શેખ હસીનાની બાંગ્લાદેશ વાપસી પર નવો વિવાદ! તારિક રહેમાન સરકારનો મોટો ખુલાસો, કહ્યું- આ માત્ર રાજકીય દેખાડો છે
બાંગ્લાદેશના રાજકારણમાં ફરી એકવાર પૂર્વ વડાંપ્રધાન શેખ હસીનાની વાપસીને લઈને ચર્ચા તેજ બની છે. ઓગસ્ટ 2024માં સત્તા ગુમાવ્યા બાદ ભારત આવેલા શેખ હસીના હવે ડિસેમ્બર મહિનામાં પોતાના વતન બાંગ્લાદેશ પરત ફરવાની તૈયારી કરી રહ્યાં હોવાના અહેવાલો સામે આવ્યા છે. જોકે, બાંગ્લાદેશની વર્તમાન તારિક રહેમાન સરકારને શેખ હસીનાના આ પગલાં પર વિશ્વાસ નથી. સરકારે તેમની વાપસીના દાવાને માત્ર રાજકીય દેખાડો ગણાવ્યો છે. આ ઘટનાને કારણે ભારત અને બાંગ્લાદેશ વચ્ચેના રાજદ્વારી સંબંધો પર પણ સૌની નજર ટકેલી છે.
શેખ હસીનાએ નવા પાસપોર્ટ અને ઓળખપત્રની માગ કરી
મળતી માહિતી અનુસાર, શેખ હસીનાએ નવી દિલ્હી સ્થિત બાંગ્લાદેશ હાઈ કમિશન પાસે નવો પાસપોર્ટ અને નેશનલ આઇડેન્ટિટી કાર્ડ (NID) જારી કરવાની માગ કરી છે. તેમના વકીલોએ લંડન સ્થિત કાનૂની સંસ્થા મેટ્રિક્સ ચેમ્બર્સના માધ્યમથી બાંગ્લાદેશના કાર્યકારી હાઈ કમિશનર પ્રીતિ રહેમાનને પત્ર મોકલ્યો છે.
આ પત્રમાં શેખ હસીનાના નવા દસ્તાવેજો જારી કરવાની પ્રક્રિયા ઝડપથી પૂર્ણ કરવાની અપીલ કરવામાં આવી છે. તેમના વકીલોનું કહેવું છે કે શેખ હસીના બાંગ્લાદેશના નાગરિક છે અને નાગરિક તરીકે તેમને પોતાના દેશમાં પરત ફરવાનો અધિકાર છે. તેમના જૂના પાસપોર્ટ અને રાષ્ટ્રીય ઓળખપત્ર રદ કરવામાં આવ્યા હોવાના અહેવાલો વચ્ચે નવા દસ્તાવેજોની માગ કરવામાં આવી છે.
ડિસેમ્બરમાં બાંગ્લાદેશ પરત ફરવાની યોજના
શેખ હસીનાની પાર્ટી અવામી લીગ દ્વારા સોશિયલ મીડિયા પ્લેટફોર્મ X પર કરવામાં આવેલી પોસ્ટ અનુસાર, તેઓ ડિસેમ્બરમાં બાંગ્લાદેશ પરત ફરવા માગે છે. તેમણે દેશમાં પહોંચીને કાયદાકીય કાર્યવાહીનો સામનો કરવાની અને કોર્ટ સમક્ષ હાજર થવાની ઇચ્છા પણ વ્યક્ત કરી છે.
જોકે, તેમની વાપસીની ચોક્કસ તારીખ હજુ જાહેર કરવામાં આવી નથી. દસ્તાવેજોને લગતી કાનૂની પ્રક્રિયા પૂર્ણ થયા બાદ જ આ અંગે નિર્ણય લેવામાં આવશે તેવું પાર્ટી તરફથી જણાવાયું છે.
તારિક રહેમાન સરકારનું વલણ શું છે?
બાંગ્લાદેશના મુખ્ય સરકારી વકીલ મોહમ્મદ અમીનુલ ઇસ્લામે શેખ હસીનાની વાપસી અંગેના અહેવાલોને માત્ર રાજકીય દેખાડો ગણાવ્યા છે. તેમના જણાવ્યા અનુસાર, જો શેખ હસીના ખરેખર બાંગ્લાદેશ પરત ફરવા માગતાં હોય તો તેમણે જરૂરી કાનૂની પ્રક્રિયાઓનું પાલન કરવું જોઈએ.
બાંગ્લાદેશના વિદેશ રાજ્યમંત્રી હુમાયુન કબીરે પણ તેમને નવો પાસપોર્ટ અથવા અન્ય મુસાફરી દસ્તાવેજ આપવાની શક્યતાને નકારી છે. સરકારનું કહેવું છે કે હાલની પરિસ્થિતિમાં તેમને કોઈ નવા ટ્રાવેલ ડોક્યુમેન્ટ આપવામાં આવશે નહીં.
શેખ હસીના સામે ગંભીર કાનૂની પડકાર
ઓગસ્ટ 2024માં વિદ્યાર્થીઓના નેતૃત્વ હેઠળ થયેલા જનઆંદોલન બાદ શેખ હસીનાએ વડાંપ્રધાન પદ છોડ્યું હતું અને ભારત આવી ગયાં હતાં. ત્યારથી તેઓ ભારતમાં રહે છે. તેમના શાસન દરમિયાન થયેલા વિરોધ પ્રદર્શનો પરની કાર્યવાહી અંગે ગંભીર આરોપો લાગ્યા હતા.
નવેમ્બર 2025માં બાંગ્લાદેશની વિશેષ ટ્રિબ્યુનલે 2024ના વિરોધ પ્રદર્શનો દરમિયાન થયેલી ઘાતક કાર્યવાહી સાથે સંકળાયેલા માનવતા વિરુદ્ધના ગુનાઓના કેસમાં તેમને તેમની ગેરહાજરીમાં મૃત્યુદંડની સજા ફટકારી હતી. જોકે, શેખ હસીનાએ આરોપો નકારી કાઢ્યા છે અને આ કાનૂની કાર્યવાહી તથા તેના ન્યાયિક આધાર સામે સવાલ ઉઠાવ્યા છે.
ભારત માટે પણ મહત્વનો મુદ્દો
બાંગ્લાદેશ સરકારે શેખ હસીનાના પ્રત્યાર્પણ માટે ભારત સરકારને વિનંતી કરી છે. ભારતના વિદેશ મંત્રાલયે આ વિનંતી મળ્યાની પુષ્ટિ કરી છે અને જણાવ્યું છે કે સ્થાપિત પ્રક્રિયા અનુસાર આ મામલાની તપાસ કરવામાં આવી રહી છે.
હવે સૌથી મોટો સવાલ એ છે કે શું શેખ હસીના ખરેખર ડિસેમ્બરમાં બાંગ્લાદેશ પરત ફરશે કે પછી તેમની વાપસીની જાહેરાત માત્ર રાજકીય નિવેદન બનીને રહી જશે? એક તરફ તેમની પાર્ટી વાપસી માટે દસ્તાવેજોની માગ કરી રહી છે, તો બીજી તરફ બાંગ્લાદેશ સરકાર તેમનો વિરોધ કરી રહી છે. આગામી દિવસોમાં આ મુદ્દે લેવાતા નિર્ણયો માત્ર બાંગ્લાદેશના રાજકારણ માટે જ નહીં, પરંતુ ભારત-બાંગ્લાદેશના સંબંધો માટે પણ ખૂબ મહત્વપૂર્ણ સાબિત થઈ શકે છે.
