વર્લ્ડ ટેસ્ટ ચેમ્પિયનશિપમાં ઇતિહાસ રચવાની અણી પર કેપ્ટન શુભમન ગિલ: 3000 રન પૂરા કરનાર બનશે પ્રથમ ભારતીય
ભારતીય ક્રિકેટ ટીમ હાલમાં આગામી શ્રીલંકા પ્રવાસ માટે ખૂબ જ જોશ અને ઉત્સાહ સાથે તૈયારીઓ કરી રહી છે. આ પ્રવાસમાં બંને દેશો વચ્ચે બે મેચોની મહત્વપૂર્ણ ટેસ્ટ શ્રેણી રમાવાની છે, જે વર્લ્ડ ટેસ્ટ ચેમ્પિયનશિપ (WTC) ના સમીકરણો માટે પણ અત્યંત નિર્ણાયક સાબિત થશે. આ દરમિયાન ભારતીય ટીમનું નેતૃત્વ કરી રહેલા યુવા અને પ્રતિભાશાળી કેપ્ટન શુભમન ગિલના નામ સાથે એક મોટો રેકોર્ડ જોડાઈ શકે છે. શુભમન ગિલ વર્લ્ડ ટેસ્ટ ચેમ્પિયનશિપના ઇતિહાસમાં એક શાનદાર ઇતિહાસ રચવાથી માત્ર 157 રન દૂર છે. જો તે શ્રીલંકા સામેના આ આગામી પ્રવાસમાં આટલા રન બનાવી લે છે, તો તે આ મુકામ હાંસલ કરનાર દેશનો પ્રથમ બેટ્સમેન બની જશે.
WTC માં વૈશ્વિક સ્તરે બેટ્સમેનોનું પ્રભુત્વ અને ભારતીય સ્થિતિ
આઇસીસી વર્લ્ડ ટેસ્ટ ચેમ્પિયનશિપની શરૂઆત વર્ષ ૨૦૧૯ થી ૨૦૨૧ વચ્ચેના સમયગાળામાં થઈ હતી. ત્યારથી લઈને અત્યાર સુધીમાં આ ટૂર્નામેન્ટની ત્રણ સફળ આવૃત્તિઓ પૂર્ણ થઈ ચૂકી છે અને હાલમાં ચોથી આવૃત્તિ ચાલી રહી છે. WTC ના આ સમગ્ર ઇતિહાસમાં વિશ્વભરના અનેક મહાન બેટ્સમેનોએ પોતાની બેટિંગ કુશળતાથી રનનો પર્વત બનાવ્યો છે.
જો વિશ્વ સ્તરે સૌથી વધુ રન બનાવનારા ખેલાડીઓની વાત કરવામાં આવે, તો ઇંગ્લેન્ડ અને ઓસ્ટ્રેલિયાના ખેલાડીઓનું નામ મોખરે આવે છે. ઇંગ્લેન્ડના સ્ટાર બેટ્સમેન અને ટેસ્ટ કેપ્ટન જો રૂટ WTC માં ૬,૦૦૦ થી વધુ રન બનાવનારા વિશ્વના એકમાત્ર બેટ્સમેન છે. સૌથી આશ્ચર્યજનક બાબત એ છે કે જો રૂટ સિવાય દુનિયાનો અન્ય કોઈ પણ બેટ્સમેન હજુ સુધી ૫,૦00 રનનો આંકડો પણ સ્પર્શી શક્યો નથી. આ વૈશ્વિક યાદીમાં અત્યાર સુધી ટોચના ૧૦ ખેલાડીઓમાં એક પણ ભારતીય બેટ્સમેનનું નામ ન હોવું એ થોડું ચોંકાવનારું છે, પરંતુ હવે કેપ્ટન શુભમન ગિલ આ રેકોર્ડ બદલવાની બિલકુલ નજીક છે.
શુભમન ગિલ 3,000 રનના ઐતિહાસિક માઈલસ્ટોનની નજીક
વર્તમાન સમયમાં શુભમન ગિલ વર્લ્ડ ટેસ્ટ ચેમ્પિયનશિપના ઇતિહાસમાં ભારત તરફથી સૌથી વધુ રન બનાવનાર બેટ્સમેન છે. ગિલે અત્યાર સુધી રમાયેલી ૪૦ ડબલ્યુટીસી ટેસ્ટ મેચોની ૭૩ ઇનિંગ્સમાં શાનદાર બેટિંગ કરતા કુલ ૨,૮૪૩ રન બનાવ્યા છે, જેમાં તેની બેટિંગ સરેરાશ ૪૩.૦૭ ની રહી છે.
જો શુભમન ગિલ શ્રીલંકા સામેની આગામી બે મેચોની ટેસ્ટ શ્રેણી દરમિયાન માત્ર ૧5૭ રન બનાવી લે છે, તો તે WTC ના ઇતિહાસમાં ૩,૦૦૦ રનનો જાદુઈ આંકડો પાર કરનાર પ્રથમ ભારતીય બેટ્સમેન બની જશે. આ સાથે જ તે વિશ્વના અન્ય દિગ્ગજ બેટ્સમેનોને પાછળ છોડીને WTC માં સૌથી વધુ રન બનાવનારા ટોચના ૧૦ ખેલાડીઓની ચુનંદા ક્લબમાં પણ સત્તાવાર રીતે સ્થાન મેળવી લેશે. હાલમાં તે આ વૈશ્વિક યાદીમાં ૧૩મા ક્રમે બિરાજમાન છે.
WTC માં ભારત માટે સૌથી વધુ રન બનાવનારા ટોચના ખેલાડીઓ
શુભમન ગિલ: ૨૮૪૩ રન
ઋષભ પંત: ૨૭૮૦ રન
રોહિત શર્મા: ૨૭૧૬ રન
વિરાટ કોહલી: ૨૬૧૭ રન
રવીન્દ્ર જાડેજા: ૨૬૧૦ રન
શ્રીલંકા સામેની આ બે મેચોની ટેસ્ટ શ્રેણીમાં ૧૫૭ રન પૂરા કરવાથી ગિલ માત્ર WTC માં જ નહીં, પરંતુ એકંદરે ટેસ્ટ ક્રિકેટ કરિયરમાં પણ પોતાના ૩,૦૦૦ રન પૂરા કરી લેશે. આ સિદ્ધિ મેળવવાની સાથે જ તે ટેસ્ટ ક્રિકેટમાં ૩,૦૦૦ કે તેથી વધુ રન બનાવનાર ભારતનો ૨૮મો બેટ્સમેન બની જશે.
