પંતની ઘરવાપસી: 12 કરોડના પગાર કાપ સાથે ઋષભ પંત ફરી દિલ્હી કેપિટલ્સમાં જોડાયા
ઇન્ડિયન પ્રીમિયર લીગ (IPL) ના ઇતિહાસમાં એક અત્યંત ચર્ચિત અને સનસનાટીભર્યા ટ્રેડની સત્તાવાર પુષ્ટિ થઈ છે. લાંબા સમયની અટકળો પર પૂર્ણવિરામ મૂકતા, સ્ટાર વિકેટકીપર-બેટર ઋષભ પંત ફરી એકવાર પોતાની જૂની અને પ્રિય ટીમ ‘દિલ્હી કેપિટલ્સ’ (DC) માં પરત ફર્યા છે. આ ટ્રેડની અદલાબદલીમાં, અત્યાર સુધી દિલ્હી કેપિટલ્સનો હિસ્સો રહેલા સ્ટાર સ્પિનર કુલદીપ યાદવ હવે ‘લખનૌ સુપર જાયન્ટ્સ’ (LSG) ની જર્સીમાં જોવા મળશે. IPL ગવર્નિંગ કાઉન્સિલે મંગળવારે આ મોટા સોદા પર મહોર મારી દીધી છે.
ઋષભ પંતની ‘ઘરવાપસી’: લાખોના પગાર કાપ સાથે દિલ્હીમાં આગમન
ઋષભ પંત અને દિલ્હી કેપિટલ્સનો સંબંધ વર્ષો જૂનો છે. પંતે 2016 થી 2024 સુધી આ ફ્રેન્ચાઈઝી માટે નવ વર્ષ વિતાવ્યા હતા અને 111 મેચોમાં ટીમનું પ્રતિનિધિત્વ કર્યું હતું, જે DC માટે એક વિક્રમ છે. વર્ષ 2025માં જ્યારે પંત 27 કરોડ રૂપિયાની તોતિંગ ફી સાથે લખનૌ સુપર જાયન્ટ્સમાં જોડાયા હતા, ત્યારે ચાહકોને ઘણી આશા હતી. જોકે, લખનૌમાં તેમનો સમય ધાર્યા મુજબ રહ્યો નહીં. હવે, ઘરે પરત ફરતી વખતે પંતે મોટું આર્થિક બલિદાન આપ્યું છે. 27 કરોડ રૂપિયાના પગારમાંથી સીધો 12 કરોડનો કાપ મુકાઈને, તેઓ હવે 15 કરોડ રૂપિયાની સુધારેલી ફી પર દિલ્હી કેપિટલ્સમાં ફરી જોડાયા છે. આ નિર્ણય સૂચવે છે કે પંત માટે પૈસા કરતા તેમની જૂની ટીમ સાથેનું જોડાણ અને શાંતિ વધુ મહત્વની બની ગઈ છે.
લખનૌમાં પંતનું નિષ્ફળ પ્રદર્શન અને કેપ્ટનશીપનો અંત
લખનૌ સુપર જાયન્ટ્સ માટે પંતનો કાર્યકાળ અત્યંત નિરાશાજનક રહ્યો. છેલ્લા બે વર્ષમાં (IPL 2025 અને 2026), પંતે 28 મેચ રમી હોવા છતાં માત્ર 581 રન જ બનાવી શક્યા. તેમની બેટિંગમાં તે ધાર જોવા મળી ન હતી જે માટે તેઓ જાણીતા છે. ટીમ પણ સતત બે વર્ષ પ્લેઓફમાં સ્થાન મેળવવામાં નિષ્ફળ રહી, જેના કારણે ફ્રેન્ચાઈઝી અને પંત વચ્ચે મતભેદો હોવાના અહેવાલો વહેતા થયા હતા. સ્થિતિ એટલી હદે વણસી ગઈ કે IPL 2026 માં ટીમ પોઈન્ટ ટેબલમાં સૌથી નીચે રહી. અંતે, પંતે પોતે જ કેપ્ટનશીપ છોડવાની ઓફર કરી અને લખનૌએ સત્તાવાર રીતે જાહેરાત કરી કે પંતને કેપ્ટનશીપની જવાબદારીમાંથી મુક્ત કરવામાં આવ્યા છે.
કુલદીપ યાદવનો નવો અધ્યાય: લખનૌ તરફ પ્રયાણ
આ ટ્રેડનો બીજો મહત્વનો ભાગ છે કુલદીપ યાદવ. દિલ્હી કેપિટલ્સ માટે પાંચ વર્ષ સુધી શાનદાર પ્રદર્શન કરનાર કુલદીપ હવે લખનૌ સુપર જાયન્ટ્સનો ભાગ બનશે. 2022 થી દિલ્હી માટે રમતા કુલદીપે 65 મેચમાં 72 વિકેટ ઝડપી હતી અને ટીમને ઘણી જીત અપાવી હતી. જોકે, IPL 2026 માં તેમનું ફોર્મ પણ કથળ્યું હતું. 12 મેચમાં માત્ર 10 વિકેટ લેતા, તેઓ ટીમના અપેક્ષિત પ્રદર્શનને જાળવી શક્યા નહોતા. કેપ્ટન અક્ષર પટેલ સાથેના મતભેદો અને મહત્વની મેચોમાં સ્પિનરોને મળતી સહાયનો લાભ ન ઉઠાવી શકવાને કારણે દિલ્હી કેપિટલ્સે આ ટ્રેડમાં તેમને રિલીઝ કરવાનો નિર્ણય લીધો હોય તેમ લાગે છે. કુલદીપ હવે 13.50 કરોડ રૂપિયાની હાલની ફી સાથે લખનૌની નવી ટીમ સાથે પોતાની કારકિર્દીને નવી ગતિ આપવા માંગશે.
