ભારતીય મહિલા ક્રિકેટ ટીમ ઓલિમ્પિક્સ માટે ક્વોલિફાય: ૨૦૨૮ લોસ એન્જલસની ટિકિટ કન્ફર્મ, પુરુષ ટીમે હજુ જોવી પડશે રાહ

લોસ એન્જલસ ઓલિમ્પિક ૨૦૨૮: ભારતીય મહિલા ક્રિકેટ ટીમ ડાયરેક્ટ ક્વોલિફાય, પુરુષોની ટીમે ડિસેમ્બર સુધી જોવી પડશે વાટ

આંતરરાષ્ટ્રીય ક્રિકેટ પરિષદ (ICC) અને આંતરરાષ્ટ્રીય ઓલિમ્પિક સમિતિ (IOC) એ ૨૦૨૮માં લોસ એન્જલસમાં યોજાનારા ઓલિમ્પિક્સ માટે ક્રિકેટના રોડમેપની સત્તાવાર જાહેરાત કરી દીધી છે. ઓલિમ્પિકમાં ક્રિકેટની આ ઐતિહાસિક વાપસી થવા જઈ રહી છે, જેમાં પુરુષ અને મહિલા બંને કેટેગરીમાં ૬-૬ ટીમો ભાગ લેશે. ભારત માટે સૌથી મોટા અને ખુશીના સમાચાર એ છે કે મહિલા ટીમે ઓલિમ્પિક ટિકિટ મેળવી લીધી છે, જ્યારે પુરુષોની ટીમે હજુ થોડી રાહ જોવી પડશે.

મહિલા ટીમ ઇન, પુરુષોની ટીમ રેન્કિંગના ભરોસે

ICC મહિલા T20 વર્લ્ડ કપ ૨૦૨૬ ના પ્રદર્શનના આધારે ઓસ્ટ્રેલિયા, ગ્રેટ બ્રિટન (ઇંગ્લેન્ડ), ભારત અને દક્ષિણ આફ્રિકાએ સીધું ક્વોલિફિકેશન મેળવી લીધું છે. આફ્રિકા, એશિયા, યુરોપ અને ઓશનિયા ખંડમાંથી સર્વશ્રેષ્ઠ સ્થાન મેળવનારી આ ટીમોને સીધી એન્ટ્રી મળી છે.

બીજી તરફ, ભારતની પુરુષોની ટીમે હજુ સત્તાવાર ક્વોલિફિકેશન માટે ૩૧ ડિસેમ્બર, ૨૦૨૬ સુધી રાહ જોવી પડશે. પુરુષોની સ્પર્ધામાં બાકીના સ્થાનો ICC T20I રેન્કિંગના આધારે નક્કી થશે. જો ડિસેમ્બરના અંત સુધીમાં ભારતીય પુરુષ ટીમ એશિયા ખંડમાં સર્વોચ્ચ ક્રમાંકિત પાત્ર ટીમ રહેશે, તો જ તેમનો રસ્તો સાફ થશે.

રાયડુની સલાહ: સૂર્યવંશીએ ઉતાવળ કરવાના બદલે ડ્રેસિંગ રૂમમાંથી શીખવું જોઈએ

બેન સ્ટોક્સની આંતરરાષ્ટ્રીય નિવૃત્તિ: ‘બાઝબોલ’ શૈલીથી નારાજ હાર્મિસને કોચ મેક્કુલમને હટાવવાની કરી માંગ

યજમાન અમેરિકા અને વેસ્ટ ઇન્ડીઝનું ગણિત

યજમાન દેશ હોવાના નાતે અમેરિકા (USA) ની પુરુષ અને મહિલા બંને ટીમોને ઓલિમ્પિકમાં સીધી એન્ટ્રી મળી શકે છે, પરંતુ તે માટે એક શરત છે. ૩૦ જૂનથી ૩૧ ડિસેમ્બર ૨૦૨૬ વચ્ચે અમેરિકાની ટીમોએ ICC T20I રેન્કિંગના ટોચના ૧૫ માં સ્થાન મેળવવું પડશે. જો તેઓ આ માપદંડ પૂરો નહીં કરે, તો રેન્કિંગમાં આગળ રહેલા અન્ય દેશોને તક મળશે.

બીજી તરફ, વેસ્ટ ઇન્ડીઝ માટે એક માઠા સમાચાર છે. વેસ્ટ ઇન્ડીઝ કોઈ એક સિંગલ રાષ્ટ્ર નથી પણ બહુવિધ કેરેબિયન દેશોનું બનેલું સંગઠન છે, જેથી IOC તેમને માન્યતા આપતું નથી. જોકે, તેમના ખેલાડીઓ માટે ‘કેરેબિયન ક્વોલિફાયર’ ઇવેન્ટ યોજાશે, જેના દ્વારા કોઈ એક ચોક્કસ દેશ (NOC) ઓલિમ્પિક ક્વોલિફાયરમાં રમી શકશે.