ઈરાન અને અમેરિકા વચ્ચે ગુપ્ત યુદ્ધના એંધાણ, અધિકારીઓની સુરક્ષા માટે ઉચ્ચ સ્તરીય બેઠકોનો દોર
પશ્ચિમ એશિયા અને વૈશ્વિક રાજકારણમાંથી એક અત્યંત ચોંકાવનારા અને ખળભળાટ મચાવનારા અહેવાલ સામે આવ્યા છે. અમેરિકી ગુપ્તચર એજન્સીઓને મળેલી માહિતી મુજબ, ઈરાન દ્વારા અમેરિકા સામે બદલો લેવા માટે એક ખાનગી અને અત્યંત ખતરનાક યોજના પર કામ કરવામાં આવી રહ્યું છે. એવા ગંભીર દાવા કરવામાં આવી રહ્યા છે કે ઈરાન વોશિંગ્ટન ડીસીમાં વ્હાઇટ હાઉસ અને ટ્રમ્પ વહીવટીતંત્રના વરિષ્ઠ તથા ટોચના અમેરિકી અધિકારીઓને ‘ચુપચાપ’ અને ગુપ્ત રીતે ખતમ કરવા માટે “ડર્ટી બોમ્બ” (Dirty Bomb) અથવા રાસાયણિક હથિયારોનો ઉપયોગ કરવાની તૈયારી કરી રહ્યું છે. જો કે, તેહરાન તરફથી આ તમામ દાવાઓને સદંતર નકારી કાઢવામાં આવ્યા છે.
અમેરિકી મીડિયા સંસ્થાન ‘સીએનએન’ (CNN) ના અહેવાલ મુજબ, યુએસ ગુપ્તચર સૂત્રોએ દાવો કર્યો છે કે ઈરાનની આ યોજના તાત્કાલિક ધોરણે કોઈ ખુલ્લું યુદ્ધ છેડવાની નથી, પરંતુ ભવિષ્યના વિકલ્પો તૈયાર કરવાની છે. પ્રાપ્ત થયેલી ગુપ્ત માહિતી એટલી ચોક્કસ અને સચોટ છે કે તેમાં સંભવિત લક્ષ્યો અને ચોક્કસ સ્થાનોનો પણ ઉલ્લેખ કરવામાં આવ્યો છે. આ ગંભીર ચેતવણી મળ્યા બાદ અમેરિકી સુરક્ષા પ્રણાલીમાં હલચલ મચી ગઈ છે અને સત્તાવાળાઓએ તાત્કાલિક ધોરણે આકસ્મિક સુરક્ષા યોજનાઓ (Contingency Plans) પર કામ કરવાનું શરૂ કરી દીધું છે.
સિક્રેટ સર્વિસની કાર્યવાહી: ટ્રેઝરી સેક્રેટરીને લશ્કરી આવાસમાં ખસેડાયા
આ સંભવિત અને ગંભીર ખતરાને પહોંચી વલવા માટે અમેરિકી વહીવટીતંત્રના ઉચ્ચ અધિકારીઓએ છેલ્લા કેટલાક દિવસોમાં અનેક ગુપ્ત બેઠકો યોજી છે. આ સુરક્ષા સમીક્ષાઓને અત્યંત સમજદારીભરી અને કડક પગલાં તરીકે જોવામાં આવી રહી છે. ઈરાન તરફથી સતત વધી રહેલા જોખમ અને ધમકીઓને ધ્યાનમાં રાખીને ગત સપ્તાહે યુએસ સિક્રેટ સર્વિસ દ્વારા તાત્કાલિક પગલું ભરવામાં આવ્યું હતું, જેના ભાગરૂપે ટ્રેઝરી સેક્રેટરી સ્કોટ બેસન્ટને તેમના સામાન્ય નિવાસસ્થાનથી ખસેડીને એક સુરક્ષિત લશ્કરી આવાસમાં કરવામાં આવ્યા છે.

વ્હાઇટ હાઉસના પ્રવક્તા લોરેન બિસ (Lauren Bis) એ આ મામલે નિવેદન આપતા જણાવ્યું છે કે અમેરિકી સરકાર દેશ સામેના તમામ સંભવિત ખતરાઓ પર અત્યંત બારીકાઈથી નજર રાખી રહી છે, જો કે હાલના તબક્કે સામાન્ય જનતા કે દેશ માટે કોઈ તાત્કાલિક કે નક્કર જોખમ નથી. તેમ છતાં, સરકારી અધિકારીઓની સુરક્ષા બાબતે કોઈ પણ પ્રકારની બેદરકારી દાખવવામાં આવી રહી નથી.
ઈરાન દ્વારા આરોપોનું ખંડન અને આંતરરાષ્ટ્રીય પ્રતિક્રિયાઓ
બીજી તરફ, સંયુક્ત રાષ્ટ્રસંઘ (UN) માં ઈરાનના સ્થાયી મિશને આ તમામ અહેવાલો અને રાસાયણિક હથિયારોના ઉપયોગના આરોપોને સદંતર ફગાવી દીધા છે. ઈરાની પક્ષે સ્પષ્ટપણે જણાવ્યું છે કે આ ગુપ્ત માહિતી સંપૂર્ણપણે ખોટી, પાયાવિહોણી અને બનાવટી છે. ઈરાને “ડર્ટી બોમ્બ” સંબંધી ગુપ્ત અહેવાલો અંગે કોઈ પણ સીધો અને સકારાત્મક જવાબ આપવાનું ટાળ્યું છે, પરંતુ તેમના કૂટનીતિક પ્રતિનિધિઓએ આને અમેરિકાની રાજકીય ચાલ ગણાવી છે.
ડર્ટી બોમ્બ એ એક પ્રકારનું પરંપરાગત વિસ્ફોટક હથિયાર હોય છે જે પરમાણુ સામગ્રી અથવા કિરણોત્સર્ગી કચરાને વિસ્ફોટ દ્વારા આસપાસના વિસ્તારમાં ફેલાવવા માટે ડિઝાઇન કરવામાં આવે છે. જો કે તે પરમાણુ બોમ્બ જેટલો વિનાશક નથી હોતો, પરંતુ તે વ્યાપક સ્તરે ગભરાટ અને રાસાયણિક પ્રદૂષણ ફેલાવવામાં સક્ષમ હોય છે. ઈરાન અને અમેરિકા વચ્ચે ચાલી રહેલા આ ગુપ્ત તણાવ અને સુરક્ષા એલર્ટને કારણે વૈશ્વિક રાજકારણમાં ફરી એકવાર ગરમાવો આવી ગયો છે, અને આગામી સમયમાં આ મામલે કયા નવા ખુલાસા થાય છે તેના પર આખી દુનિયાની નજર ટકેલી છે.
