રોકાણકારોમાં ફફડાટ! કૂડ ઓઈલમાં ઉછાળા વચ્ચે માત્ર આ એક સેક્ટરે દર્શાવી મજબૂતી.
શુક્રવારના ટ્રેડિંગ સેશનમાં ભારતીય શેરબજારમાં ભારે ઘટાડા સાથે લાલ નિશાનમાં શરૂઆત થઈ છે. વૈશ્વિક સ્તરે વધતા તણાવ અને ક્રૂડ ઓઈલના ભાવમાં અચાનક થયેલા તીવ્ર ઉછાળાના કારણે બજારના રોકાણકારોમાં ભારે ગભરાટ જોવા મળ્યો હતો. પરિણામે, કારોબારની શરૂઆતમાં જ બોમ્બે સ્ટોક એક્સચેન્જ (BSE) નો બેન્ચમાર્ક ઈન્ડેક્સ સેન્સેક્સ ૭૦૦ થી વધુ પોઈન્ટ ગગડી ગયો હતો, જ્યારે નેશનલ સ્ટોક એક્સચેન્જ (NSE) નો નિફ્ટી પણ ૨૩,૨૫૦ ના મહત્વપૂર્ણ સપોર્ટ લેવલની નીચે સરકી ગયો હતો. આજે તમામ સેક્ટર્સમાં વ્યાપક વેચવાલીનું દબાણ જોવા મળી રહ્યું છે.
ક્રૂડ ઓઈલમાં ઉછાળો અને પશ્ચિમ એશિયામાં વધતો તણાવ
શેરબજારમાં આ મોટા ઘટાડા પાછળનું મુખ્ય કારણ આંતરરાષ્ટ્રીય બજારમાં કૂડ ઓઈલના ભાવમાં થયેલો વિસ્ફોટક વધારો છે. બ્રેન્ટ ક્રૂડનો ભાવ ચાર મહિનાની ઉચ્ચતમ સપાટીએ પહોંચીને પ્રતિ બેરલ $૧૦૮.૭૭ પર ટ્રેડ થઈ રહ્યો હતો. પશ્ચિમ એશિયા (મિડલ ઈસ્ટ) માં ચાલી રહેલો સંઘર્ષ વધુ તીવ્ર બન્યો છે. ખાસ કરીને રાતા સમુદ્ર (Red Sea) અને હોર્મુઝની સમુદ્રધુની (Strait of Hormuz) નજીક પુરવઠામાં વિક્ષેપ પડવાની આશંકાઓને કારણે વૈશ્વિક બજારમાં તેલની અછત સર્જાવાનો ભય ઊભો થયો છે. ભારત પોતાની જરૂરિયાતનું મોટાભાગનું તેલ આયાત કરતું હોવાથી, કૂડના ભાવ વધવાથી દેશના અર્થતંત્ર અને બજાર પર સીધી પ્રતિકૂળ અસર પડી છે.
શરૂઆતી કારોબારમાં સેન્સેક્સ અને નિફ્ટીની સ્થિતિ
સવારે ૯:૧૮ વાગ્યાના સુમારે, બીએસઈ સેન્સેક્સ ૭૦૧.૬૩ પોઈન્ટ અથવા ૦.૯૪% ના ઘટાડા સાથે ૭૪,૨૦૦.૯૬ ના મથાળે ટ્રેડ થઈ રહ્યો હતો. બીજી તરફ, એનએસઈ નિફ્ટી પણ ૨૩૯.૦૫ પોઈન્ટ અથવા ૧.૦૨% નો ઘટાડો નોંધાવીને ૨૩,૨૩૭.૭૫ ના સ્તરે આવી ગયો હતો.
માત્ર લાર્જકેપ શેરો જ નહીં, પરંતુ બ્રોડર માર્કેટમાં પણ વેચવાલીનો માહોલ જોવા મળ્યો હતો. સ્મોલકેપ અને મિડકેપ શેરો પણ દબાણ હેઠળ આવ્યા હતા. આંકડાઓ મુજબ, ‘નિફ્ટી નેક્સ્ટ ૫૦’ ઈન્ડેક્સમાં ૧.૪૫% નો કડાકો બોલાયો હતો. જ્યારે ‘નિફ્ટી મિડકેપ ૧૦૦’ ૧.૨૮% અને ‘નિફ્ટી સ્મોલકેપ ૧૦૦’ ૧.૨૨% ઘટીને ટ્રેડ થઈ રહ્યા હતા.
સેક્ટર વાઈઝ પ્રદર્શન: મેટલ અને રિયલ્ટીમાં સૌથી વધુ ધોવાણ
સેક્ટરલ ઈન્ડેક્સ પર નજર કરીએ તો, ‘નિફ્ટી મેટલ’ સૌથી વધુ નુકસાન સહન કરનાર સેક્ટર બન્યું હતું, જે શરૂઆતી ટ્રેડિંગમાં ૨.૯૮% જેટલું તૂટ્યું હતું. આ સિવાય ‘નિફ્ટી રિયલ્ટી’ માં ૨.૪૧% નો ઘટાડો નોંધાયો હતો. ‘નિફ્ટી ફાઇનાન્સિયલ સર્વિસિસ’, ‘કન્ઝ્યુમર ડ્યુરેબલ્સ’ અને ‘કેમિકલ્સ’ ક્ષેત્રના શેરો પણ ૧% થી વધુ ઘટીને રેડ ઝોનમાં ટ્રેડ થઈ રહ્યા હતા.
બેંકિંગ ક્ષેત્રના શેરોમાં પણ કમજોરી જોવા મળી હતી. ‘નિફ્ટી બેંક’ ૧.૩૪% અને ‘નિફ્ટી ફાઇનાન્સિયલ સર્વિસિસ’ ૧.૫૫% નીચા સ્તરે પહોંચી ગયા હતા. સરકારી બેંકોનો ‘પીએસયુ બેંક’ ઈન્ડેક્સ ૧.૪૨% અને ખાનગી બેંકોનો ‘પ્રાઈવેટ બેંક’ ઈન્ડેક્સ ૧.૨૮% તૂટ્યો હતો.
અન્ય મહત્વપૂર્ણ સેક્ટર્સમાં, ‘નિફ્ટી ઓટો’ ૧.૪૨%, સિમેન્ટ સેક્ટર ૧.૨૯% અને ‘ઓઈલ એન્ડ ગેસ’ ૦.૬૭% ઘટીને ટ્રેડ થઈ રહ્યા હતા. જોકે, એફએમસીજી (FMCG) સેક્ટરે અન્ય સેક્ટર્સની સરખામણીએ થોડી મજબૂતી દર્શાવી હતી અને તે માત્ર ૦.૪૫% ના મામૂલી ઘટાડા સાથે કામકાજ કરી રહ્યું હતું.
આઈટી સેક્ટરે બજારને આપ્યો ટેકો
આજના આ વ્યાપક કડાકા વચ્ચે માત્ર માહિતી અને ટેકનોલોજી (IT) સેક્ટરે બજારના પ્રવાહથી વિરુદ્ધ જઈને સકારાત્મક પ્રદર્શન કર્યું હતું. ‘નિફ્ટી આઈટી’ ઈન્ડેક્સ શરૂઆતી કારોબારમાં ૦.૪૪% નો વધારો નોંધાવીને લીલા નિશાનમાં ટ્રેડ થઈ રહ્યો હતો. ઉપલબ્ધ ડેટા મુજબ, તે સમયે આઈટી સિવાયનો અન્ય કોઈ મુખ્ય સેક્ટરલ ઈન્ડેક્સ પોઝિટિવ ઝોનમાં નહોતો.
આ સિવાય હેલ્થકેર અને ફાર્મા સેક્ટરમાં ઘટાડો મર્યાદિત રહ્યો હતો. ‘નિફ્ટી હેલ્થકેર’ ઈન્ડેક્સમાં ૦.૫૬% અને ‘નિફ્ટી ફાર્મા’ માં ૦.૫૮% નો સાધારણ ઘટાડો જોવા મળ્યો હતો.
