કેન્સર સામેની લડાઈમાં ‘આશા’નું કિરણ: મુખ્યમંત્રી ભૂપેન્દ્ર પટેલે ભાવનગર માટે ૧૦ કેન્સર સ્ક્રિનિંગ વાનનું કર્યું લોકાર્પણ

ગ્રામીણ ગુજરાતમાં કેન્સર સામે જંગ; રેડ ક્રોસ સોસાયટી અને જેનબર્ક ફાર્માની અનોખી પહેલ

રાજ્યના મુખ્યમંત્રી શ્રી ભૂપેન્દ્ર પટેલે કેન્સર જેવી ગંભીર બીમારીનું વહેલી તકે નિદાન થઈ શકે તે હેતુથી અત્યાધુનિક ‘કેન્સર સ્ક્રિનિંગ વાન’ (આશા વાન) નું ગાંધીનગર ખાતેથી લોકાર્પણ કર્યું છે. ઇન્ડિયન રેડ ક્રોસ સોસાયટીની ભાવનગર બ્રાન્ચને ફાળવવામાં આવેલી આ વાન ગ્રામીણ વિસ્તારોમાં કેન્સરના નિદાન માટે મહત્વની ભૂમિકા ભજવશે.

અત્યાધુનિક સાધનોથી સજ્જ ‘આશા વાન’

જેનબર્ક ફાર્માસ્યુટિકલ દ્વારા ડોનેશન તરીકે મળેલી આ ‘આશા વાન’ અલ્ટ્રા મોર્ડન ટેકનોલોજીથી સજ્જ છે. આ વાનની વિશેષતાઓ નીચે મુજબ છે:

• નિદાન સુવિધા: વાનમાં EVA-Pro ડાયગ્નોસ્ટિક્સ અને મેમોગ્રાફી યુનિટની સુવિધા ઉપલબ્ધ છે.

• ટેલી કન્સલટેશન: સ્થળ પર જ નિષ્ણાંત તબીબોનું ટેલી કન્સલટેશન મળી શકશે.

• વિવિધ કેન્સરનું સ્ક્રિનિંગ: મોઢાનું કેન્સર, ફેફસાનું કેન્સર, બ્લડ કેન્સર, બ્રેસ્ટ કેન્સર, સર્વાઈકલ અને પ્રોસ્ટેટ કેન્સર જેવા વિવિધ રોગોનું પ્રાથમિક નિદાન સ્થળ પર જ થઈ શકશે.

છેવાડાના માનવી સુધી પહોંચશે સ્વાસ્થ્ય સેવા

વડાપ્રધાન શ્રી નરેન્દ્રભાઈ મોદીના ‘હેલ્થ એન્ડ વેલનેસ ફોર ઓલ’ ના લક્ષ્યાંકને સાકાર કરવા માટે આ એક મહત્વનું કદમ છે. મુખ્યમંત્રીએ જણાવ્યું હતું કે, આવી મોબાઈલ વાન દ્વારા ગ્રામીણ સ્તરે કેન્સર સ્ક્રિનિંગની પ્રક્રિયા ઝડપી બનશે, જેનાથી સમયસર સારવાર શરૂ કરી શકાશે અને અનેક જીવન બચાવી શકાશે.

લોકાર્પણના આ અવસરે જેનબર્ક ફાર્માના એમડી શ્રી આશિષ ભૂતા અને ઇન્ડિયન રેડ ક્રોસ સોસાયટી ભાવનગર બ્રાન્ચના હોદ્દેદારો ઉપસ્થિત રહ્યા હતા. આ ૧૦ વાન હવે ભાવનગર અને આસપાસના વિસ્તારોમાં જનસેવા માટે કાર્યરત થશે.

ગાંધીનગરના લોકભવન ખાતે ભવ્ય રાજ્યસ્તરીય ‘સંસ્કૃત સન્માન સમારોહ’નું આયોજન

ગાંધીનગર સિવિલ હોસ્પિટલ ખાતે એક માસ માટે ‘વર્લ્ડ ઓરલ હેલ્થ મંથ’ની ઉજવણી