સુરત: કતારગામ ઝોન ઓફિસમાં અધિકારી અને કર્મચારી વચ્ચે મારામારી, વીડિયો વાયરલ થતા ખળભળાટ
સુરત મહાનગરપાલિકાની કતારગામ ઝોન ઓફિસમાં એક શરમજનક ઘટના સામે આવી છે. ઓફિસના પાર્કિંગમાં એક અધિકારી અને કર્મચારી વચ્ચે જાહેરમાં મારામારી થતા સમગ્ર પંથકમાં ચર્ચાનો વિષય બન્યો છે. આ મારામારીનો વીડિયો સોશિયલ મીડિયા પર વાયરલ થતા પાલિકા તંત્રની કામગીરી અને શિસ્ત સામે ગંભીર સવાલો ઉભા થયા છે.
વસ્તી ગણતરીની બાબતે શરૂ થયો વિવાદ
મળતી માહિતી મુજબ, આ સમગ્ર વિવાદ વસ્તી ગણતરીની કામગીરીને લઈને શરૂ થયો હતો. ઓફિસમાં કામકાજ દરમિયાન અધિકારી અને કર્મચારી વચ્ચે કોઈ બાબતે બોલાચાલી થઈ હતી, જેનું સ્વરૂપ એટલું ઉગ્ર બની ગયું કે મામલો મારામારી સુધી પહોંચ્યો હતો. ઓફિસની અંદર શરૂ થયેલી આ તકરાર ત્યારબાદ પાર્કિંગ એરિયામાં પણ ચાલુ રહી હતી.
પટ્ટા વડે માર મારતા વીડિયો થયો વાયરલ
મામલો માત્ર બોલાચાલી પૂરતો સીમિત ન રહેતા મારામારીમાં ફેરવાઈ ગયો હતો. એવી વિગતો પણ સામે આવી રહી છે કે, પાર્કિંગમાં અધિકારી અને કર્મચારી વચ્ચે છૂટ્ટા હાથની મારામારી થઈ હતી અને આ દરમિયાન પટ્ટા (બેલ્ટ) વડે પણ એકબીજાને માર મારવામાં આવ્યો હતો. આ સમગ્ર ઘટનાક્રમ ત્યાં હાજર કોઈ વ્યક્તિએ પોતાના મોબાઈલમાં કેદ કરી લીધો હતો, જે હવે સોશિયલ મીડિયા પર જોરશોરથી વાયરલ થઈ રહ્યો છે.
તંત્રની છબી ખરડાઈ, તપાસની માંગ
સરકારી કચેરી જેવી ગંભીર જગ્યાએ અધિકારીઓ અને કર્મચારીઓ દ્વારા કરવામાં આવેલી આ પ્રકારની વર્તણૂકને કારણે પાલિકાની છબી ખરડાઈ છે. વીડિયો વાયરલ થયા બાદ હવે જવાબદાર લોકોની કામગીરી અને તેમની શિસ્ત પર અનેક સવાલો ઉઠી રહ્યા છે. શું આ મામલે ઉચ્ચ અધિકારીઓ દ્વારા કોઈ કડક તપાસ કરવામાં આવશે કે પછી આ ઘટનાને દબાવી દેવામાં આવશે, તે હવે જોવું રહ્યું. સ્થાનિકોમાં આ ઘટનાને લઈને ભારે રોષ જોવા મળી રહ્યો છે.
