ડેન્ગ્યુ સામે ગુજરાતનું મેગા ઓપરેશન! ઘર-ઘર સર્વેલન્સથી બ્રીડિંગ સાઇટ્સ સુધી એક્શન
રાજ્યમાં વાહકજન્ય રોગોના અટકાયતી પગલાંને વધુ મજબૂત અને સઘન બનાવવાના હેતુસર આરોગ્ય રાજ્ય મંત્રી પ્રફુલ પાનશેરીયાની વિશેષ અધ્યક્ષતામાં એક ઉચ્ચસ્તરીય સમીક્ષા બેઠકનું આયોજન કરવામાં આવ્યું હતું. આ બેઠકમાં રાજ્યના તમામ જિલ્લાઓ તેમજ કોર્પોરેશન વિસ્તારોમાં મેલેરિયા, ડેન્ગ્યુ અને ચિકનગુનિયા જેવા રોગોની વર્તમાન સ્થિતિ અંગે વિગતવાર ચર્ચા અને સમીક્ષા હાથ ધરવામાં આવી હતી. મંત્રીએ અધિકારીઓ સાથે મળીને રોગચાળાને કાબૂમાં રાખવા માટે ચાલી રહેલી કામગીરીનો તલસ્પર્શી તાગ મેળવ્યો હતો.
ડેન્ગ્યુ અને મેલેરિયા સંપૂર્ણ નિયંત્રણ હેઠળ, નાગરિકો ગભરાય નહીં પરંતુ સાવચેતી રાખે
આરોગ્ય રાજ્ય મંત્રી પ્રફુલ પાનશેરીયાએ બેઠકમાં સ્પષ્ટપણે જણાવ્યું હતું કે રાજ્યમાં ડેન્ગ્યુ અને મેલેરિયાની સ્થિતિ સંપૂર્ણપણે કાબૂમાં છે. તેમણે નાગરિકોને અફવાઓથી ન ગભરાવા અને સાવચેતી રાખવા અપીલ કરી હતી. મંત્રીએ જણાવ્યું કે ગત વર્ષની સરખામણીએ વર્ષ ૨૦૨૬માં રાજ્યમાં મેલેરિયાના કેસોમાં ૨૨ ટકા અને ડેન્ગ્યુના કેસોમાં ૩૯.૬ ટકાનો નોંધપાત્ર ઘટાડો જોવા મળ્યો છે. આ આંકડા સાબિત કરે છે કે આરોગ્ય વિભાગની સમયસરની કામગીરી અને જાગૃતિ અભિયાન રંગ લાવી રહ્યા છે.
૪૨ હોસ્પિટલોમાં નિદાન કેન્દ્રો અને ‘હાઉસ ટુ હાઉસ’ સર્વેલન્સ
ડેન્ગ્યુના ઝડપી અને સચોટ નિદાન માટે રાજ્યની મેડિકલ કોલેજો સાથે સંલગ્ન ૪૨ હોસ્પિટલોમાં ખાસ નિદાન કેન્દ્રો કાર્યરત કરવામાં આવ્યા છે. આ કેન્દ્રો દ્વારા સીરમ સેમ્પલના ટેસ્ટિંગની પરિસ્થિતિની મંત્રીએ જાતે ચકાસણી કરી હતી. આ કેન્દ્રો દ્વારા ડેન્ગ્યુના શંકાસ્પદ ૧.૩૫ લાખથી વધુ સીરમ સેમ્પલની તપાસ કરવામાં આવી હતી, જેમાંથી ૨,૦૯૯ કેસ પોઝિટિવ નોંધાયા હતા. આ ઉપરાંત, રાજ્યભરમાં વાહકજન્ય રોગો સામે રક્ષણ મેળવવા માટે ચાલી રહેલી ‘હાઉસ ટુ હાઉસ’ (ઘર-ઘર જઈને) સર્વેલન્સ ઝુંબેશની પણ સમીક્ષા કરવામાં આવી હતી.
મચ્છરોના બ્રીડિંગ સાઇટ્સ નાશ કરવા માટે કડક સૂચનાઓ
આ બેઠકમાં આરોગ્ય મંત્રીએ આરોગ્ય વિભાગના અધિક મુખ્ય સચિવ રાજીવ ટોપનોને તમામ જિલ્લા કલેક્ટર, જિલ્લા વિકાસ અધિકારી (DDO) અને મ્યુનિસિપલ કમિશનરો સાથે તાત્કાલિક બેઠક યોજવા માટે આદેશ કર્યા હતા. શહેરી તેમજ ગ્રામીણ વિસ્તારોમાં ડેન્ગ્યુના મચ્છરોના પ્રજનન સ્થાનો (બ્રીડિંગ સાઇટ્સ)નો સઘન નાશ કરવા માટે ખાસ ઝુંબેશ ચલાવવાની કડક સૂચના આપવામાં આવી છે.
CHC અને PHC પર દવાઓ અને કિટ્સની પૂરતી ઉપલબ્ધતા
રાજ્યના તમામ સામુહિક આરોગ્ય કેન્દ્રો (CHC) અને પ્રાથમિક આરોગ્ય કેન્દ્રો (PHC) ખાતે તાવ અને ડેન્ગ્યુના યોગ્ય નિદાન તેમજ સારવાર માટે ઉપલબ્ધ સુવિધાઓની પણ મંત્રીએ સમીક્ષા કરી હતી. દરેક સેન્ટર પર જરૂરી દવાઓનો પૂરતો જથ્થો અને નિદાન કિટ્સ ઉપલબ્ધ છે કે નહીં તેની ખાતરી કરવામાં આવી હતી. જે આરોગ્ય કેન્દ્રોમાં કોઈ પણ પ્રકારની ક્ષતિ કે અછત જણાઈ આવી, ત્યાં તત્કાલ ધોરણે ઘટતી સુવિધાઓ પૂરી પાડવા માટે સખત આદેશો કરવામાં આવ્યા છે. મંત્રીએ અંતે નાગરિકોને ઘરની આસપાસ ચોખ્ખું પાણી જમા ન થવા દેવા અને સ્વચ્છતા જાળવીને સહયોગ આપવા અનુરોધ કર્યો હતો.
