પીએમ મોદી અને મેલોનીની ઇન્સ્ટા-કેમેસ્ટ્રીથી લઈને ટ્રમ્પના જોક્સ સુધી; હોટ માઇકે ખોલ્યા વૈશ્વિક નેતાઓના રહસ્યો
વૈશ્વિક રાજકારણની સર્વોચ્ચ ગણાતી જી-૭ (G7) શિખર સંમેલનની બેઠકો સામાન્ય રીતે ગંભીર ચર્ચાઓ, આર્થિક કરારો અને વ્યુહાત્મક નિવેદનો માટે જાણીતી છે. પરંતુ ફ્રાન્સના રમણીય શહેર એવિયનમાં યોજાયેલી આ વર્ષની સમિટમાં કંઈક એવું બન્યું જેણે સોશિયલ મીડિયાથી લઈને વૈશ્વિક મીડિયા સુધી ધૂમ મચાવી દીધી છે. બંધ બારણે થતી નેતાઓની અનૌપચારિક વાતચીત દરમિયાન અકસ્માતે ચાલુ રહી ગયેલા ઓડિયો માઇક્રોફોન એટલે કે ‘હોટ માઇક’ (Hot Mic) ને કારણે વિશ્વના સૌથી શક્તિશાળી નેતાઓના અંગત રહસ્યો, રમુજી કિસ્સાઓ અને પરસ્પરની મજાક દુનિયાની સામે આવી ગઈ છે. સત્તાવાર એજન્ડાથી દૂર, આંતરરાષ્ટ્રીય મંચ પાછળ નેતાઓનું માનવીય અને હળવું અંદાજ કેવું હોય છે, તેનો જીવંત પુરાવો આ વાયરલ ઓડિયો ક્લિપ્સે આપ્યો છે.
ફ્રાન્સમાં આયોજિત જી-૭ સમિટમાં વિશ્વના સાત સૌથી મોટા વિકસિત અર્થતંત્રો — અમેરિકા, બ્રિટન, ફ્રાન્સ, જર્મની, ઇટાલી, જાપાન અને કેનેડા સહિત યુરોપિયન યુનિયનના વડાઓ એકત્રિત થયા હતા. આ સમિટમાં ભારત, બ્રાઝિલ અને યુક્રેન જેવા મહત્વના ભાગીદાર દેશોને પણ વિશેષ આમંત્રણ અપાયું હતું. ગંભીર વૈશ્વિક આર્થિક પડકારો અને યુદ્ધની સ્થિતિ વચ્ચે હોટ માઇકે વૈશ્વિક નેતાઓની એવી હળવી ક્ષણો દુનિયા સમક્ષ મૂકી છે, જે સામાન્ય રીતે ક્યારેય બહાર આવતી નથી.
મેલોનીનું ધૂમ્રપાન છોડવું અને સાથી નેતાઓની તાળીઓ
સમિટની સત્તાવાર બેઠક શરૂ થાય તે પહેલાં જર્મનીના ચાન્સેલર ફ્રેડરિક મેર્ઝે ઇટાલીના વડા પ્રધાન જ્યોર્જિયા મેલોનીને સહજતાથી પૂછ્યું કે, શું તેમણે આજે સવારે સિગારેટ પીધી છે? આ સવાલના જવાબમાં મેલોનીએ ગર્વથી કહ્યું કે તેમણે ૧લી મેથી ધૂમ્રપાન સંપૂર્ણપણે છોડી દીધું છે. આ સાંભળીને નજીક ઊભેલા બ્રિટનના પીએમ કીર સ્ટારમર, કેનેડાના પીએમ માર્ક કાર્ને અને જાપાનના પીએમ સાને તાકાઈચી આશ્ચર્યચકિત થઈ ગયા અને તાળીઓ પાડીને મેલોનીને વધાવી લીધા હતા. આ દરમિયાન માર્ક કાર્નેએ મજાકમાં પૂછ્યું કે, “શું તમે નિકોટિન પેચનો ઉપયોગ કરો છો?”, જેના પર આખું જૂથ હસી પડ્યું હતું.
પીએમ મોદી અને મેલોની વચ્ચે સોશિયલ મીડિયાની ચર્ચા
દર વખતની જેમ આ સમિટમાં પણ ભારતના વડા પ્રધાન નરેન્દ્ર મોદી અને જ્યોર્જિયા મેલોનીની મુલાકાત સોશિયલ મીડિયા પર આકર્ષણનું કેન્દ્ર બની હતી. ફેમિલી ફોટોગ્રાફ પહેલાં બંને નેતાઓ ઉષ્માભેર મળ્યા ત્યારે મેલોનીએ હસીને કહ્યું, “તમને ફરીથી જોઈને આનંદ થયો.” જેના જવાબમાં પીએમ મોદીએ સોશિયલ મીડિયા અને ઇન્સ્ટાગ્રામ પર તેમની મુલાકાતોની લોકપ્રિયતાનો ઉલ્લેખ કર્યો. મેલોનીએ તુરંત હસતાં હસતાં જવાબ આપ્યો કે, “હા, આપણે ઇન્સ્ટાગ્રામ પર સૌથી વધુ પ્રખ્યાત છીએ.” આ મનમોહક સંવાદ સાંભળીને આસપાસના અન્ય દેશોના રાજદ્વારીઓ પણ હસવા રોકી શક્યા નહોતા.
ડોનાલ્ડ ટ્રમ્પની રમુજી અટકળો અને ગિફ્ટ
સમિટમાં અમેરિકી રાષ્ટ્રપતિ ડોનાલ્ડ ટ્રમ્પ હંમેશ મુજબ ચર્ચામાં રહ્યા. વર્કિંગ લંચ દરમિયાન જ્યારે ફ્રાન્સના રાષ્ટ્રપતિ ઇમેન્યુઅલ મેક્રોન ભૂલથી પોતાની ઘડિયાળ ટેબલ પર મૂકીને જતા રહ્યા, ત્યારે કેનેડાના પીએમએ બૂમ પાડી. આ સાંભળી ટ્રમ્પે તુરંત મજાક કરી, “જો તે ઘડિયાળ ભૂલી ગયા હોય, તો તે મને આપી દો.”
આ ઉપરાંત, ફ્રાન્સમાં યોજાનારી સાયકલિંગ વર્લ્ડ ચેમ્પિયનશિપના પ્રમોશન માટે મેક્રોને ટ્રમ્પ સહિતના નેતાઓને એક અદ્યતન સાયકલ ભેટ આપી હતી. કસરતથી દૂર રહેતા ટ્રમ્પ માટે આ ભેટ કૌતુકનો વિષય બની હતી. તે જ સમયે જર્મન ચાન્સેલર ફ્રેડરિક મેર્ઝે ટ્રમ્પને જર્મન રાષ્ટ્રીય ફૂટબોલ ટીમની ટી-શર્ટ ભેટ આપી, જેના પર ‘ટ્રમ્પ ૪૭’ લખેલું હતું. આ તેમના ૪૭મા રાષ્ટ્રપતિ પદનો સંકેત હતો. મેર્ઝે આ ફોટો શેર કરીને કેપ્શન આપ્યું, “છેવટે, આપણે બધા એક જ ટીમમાં છીએ.”
ચાઈનીઝ કાર અને ગ્રીનલેન્ડનું રહસ્ય
હોટ માઇકમાં અન્ય એક મહત્વની ચર્ચા કેનેડાના વડા પ્રધાન માર્ક કાર્ને અને ટ્રમ્પ વચ્ચે થઈ, જેમાં કેનેડાએ ચીની ઇલેક્ટ્રિક વાહનોની આયાત પર મુકેલી કડક મર્યાદા (માત્ર ૪૯,૦૦૦ કાર અથવા ૩ ટકા માર્કેટ શેર) વિશે વાત કરી. કાર્નેએ ટ્રમ્પને કહ્યું કે, “અમે સખત મર્યાદા રાખી છે, મને લાગ્યું કે તમને આ ગમશે.” જેના પર ટ્રમ્પે સંતોષ વ્યક્ત કર્યો. જોકે, યુરોપિયન કાઉન્સિલના પ્રમુખ એન્ટોનિયો કોસ્ટા સાથેની વાતચીતમાં ટ્રમ્પે અચાનક “ગ્રીનલેન્ડ” શબ્દ ઉચ્ચાર્યો હતો, જે ભૂતકાળમાં ગ્રીનલેન્ડ ખરીદવાની તેમની ઈચ્છા સાથે જોડીને જોવામાં આવી રહ્યો છે.
આ સાથે જ ફ્રેન્ચ રાષ્ટ્રપતિ મેક્રોન યુક્રેનના રાષ્ટ્રપતિ ઝેલેન્સકી સાથે ટ્રમ્પની વન-ટુ-વન મુલાકાત ગોઠવવા માટે ડિપ્લોમેટિક આયોજન કરતા પણ કેમેરામાં કેદ થયા હતા. આ તમામ કિસ્સાઓ દર્શાવે છે કે જી-૭ જેવી હાઈ-પ્રોફાઈલ સમિટમાં ગંભીર મુદ્દાઓ ઉપરાંત નેતાઓ વચ્ચે ગાઢ મિત્રતા અને હળવી નોકઝોક પણ ચાલતી હોય છે.
