સેવા હી સાધના: તાપીના આદિજાતિ વિસ્તારમાં આરોગ્ય ક્ષેત્રે ક્રાંતિ, મુખ્યમંત્રીના હસ્તે અદ્યતન હોસ્પિટલનું લોકાર્પણ અને ભૂમિપૂજન

આદિવાસી વિસ્તારમાં રૂ. 910 કરોડનો મહાકાય પ્રોજેક્ટ! જાણો મુખ્યમંત્રીએ વ્યારાને આપેલી મોટી ભેટ વિશે.

ગુજરાતના આદિવાસી અને અંતરિયાળ વિસ્તારોમાં રહેતા નાગરિકોને ઘરઆંગણે જ ઉત્તમ અને આધુનિક તબીબી સેવાઓ મળી રહે તે દિશામાં રાજ્ય સરકારે એક ઐતિહાસિક કદમ ઉઠાવ્યું છે. વડાપ્રધાન નરેન્દ્રભાઈ મોદીના અવિરત લોકસેવાના ૨૫ વર્ષ પૂર્ણ થવાના અવસરે દેશભરમાં યોજાઈ રહેલા ‘સેવા સંકલ્પ અભિયાન’ અંતર્ગત તાપી જિલ્લાના મુખ્ય મથક વ્યારા ખાતે આરોગ્ય સેવાઓનો એક મોટો પ્રકલ્પ કાર્યાન્વિત કરવામાં આવ્યો છે. મુખ્યમંત્રી ભૂપેન્દ્ર પટેલે વ્યારા ખાતે રૂ. ૯૧૦ કરોડના ખર્ચે આકાર પામનારા વિશાળ હેલ્થકેર હબના ભાગરૂપે ૩૧૭ બેડની અતિઆધુનિક યુ.એન.એમ. (UNM) ટ્રાન્ઝિશનલ હોસ્પિટલનું લોકાર્પણ કર્યું છે, તેમજ ૮૦૦ બેડની નવી જનરલ હોસ્પિટલ અને મેડિકલ કોલેજ પ્રોજેક્ટનું ભૂમિપૂજન સંપન્ન કર્યું છે.

૮ લાખથી વધુ લોકોને ઘરઆંગણે મળશે શ્રેષ્ઠ અને ઝડપી સારવાર

તાપી જિલ્લા સહિત ગુજરાત અને મહારાષ્ટ્રના સરહદી આદિજાતિ વિસ્તારોના આશરે ૮ લાખથી વધુ લોકોને હવે ગંભીર બીમારીઓ કે ઈમરજન્સી વખતે દૂર સુધી જવું નહીં પડે. અગાઉ આ વિસ્તારના દર્દીઓને કોઈ વિશિષ્ટ કે ઇમરજન્સી સારવાર માટે આશરે ૭૫ કિલોમીટર દૂર સુરત સુધી લંબાવવું પડતું હતું, જેના કારણે સમય અને નાણાં બંનેનો વ્યય થતો હતો. પરંતુ હવે વ્યારામાં જ તમામ આધુનિક સુવિધાઓ ઉપલબ્ધ થતાં દર્દીઓને સમયસર અને ગુણવત્તાસભર સારવાર મળી રહેશે. આ પ્રકલ્પથી માત્ર આરોગ્ય ક્ષેત્રે જ નહીં, પરંતુ આદિવાસી યુવાનો માટે ઘરઆંગણે જ તબીબી અભ્યાસ (MBBS) કરવાના દ્વાર પણ ખુલશે.

PPP મોડેલ હેઠળ આકાર પામશે ૧૫૦ બેઠકોની મેડિકલ કોલેજ અને હેલ્થકેર હબ

રાજ્ય સરકાર અને ટોરેન્ટ ગ્રુપના પ્રમોટર્સ મહેતા પરિવારની સંસ્થા ‘યુ.એન.એમ. ફાઉન્ડેશન’ના સંયુક્ત ઉપક્રમે (Public-Private Partnership – PPP મોડેલ) આ સમગ્ર પ્રોજેક્ટ હાથ ધરવામાં આવ્યો છે. અંદાજિત રૂ. ૯૧૦ કરોડના આ વિશાળ પ્રોજેક્ટ અંતર્ગત વ્યારા ખાતે:

• ૧૫૦ MBBS બેઠકો ધરાવતી મેડિકલ કોલેજ,

• વિદ્યાર્થીઓ માટે સુસજ્જ હોસ્ટેલ કેમ્પસ,

• અને ૮૦૦ બેડની વિશાળ જનરલ હોસ્પિટલનું નિર્માણ કરવામાં આવશે.

જે સમયગાળા દરમિયાન આ નવી ૮૦૦ બેડની હોસ્પિટલનું નિર્માણ કાર્ય ચાલશે, તે દરમિયાન દર્દીઓની સેવા સતત ચાલુ રહે અને તેમને કોઈ પણ પ્રકારની અગવડ ન પડે તે હેતુથી હાલના કેમ્પસમાં જ ૩૧૭ બેડની ટ્રાન્ઝિશનલ હોસ્પિટલ તૈયાર કરીને તેને કાર્યરત કરી દેવામાં આવી છે. જૂની વ્યારા જનરલ હોસ્પિટલની તમામ સેવાઓ હવે આ નવનિર્મિત ટ્રાન્ઝિશનલ હોસ્પિટલમાં સ્થળાંતરિત કરવામાં આવશે.

મોરબીનું ગૌરવ: હોમ ગાર્ડ કમાન્ડન્ટ અને શૂટર દીપ પટેલને રાજ્યકક્ષાનો પ્રતિષ્ઠિત ‘જયદીપસિંહજી બારૈયા એવોર્ડ’ એનાયત

નંબર વગર કે ફેન્સી પ્લેટ સાથે નીકળ્યા તો ગાડી જશે ડિટેઇનમાં! જાણો ગુજરાત પોલીસની રાજ્યવ્યાપી ઝુંબેશની વિગતો

૩૧૭ બેડની નવનિર્મિત ટ્રાન્ઝિશનલ હોસ્પિટલમાં ઉપલબ્ધ સુવિધાઓ

આશરે ૯,૯૮૬ ચોરસ મીટરના વિશાળ કાર્પેટ એરિયામાં પથરાયેલી આ ટ્રાન્ઝિશનલ હોસ્પિટલમાં દર્દીઓ માટે તમામ પ્રકારની આધુનિક સગવડો ઉભી કરવામાં આવી છે:

• બેડ ક્ષમતા: હોસ્પિટલમાં કુલ ૩૧૭ બેડ છે, જેમાં ૨૭૧ સામાન્ય વોર્ડ બેડ અને ૪૬ ક્રિટિકલ કેર બેડનો સમાવેશ થાય છે.

• OPD ક્ષમતામાં વધારો: અગાઉ અહીં દૈનિક આશરે ૭૦૦ દર્દીઓની OPD ક્ષમતા હતી, જે વધીને હવે દરરોજ ૧,૨૦૦ દર્દીઓની થઈ ગઈ છે. ૧૭ અલગ-અલગ ક્લિનિકલ સ્પેશિયાલિટીઝ માટે ૨૪ વિશેષ OPD રૂમ બનાવવામાં આવ્યા છે.

• ઓપરેશન થિયેટર: સુસજ્જ ૪ મુખ્ય ઓપરેશન થિયેટર (૩ મેજર સર્જરી માટે અને ૧ સીઝેરિયન/મેટરનિટી સેવા માટે), તેમજ ઈમરજન્સી માઈનોર OT અને પોસ્ટ-મોર્ટમ OTની વ્યવસ્થા.

• ક્રિટિકલ કેર અને આઈસીયુ: ગંભીર દર્દીઓ માટે ૩૪ ICU બેડ, નવજાત શિશુઓ અને બાળકો માટે ૧૨ NICU/PICU બેડ અને ૬ ઈમરજન્સી રૂમ (ER) બેડ.

• અન્ય તબીબી સુવિધાઓ: આધુનિક પેથોલોજી અને માઈક્રોબાયોલોજી લેબોરેટરી, બ્લડ સ્ટોરેજ સેન્ટર, ડિજિટલ X-Ray, સોનોગ્રાફી (USG), ૮ બેડનું હાઇટેક ડાયાલિસિસ યુનિટ, કંગારૂ મધર કેર રૂમ અને ન્યુટ્રિશન રિહેબિલિટેશન સેન્ટર (NRC) વોર્ડ.

કાર્યક્રમમાં મહાનુભાવોની ઉપસ્થિતિ

મુખ્યમંત્રી ભૂપેન્દ્ર પટેલે હોસ્પિટલના તમામ વિભાગોની રૂબરૂ મુલાકાત લઈને ઉપલબ્ધ સુવિધાઓનું નિરીક્ષણ કર્યું હતું. આ પ્રસંગે આદિજાતિ વિકાસ મંત્રી અને તાપી જિલ્લાના પ્રભારી મંત્રી  નરેશભાઈ પટેલ, રમતગમત રાજ્ય મંત્રી ડૉ. જયરામભાઈ ગામીત, સાંસદ પરભુભાઈ વસાવા, ટોરેન્ટ ગ્રુપના ડિરેક્ટર જીનલ મહેતા, જિલ્લા પંચાયત પ્રમુખ ચંચળબેન ચૌધરી, સ્થાનિક ધારાસભ્યો, જિલ્લા કલેક્ટર દેવ ચૌધરી તેમજ યુ.એન.એમ. ગ્રુપ અને વહીવટી તંત્રના ઉચ્ચ અધિકારીઓ ઉપસ્થિત રહ્યા હતા.

ટોરેન્ટ ગ્રુપના ડિરેક્ટર  જીનલ મહેતાએ જણાવ્યું હતું કે, “યુ.એન.એમ. ફાઉન્ડેશન દ્વારા શિક્ષણ, આરોગ્ય અને સામાજિક ક્ષેત્રે સતત કાર્ય કરવામાં આવે છે. વ્યારા ખાતેની આ નવી સુવિધા દક્ષિણ ગુજરાતના સરહદી વિસ્તારો માટે આરોગ્ય ક્ષેત્રે એક નવા યુગની શરૂઆત કરશે.”

વડાપ્રધાન  નરેન્દ્રભાઈ મોદી, મુખ્યમંત્રી ભૂપેન્દ્ર પટેલ અને નાયબ મુખ્યમંત્રી હર્ષ સંઘવીના નેતૃત્વમાં આદિવાસી વિસ્તાર તાપી ખાતે આકાર પામેલું આ હેલ્થકેર હબ સમગ્ર વિસ્તારની સુખાકારીમાં મોટું મોરપીંછ સાબિત થશે.