પશુપાલકો માટે રાહતના સમાચાર, અમૂલ દ્વારા સેક્સ સોર્ટેડ સિમેન હવે માત્ર 25 રૂપિયામાં
નવા વર્ષની શરૂઆત સાથે જ અમૂલ ડેરીએ રાજ્યના પશુપાલકો માટે આનંદદાયક સમાચાર આપ્યા છે. પ્રથમ બોર્ડ બેઠકમાં લેવાયેલા નિર્ણય મુજબ સેક્સ સોર્ટેડ સિમેન ડોઝના ભાવમાં મોટો ઘટાડો કરાયો છે. હવે આ ડોઝ અગાઉની તુલનામાં અડધી કિંમતમાં ઉપલબ્ધ થશે. આ પગલાંને પશુપાલન ક્ષેત્ર માટે મહત્વપૂર્ણ માનવામાં આવી રહ્યું છે.
સેક્સ સોર્ટેડ સિમેન હવે માત્ર 25 રૂપિયામાં
અમૂલ દ્વારા આપવામાં આવતો સેક્સ્ડ સિમેન ડોઝ અગાઉ 50 રૂપિયામાં મળતો હતો, જે હવે માત્ર 25 રૂપિયામાં પશુપાલકોને મળશે. બજારમાં આ જ ડોઝ ખાનગી રીતે 1000થી 5000 હજાર રૂપિયામાં વેચાય છે, ત્યારે અમૂલ દ્વારા લેવામાં આવેલો આ નિર્ણય મોટી રાહત સમાન છે. ઓછા ખર્ચે અદ્યતન ટેક્નોલોજી ઉપલબ્ધ થતાં પશુપાલકોનો ખર્ચ ઘટશે.
વધુ પડીઓ અને વાછરડીઓનો લાભ
સેક્સ્ડ સિમેન ટેક્નોલોજી દ્વારા કૃત્રિમ ગર્ભાધાનમાં માદા પશુના જન્મની સંભાવના 85 ટકા કરતાં વધુ રહે છે. પરિણામે દૂધ આપનારા પશુઓની સંખ્યા વધે છે અને આવકમાં સીધો વધારો થાય છે. આ પદ્ધતિ ખાસ કરીને નાના અને મધ્યમ પશુપાલકો માટે ફાયદાકારક સાબિત થાય છે.
અત્યાર સુધી લાખો પશુપાલકોને મળ્યો લાભ
વર્ષ 2021થી અત્યાર સુધી અમૂલની આ યોજનાનો લાભ 10 લાખથી વધુ પશુપાલકો લઈ ચૂક્યા છે. વધુ પાડીઓ મળવાથી પશુપાલકોની આર્થિક સ્થિતિ મજબૂત બની છે. ડેરી ઉદ્યોગને પણ આ નિર્ણયથી લાંબા ગાળે ફાયદો થયો છે. હવે ભાવ ઘટાડાથી વધુ પશુપાલકો જોડાશે તેવી શક્યતા છે.
પશુપાલન ક્ષેત્રને મજબૂત કરવાની દિશામાં પગલું
અમૂલ ડેરીના અધિકારીઓએ જણાવ્યું કે આ નિર્ણય સંપૂર્ણપણે પશુપાલકોના હિતને ધ્યાનમાં રાખીને લેવાયો છે. માદા પશુઓની સંખ્યા વધારી દૂધ ઉત્પાદન વધારવું એ મુખ્ય હેતુ છે. આ પહેલથી ગ્રામિણ વિસ્તારોમાં આવક વધશે અને પશુપાલન વધુ નફાકારક બનશે.
ડેરી ઉદ્યોગ માટે નવી દિશા
પશુપાલકો આ નિર્ણયને નવા વર્ષની વિશેષ ભેટ તરીકે જોઈ રહ્યા છે. અમૂલની આ પહેલ અન્ય ડેરી સંસ્થાઓ માટે પણ પ્રેરણારૂપ બની શકે છે. આગામી સમયમાં આ યોજના ડેરી ઉદ્યોગમાં મોટા ફેરફાર લાવશે તેવી આશા વ્યક્ત કરવામાં આવી રહી છે. ગુજરાતમાં પશુપાલન ક્ષેત્રને આ નિર્ણયથી નવી ગતિ મળશે.
