ સાથે જ આપી એક મોટી ચેતવણી
ઓસ્ટ્રેલિયાના પૂર્વ કેપ્ટન અને વિશ્વ ક્રિકેટના દિગ્ગજ બેટ્સમેન એલન બોર્ડર હાલમાં ઇન્ટરનેશનલ માસ્ટર્સ લીગના સંદર્ભમાં ભારત પ્રવાસે છે. મુંબઈની મુલાકાત દરમિયાન બોર્ડરે માત્ર પોતાના સુવર્ણકાળને જ યાદ નથી કર્યો, પરંતુ ભારતીય ક્રિકેટના એક એવા હીરા વિશે પણ વાત કરી છે જે અત્યારે ચર્ચાના ચગડોળે છે. 1987માં ઓસ્ટ્રેલિયાને પ્રથમ વખત વર્લ્ડ ચેમ્પિયન બનાવનાર બોર્ડરનું ધ્યાન 14 વર્ષના યુવા બેટ્સમેન વૈભવ સૂર્યવંશી પર ગયું છે, જે અત્યારે રાજસ્થાન રોયલ્સનો હિસ્સો છે.
વૈભવની તાકાત જોઈને દંગ રહી ગયા એલન બોર્ડર
એક જાણીતા અખબાર સાથેની વાતચીતમાં બોર્ડરે વૈભવ સૂર્યવંશીની બેટિંગ પ્રતિભા વિશે ખુલીને વાત કરી હતી. તેમણે કહ્યું, “મને લાગે છે કે વૈભવ એક અદભૂત ખેલાડી છે. મેં મારા જીવનમાં 14 કે 15 વર્ષની ઉંમરના કોઈ પણ છોકરાને ક્રિકેટ બોલને આટલી જોરથી અને તાકાતથી ફટકારતા ક્યારેય જોયો નથી.”
બોર્ડરે વૈભવની ઉંમર કે તેની પ્રસિદ્ધિ કરતા પણ તેના ‘હિટિંગ પાવર’ પર વધુ ભાર મૂક્યો હતો. વર્લ્ડ કપ વિજેતા કેપ્ટન જ્યારે કોઈ કિશોર માટે આવું કહે, ત્યારે તે કોઈ સામાન્ય વાત નથી. વૈભવના બેટમાંથી નીકળતી તાકાત જ તેને અન્ય યુવા ખેલાડીઓથી અલગ પાડે છે.
બ્રાયન લારા સાથે સરખામણી: પ્રતિભાની ઓળખ
બોર્ડરે વૈભવની સરખામણી વેસ્ટ ઇન્ડિઝના લેજન્ડરી બેટ્સમેન બ્રાયન લારા સાથે કરી છે. તેમણે જણાવ્યું કે, “હું અત્યારે એ ભવિષ્યવાણી તો નથી કરી શકતો કે તે એક સફળ ટેસ્ટ ક્રિકેટર બનશે કે નહીં, પરંતુ તેનામાં મને બ્રાયન લારાની ઝલક સ્પષ્ટ દેખાય છે. તેની પાસે મેદાનના દરેક ખૂણે શૉટ્સ ફટકારવાની ક્ષમતા છે.” લારા જેવી રેન્જ અને બેટિંગમાં આઝાદી હોવી એ વૈભવ માટે બહુ મોટું સન્માન છે, પરંતુ બોર્ડરે સ્પષ્ટ કર્યું કે હજુ તેને ઘણો લાંબો રસ્તો કાપવાનો બાકી છે.
દિગ્ગજની ચેતવણી: ‘ડિફેન્સ’ મજબૂત કરવો પડશે
માત્ર વખાણ કરીને અટકવાને બદલે, એલન બોર્ડરે એક મોટા ભાઈ અને કોચની જેમ વૈભવને કામ કરવાની દિશા પણ બતાવી છે. તેમણે એક અત્યંત મહત્વની ચેતવણી આપતા કહ્યું
“વૈભવે હવે એ શીખવું પડશે કે પોતાના ડિફેન્સ (રક્ષણાત્મક રમત) ને કેવી રીતે મજબૂત બનાવવો.”
આ એક નાનકડું વાક્ય વૈભવની કારકિર્દી માટે સૌથી મહત્વનું સાબિત થઈ શકે છે. પાવર અને હિટિંગ ક્ષમતા કોઈ પણ ખેલાડીને રાતોરાત સ્ટાર બનાવી શકે છે, પરંતુ એક મજબૂત ડિફેન્સ જ તેને લાંબી રેસનો ઘોડો બનાવે છે. જો વૈભવને દરેક પ્રકારની પરિસ્થિતિ અને પિચ પર ટકી રહેવું હોય, તો તેણે પોતાની રક્ષણાત્મક રમતને સુધારવી જ પડશે.
1987ના વર્લ્ડ કપની યાદો તાજી થઈ
આ મુલાકાત દરમિયાન બોર્ડરે 39 વર્ષ પહેલા ઈડન ગાર્ડન્સમાં ઈંગ્લેન્ડને હરાવીને જીતેલા વર્લ્ડ કપને પણ યાદ કર્યો હતો. તેમણે માઈક ગેટિંગના તે પ્રખ્યાત ‘રિવર્સ સ્વીપ’ શૉટ વિશે વાત કરી, જેણે મેચનો આખો રૂખ ઓસ્ટ્રેલિયા તરફ વાળી દીધો હતો. બોર્ડરે સ્વીકાર્યું કે ઈડન ગાર્ડન્સની તે જીત તેમની કેપ્ટન્સીની સૌથી યાદગાર ક્ષણોમાંની એક છે અને ભારત આવવાથી તે યાદો ફરી તાજી થઈ ગઈ છે.
