દેશવ્યાપી સાયબર ફ્રોડમાં ઉપયોગ થયેલા એકાઉન્ટનો પર્દાફાશ, બે આરોપી ઝડપાયા
મહેસાણા સાયબર ક્રાઇમ ટાસ્ક ફોર્સે શંકાસ્પદ બેંક એકાઉન્ટની વિગતવાર તપાસ શરૂ કરતાં મોટી ગેરરીતિઓ બહાર આવી છે. NCCRP પોર્ટલ પરથી મળેલી માહિતી મુજબ બંધન બેંકનું એક એકાઉન્ટ દેશના અનેક રાજ્યોમાં નોંધાયેલા સાત અલગ-અલગ કેસ સાથે જોડાયેલું હોવાનું બહાર આવ્યું. આ એકાઉન્ટ ઊંઝાના હિતેશકુમાર મહેન્દ્રભાઈ રાવળની ‘હિતેશ ટ્રેડર્સ’ નામની પેઢી હેઠળ નોંધાયેલું હતું, પરંતુ તપાસ દરમ્યાન દર્શાવેલા સરનામે એ વ્યવસાય કાર્યરત ન હોવાનું જાણવા મળ્યું.
કમિશન એજન્ટના નામે ખોલાયેલું એકાઉન્ટ સાયબર ઠગોને ભાડે અપાયું હોવાનું બહાર આવ્યું
તપાસ દરમ્યાન જાણવા મળ્યું કે કમિશન એજન્ટ તરીકે નોંધાયેલ આ પેઢી પાસેથી ખોલાવેલા બેંક એકાઉન્ટમાં દેશભરમાંથી થયેલા સાયબર ફ્રોડની રકમ સીધી જમા થતી હતી. ત્યારબાદ આ નાણાં ચેક દ્વારા ઉપાડી લેવામાં આવતા હતા અને આ પ્રક્રિયા માટે એકાઉન્ટ માત્ર કમિશન પર સાયબર ઠગોને ભાડે આપવામાં આવ્યું હતું. આ નાણાકીય ગેરવહીવટમાં સંડોવાયેલા બે આરોપીઓને પોલીસએ ઝડપી લીધા છે અને તેમના નિવેદનોના આધારે વધુ તપાસ આગળ વધારી છે.
કરોડોની લેવડદેવડમાં ફ્રોડની રકમ પણ સામેલ, મુખ્ય આરોપી દ્વારા એકાઉન્ટ ભાડે અપાયું હતું
આ એકાઉન્ટમાં 1 એપ્રિલ 2024થી 5 નવેમ્બર 2025 વચ્ચે 8,37,32,794 રૂપિયાનું ક્રેડિટ અને 8,53,00,000 રૂપિયાનું ડેબિટ ટર્નઓવર નોંધાયું હતું. આ વિશાળ ટ્રાન્ઝેક્શન દરમિયાન સાયબર ફ્રોડની 1,11,334 રૂપિયાની રકમ પણ ચેક વડે ઉપાડી લેવાઈ હતી અને તેનો વ્યક્તિગત ઉપયોગ કરવામાં આવ્યો હતો. મુખ્ય આરોપી હિતેશકુમાર રાવળે સ્વીકાર્યું કે તેણે પોતાની પેઢીનું બેંક એકાઉન્ટ કમિશનના આધારે સાયબર ઠગોને ભાડે આપ્યુ હતું, જેમાં તેનો સહભાગી પિયુષભાઈ કાન્તીભાઈ પટેલ પણ સામેલ હતો.
પોલીસના માર્ગદર્શન હેઠળ સખત કાર્યવાહી, બેંક એકાઉન્ટ ભાડે આપવાનો ગંભીર ગુનો ગણાવાયો
ગાંધીનગર રેન્જના પોલીસ મહાનિરીક્ષક વિરેન્દ્રસિંહ યાદવ અને મહેસાણા જિલ્લાના પોલીસ અધિક્ષક હિમાંશુ સોલંકીના માર્ગદર્શન હેઠળ નાયબ પોલીસ અધિક્ષક મીલાપ પટેલે આ ગેરકાયદેસર પ્રવૃત્તિને સંપૂર્ણ રીતે નાબૂદ કરવા કડક પગલાં લેવા આદેશ કર્યો હતો. સાયબર ક્રાઇમ પોલીસે એકાઉન્ટ હોલ્ડર અને તેના સહભાગી વિરુદ્ધ ગુનો દાખલ કરીને બંનેની ધરપકડ કરી છે. પોલીસનું જણાવવું છે કે પોતાની બેંકિંગ સુવિધાઓને ભાડે આપવી કે કમિશન પર આપવી એ ગંભીર કાયદેસર ગુનો છે અને આવી પ્રવૃત્તિઓ પર સાયબર સેલ સતત નજર રાખશે.
